ପ୍ରେମିକାଙ୍କ ଶବକୁ ଗାୟବ କରିବାକୁ ଆମ୍ବୁଲାନ୍ସ ବୁକ କଲେ ପ୍ରେମିକ, ରାସ୍ତା ମଝିରୁ ଧରିଲା ପୁଲିସ

ପୁଣେ: ମହାରାଷ୍ଟ୍ରର ଭୀୱାଣ୍ଡିରେ ପୁଲିସ ଆଜି ଜଣେ ଯୁବକଙ୍କୁ ଗିରଫ କରିଛି | ଏହି ଯୁବକ ତାଙ୍କ ଲିଭ-ଇନ୍ ପାର୍ଟନରଙ୍କୁ ହତ୍ୟା କରିଥିବା ଅଭିଯୋଗରେ ପୁଲିସ ୩୦ ବର୍ଷ ବୟସ୍କ ଯୁବକଙ୍କୁ ଗିରଫ କରିଛି। ମିଳିଥିବା ସୂଚନା ମୁତାବକ ୩ ଦିନ ତଳେ ଯୁବତୀ ଜଣକ ମଦ୍ୟପାନ କରି ଘରକୁ ଫେରିଥିଲେ ଆଉ କୌଣସି ପ୍ରସଙ୍ଗରେ ଉଭୟଙ୍କ ମଧ୍ୟରେ ଝଗଡା ହେବା ପରେ ପ୍ରେମିକ ଜଣକ ତାଙ୍କର ଗଳା କାଟି ହତ୍ୟା କରିଥିଲେ। ସୂଚନା ଅନୁଯାୟୀ ଅଭିଯୁକ୍ତ ସଦ୍ଦାମ ସୟିଦ ଭୀୱାଣ୍ଡିର ଶିବାଜୀ ନଗରରେ ରହୁଥିବାବେଳେ ତାଙ୍କ ସହ ୨୪ ବର୍ଷୀୟ କବିତା ମାଦାର ଓରଫ ମୁସ୍କାନ୍ ଗତ ପାଞ୍ଚ ମାସ ଧରି ଲିଭ-ଇନରେ ରହୁଥିଲେ | ଗତ ଶୁକ୍ରବାର ଦିନ, ମୁସ୍କାନ ବିଳମ୍ବିତ ରାତିରେ ମଦ୍ୟପାନ କରି ଘରକୁ ଆସିଥିଲେ, ଯାହାକୁ ନେଇ ଉଭୟଙ୍କ ମଧ୍ୟରେ ଝଗଡା ହୋଇଥିଲା |

ଆଉ ଝଗଡା ଏତେ ବଢିଯାଇଥିଲା ଯେ ସଦ୍ଦାମ ତାଙ୍କୁ ଗଳା କାଟି ହତ୍ୟା କରିଥିଲେ। ମୁସ୍କାନଙ୍କୁ ହତ୍ୟା କରିବା ପରେ ସଦ୍ଦାମ କର୍ଣ୍ଣାଟକର ବିଜାପୁରରେ ରହୁଥିବା ତାଙ୍କ ଜେଜେମା’ଙ୍କୁ କହିଥିଲେ ଯେ ଅଜଣା ରୋଗ ଯୋଗୁଁ ମୁସ୍କାନଙ୍କର ମୃତ୍ୟୁ ଘଟିଛି। ଆଉ ସଦ୍ଦାମ, ମୁସ୍କାନଙ୍କ ଶବକୁ ଗାୟବ କରିବା ପାଇଁ ଆମ୍ବୁଲାନ୍ସ ବୁକ୍ କରିଥିଲେ। ଏହି ସମୟରେ ମୁସ୍କାନଙ୍କ ବନ୍ଧୁ ତାଙ୍କ ଫ୍ଲାଟକୁ ଆସିଥିଲେ। ପ୍ରକୃତରେ ମୁସ୍କାନଙ୍କ ବନ୍ଧୁ ଅନେକ ଥର କଲ କରିଥିଲେ, କିନ୍ତୁ ମୁସ୍କାନ କୌଣସି ଉତ୍ତର ନ ଦେବାରୁ ସେ ତାଙ୍କ ଫ୍ଲାଟକୁ ଆସିଥିଲେ |

ମୁସ୍କାନଙ୍କ ପଡ଼ୋଶୀମାନେ ତାଙ୍କୁ କହିଥିଲେ ଯେ ମୁସ୍କାନ ମରିଯାଇଛନ୍ତି ଏବଂ ସଦ୍ଦାମ ତାଙ୍କ ଶବକୁ କର୍ଣ୍ଣାଟକକୁ ନେଇଛନ୍ତି। ଏହି ଘଟଣାକୁ ନେଇ ତାଙ୍କର ସନ୍ଦେହ ହୋଇଥିଲା ଏବଂ ତୁରନ୍ତ ମୁସ୍କାନଙ୍କ ହତ୍ୟା ବିଷୟରେ ପୁଲିସକୁ ସୂଚନା ଦେଇଥିଲେ। ସୂଚନା ପାଇବା ପରେ ସବ୍-ଇନ୍ସପେକ୍ଟର ରବିନ୍ଦ୍ର ପାଟିଲଙ୍କ ନେତୃତ୍ୱରେ ଏକ ପୁଲିସ ଟିମ୍ ଘଟଣାସ୍ଥଳରେ ପହଞ୍ଚି ସିସିଟିଭି ଫୁଟେଜ୍ ସ୍କାନ କରିବା ପରେ ଆମ୍ବୁଲାନ୍ସର ନମ୍ବର ଖୋଜିଥିଲେ। ଏହା ପରେ ପୁଲିସ ଆମ୍ବୁଲାନ୍ସର ମାଲିକଙ୍କ ସହ ଯୋଗାଯୋଗ କରିବାରୁ ଜଣାପଡିଥିଲା ଯେ ଆମ୍ବୁଲାନ୍ସଟି କର୍ଣ୍ଣାଟକ ଆଡକୁ ଯାଉଛି। ଏହା ପରେ ପୁଲିସ ଆମ୍ବୁଲାନ୍ସର ପିଛା କରି ପୁଣେରୁ ସଦ୍ଦାମଙ୍କୁ ଗିରଫ କରିଥିଲା।