ରାମ ମନ୍ଦିର ନିର୍ମାଣ ଖବର ଶୁଣି ନେପାଳବାସୀ ଖୁବ ଖୁସି, ନେପାଳ ବିନା ପ୍ରଭୁ ରାମ ଅସମ୍ପୂର୍ଣ୍ଣ: ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ନେପାଳର ପ୍ରଧାନମନ୍ତ୍ରୀ ଶେର୍‌ ବାହାଦୁର୍‌ ଦେଉବାଙ୍କ ନିମନ୍ତ୍ରଣ ରକ୍ଷା କରି ଆଜି ଲୁମ୍ବିନୀ ଗସ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଭାରତ ଓ ନେପାଳ ମଧ୍ୟରେ ଥିବା ସମ୍ପର୍କକୁ ଅଧିକ ନିବିଡ଼ କରିବା ତାଙ୍କର ଉଦ୍ଦେଶ୍ୟ ବୋଲି ଗସ୍ତ ପୂର୍ବରୁ ପ୍ରଧାନମନ୍ତ୍ରୀ କହିଥିବା ବେଳେ ନେପାଳ ବିନା ପ୍ରଭୁ ରାମ ଅସମ୍ପୂର୍ଣ୍ଣ ବୋଲି ଲୁମ୍ବିନୀ ଗସ୍ତ କରି କହିଛନ୍ତି ପ୍ରଧାନମନ୍ତ୍ରୀ ମୋଦୀ।

ଲୁମ୍ବିନୀରେ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଜନକପୁରରେ ମୁଁ କହିଥିଲି ଯେ ନେପାଳ ବିନା ପ୍ରଭୁ ରାମ ଅସମ୍ପୂର୍ଣ୍ଣ । ଯେତେବେଳେ ଭାରତରେ ପ୍ରଭୁ ଶ୍ରୀ ରାମଙ୍କର ଏକ ବିଶାଳ ମନ୍ଦିର ନିର୍ମାଣ ହୁଏ, ସେତେବେଳେ ନେପାଳର ଲୋକମାନେ ମଧ୍ୟ ଖୁସି ହୁଅନ୍ତି। ଭାରତର ସରନାଥ, ବୋଧ ଗୟା ଏବଂ କୁଶିନଗରଠାରୁ ନେପାଳର ଲୁମ୍ବିନି ପର୍ଯ୍ୟନ୍ତ ଏହି ପବିତ୍ର ସ୍ଥାନଗୁଡିକ ଆମର ସାଧାରଣ ଐତିହ୍ୟ ଏବଂ ସହଭାଗୀ ମୂଲ୍ୟବୋଧର ପ୍ରତୀକ। ଆମକୁ ଏହି ଐତିହ୍ୟର ବିକାଶ ଏବଂ ଏହାକୁ ଆହୁରି ସମୃଦ୍ଧ କରିବାକୁ ହେବ ବୋଲି ସେ କହିଛନ୍ତି। ନେପାଳ ହେଉଛି ଅନେକ ପବିତ୍ର ତୀର୍ଥସ୍ଥାନ, ମନ୍ଦିର ଏବଂ ମଠର ଦେଶ। ନେପାଳ ହେଉଛି ସେହି ଦେଶ ଯିଏ ବିଶ୍ୱର ପ୍ରାଚୀନ ସଭ୍ୟତା ଏବଂ ସଂସ୍କୃତିକୁ ସଂରକ୍ଷଣ କରି ରଖିଛି।

ଭାରତ-ନେପାଳ ସମ୍ପର୍କ ଉପରେ ସେ କହିଛନ୍ତି, ଭାରତ ଏବଂ ନେପାଳ ମଧ୍ୟରେ ବଢ଼ୁଥିବା ତଥା ଦୃଢ଼ ହେଉଥିବା ବନ୍ଧୁତା ସମଗ୍ର ମାନବିକତାର ହିତ ପାଇଁ କାର୍ଯ୍ୟ କରିବ। ଭଗବାନ ବୁଦ୍ଧଙ୍କ ପ୍ରତି ଭକ୍ତି ଆମକୁ ଏପର୍ଯ୍ୟନ୍ତ ଏକତ୍ର କରିରଖିଛି।