‘ଲିଭିଂ ନଷ୍ଟ୍ରାଦମସ୍’ଙ୍କ ଚେତାବନୀ: ତୃତୀୟ ବିଶ୍ୱଯୁଦ୍ଧ ସନ୍ନିକଟ

ଲଣ୍ଡନ: ‘ଲିଭିଂ ନଷ୍ଟ୍ରାଦମସ୍’ କୁହାଯାଉଥିବା ବ୍ରାଜିଲର ୩୮ ବର୍ଷୀୟ ମନୋବିଜ୍ଞାନୀ ଆଥୋସ୍ ସାଲୋମ ତୃତୀୟ ବିଶ୍ୱଯୁଦ୍ଧ ବିଷୟରେ ଏକ ଭୟଙ୍କର ଚେତାବନୀ ଜାରି କରିଛନ୍ତି। କୋଭିଡ୍-୧୯ ମହାମାରୀ, ରାଣୀ ଏଲିଜାବେଥ ଦ୍ବିତୀୟଙ୍କ ମୃତ୍ୟୁ ଏବଂ ୟୁକ୍ରେନ ଉପରେ ରୁଷିଆର ଆକ୍ରମଣ ଭଳି ଘଟଣାର ପୂର୍ବାନୁମାନ କରିଥିବା ସାଲୋମ କହିଛନ୍ତି ଯେ ସାମ୍ପ୍ରତିକ ବୈଶ୍ୱିକ ଘଟଣାକ୍ରମ ଏକ ଉଦ୍‌ବେଗଜନକ ଭୂ-ରାଜନୈତିକ ଢାଞ୍ଚାକୁ ସୂଚାଉଛି। ଏକ ବିପଜ୍ଜନକ ବିଶ୍ୱ ସଙ୍କଟ ସୃଷ୍ଟି ହେଉଛି ଏବଂ ସେ ଲୋକମାନଙ୍କୁ ‘ସଙ୍କେତ’ଗୁଡିକ ଉପରେ ଧ୍ୟାନ ଦେବାକୁ ଅନୁରୋଧ କରିଛନ୍ତି।

ସାଲୋମ ଗତ ଜାନୁଆରିରେ ଲାଟଭିଆ ଓ ସ୍ୱିଡେନ ମଧ୍ୟରେ ସମୁଦ୍ର ତଳେ ଫାଇବର ଅପ୍ଟିକ୍ କେବୁଲ ଜନିତ କ୍ଷୟକ୍ଷତି ବିଷୟରେ ଦର୍ଶାଇଥିଲେ, ଯାହା ସ୍ୱିଡେନ କର୍ତ୍ତୃପକ୍ଷଙ୍କୁ ଏହାର ତଦନ୍ତ କରିବାକୁ ପ୍ରେରିତ କରିଥିଲା। ସାଲୋମ କହିଛନ୍ତି, ବାଲ୍ଟିକ୍ ସାଗରରେ ଏକ ଅଦୃଶ୍ୟ ଯୁଦ୍ଧ ଆରମ୍ଭ ହୋଇଛି। ସେ ୨୦୨୩ କେବୁଲ ନେଟୱର୍କ ବିଫଳତା ସମେତ ଅତୀତର ବାଧାବିଘ୍ନ ଉପରେ ଆଲୋକପାତ କରିଥିଲେ ଯାହା ସମଗ୍ର ଫିନଲାଣ୍ଡରେ ଯୋଗାଯୋଗ ବ୍ୟବସ୍ଥାକୁ ପ୍ରଭାବିତ କରିଥିଲା। ସେ ଉଲ୍ଲେଖ କରିଛନ୍ତି ଯେ, ଚାଲିଥିବା ଆକ୍ରମଣ ନାଟୋକୁ ଏହି ଅଞ୍ଚଳରେ ସୁରକ୍ଷା କଡ଼ାକଡ଼ି କରିବାକୁ ପ୍ରେରଣା ଦେଇଛି। ସାଲୋମ ବର୍ତ୍ତମାନର ଭୂ-ରାଜନୈତିକ ଉତ୍ତେଜନାକୁ ଅତୀତର ବିଶ୍ୱଯୁଦ୍ଧ ଆରମ୍ଭ କରିଥିବା ଘଟଣା ସହିତ ତୁଳନା କରିଥିଲେ। ଇତିହାସ ଆମକୁ ଦେଖାଇ ସାରିଛି ଯେ ବଡ଼ ବଡ଼ ସଂଘର୍ଷ ଅଲଗା ଅଲଗା ଘଟଣାରୁ ଆରମ୍ଭ ହୋଇପାରେ। ପ୍ରଥମ ବିଶ୍ୱଯୁଦ୍ଧ ଜଣେ ଆର୍କଡ୍ୟୁକ୍‌ଙ୍କ ହତ୍ୟା ଯୋଗୁଁ ଆରମ୍ଭ ହୋଇଥିଲା। ଦ୍ବିତୀୟ ବିଶ୍ବଯୁଦ୍ଧ ପୋଲାଣ୍ଡ ଉପରେ ଆକ୍ରମଣ ଯୋଗୁ ଆରମ୍ଭ ହୋଇଥିଲା। ଭବିଷ୍ୟତରେ ଚୀନ୍ ଓ ଆମେରିକା ମଧ୍ୟରେ ସଂଘର୍ଷ ବଢ଼ିବ ବୋଲି ସେ ପୂର୍ବାନୁମାନ କରିଛନ୍ତି।