ଜରୁରୀ ବୈଠକ ଡକାଇଲେ ଉଦ୍ଧବ; ହୋଇପାରେ କିଛି କଠୋର ନିଷ୍ପତ୍ତି

ମୁମ୍ବାଇ: ଗୌହାଟୀରେ ଏକନାଥ ସିନ୍ଦେଙ୍କ ନେତୃତ୍ୱରେ ବିଦ୍ରୋହୀ ଶିବିରରେ ଅଧିକ ଶିବସେନା ବିଧାୟକ ଯୋଗ ଦେବାକୁ ଆରମ୍ଭ କରିଥିବା ବେଳେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏକ ଜରୁରୀ ବୈଠକ ଡାକିଛନ୍ତି। ବୈଠକରେ ମୁଖ୍ୟମନ୍ତ୍ରୀ ଉଦ୍ଧବ ଠାକରେ କିଛି କଠୋର ନିଷ୍ପତ୍ତି ନେଇ ପାରନ୍ତ ବୋଲି ଆଶା କରାଯାଉଛି।
ଶିବସେନାର ମୁଖ୍ୟ ମୁଖପାତ୍ର ସଞ୍ଜୟ ରାଉତ କହିଛନ୍ତି, ଆମେ ମହାରାଷ୍ଟ୍ରର ଏମଭିଏ (ମହା ବିକାଶ ଅଘାଡି) ସରକାରରୁ ବାହାରି ଯିବାକୁ ପ୍ରସ୍ତୁତ ଅଛୁ; କିନ୍ତୁ ଦଳର ବିଦ୍ରୋହୀମାନେ ୨୪ ଘଣ୍ଟା ମଧ୍ୟରେ ଗୁଆହାଟୀରୁ ମୁମ୍ବାଇ ଫେରିବା ଆବଶ୍ୟକ।

ଶ୍ରୀ ରାଉତ କହିଛନ୍ତି ଯେ ବିଧାୟକମାନେ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସହ ଏହି ପ୍ରସଙ୍ଗରେ ଆଲୋଚନା କରିବା ଉଚତ୍‌।

ଅନ୍ୟପକ୍ଷରେ ଆଭ୍ୟନ୍ତରୀଣ ବୈଠକ କରିବା ପରେ ଶିବସେନାର ମିଳିତ ସହଯୋଗୀ ଥିବା କଂଗ୍ରେସ ଏବଂ ଏନ୍‌ସିପି କହିଛନ୍ତି ଯେ ସେମାନେ ଶ୍ରୀ ଠାକରେଙ୍କ ସହ ଅଛନ୍ତି। ଆମେ ଏକାଠି ଲଢିବୁ। ଏମଭିଏ ଏକାଠି ରହିବ ବୋଲି ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖାର୍ଗେ କହିଛନ୍ତି।

ପ୍ରାୟ ୪୧ ଜଣ ବିଧାୟକଙ୍କ ସହ ଗୁଆହାଟୀରେ କ୍ୟାମ୍ପ କରୁଥିବା ଏକନାଥ ସିନ୍ଦେ କଂଗ୍ରେସ ଏବଂ ଏନସିପି ସହିତ ସେନାର ମେଣ୍ଟ ଭାଙ୍ଗିବାକୁ ଦାବି କରି କହିଛନ୍ତି ଯେ ଗତ ଅଢ଼େଇ ବର୍ଷ ମଧ୍ୟରେ ସେନା ନେତାମାନେ ସର୍ବାଧିକ କ୍ଷତିଗ୍ରସ୍ତ ହୋଇଛନ୍ତି।

ମହାରାଷ୍ଟ୍ରରେ ଆଉ ଏକ ଅପରେସନ୍‌ ଲୋଟସ୍‌ କରିଥିବା ଅଭିଯୋଗରେ ବିଜେପି କହିଛି ଯେ ମହାରାଷ୍ଟ୍ରର ରାଜନୈତିକ ସଙ୍କଟ ହେଉଛି ଶିବସେନାର ଆଭ୍ୟନ୍ତରୀଣ ପ୍ରସଙ୍ଗ। ଆମେ ଏକନାଥ ସିନ୍ଦେଙ୍କ ସହ କଥା ହୋଇନାହୁଁ। ଏହା ସହିତ ବିଜେପିର କୌଣସି ସମ୍ପର୍କ ନାହିଁ।