ସିଦ୍ଦିକିଙ୍କୁ ହତ୍ୟା କରିବା ପରେ ଫେରାର ନହୋଇ ଏହି କାମ କରିଥିଲା ମୁଖ୍ୟ ଅଭିଯୁକ୍ତ

ମୁମ୍ବାଇ: ମହାରାଷ୍ଟ୍ରର ରାଜନେତା ବାବା ସିଦ୍ଦିକିଙ୍କ ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ ଶିବ କୁମାର ଗୌତମଙ୍କୁ ରବିବାର ଉତ୍ତରପ୍ରଦେଶର ବାହରାଇଚରୁ ଗିରଫ କରାଯାଇଥିଲା। ଗିରଫ ପରେ ସେ ଅନେକ ଅଜଣା ତଥ୍ୟ ପ୍ରକାଶ କରିଛି | ପଚରାଉଚରା ବେଳେ ଅଭିଯୁକ୍ତ ହତ୍ୟାକାଣ୍ଡ ପରେ କ'ଣ କରିଥିଲା, ତାହା ପୁଲିସକୁ ଜଣାଇଛି | ଏହା ମଧ୍ୟ କହିଛି ଯେ, ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇ, ବାବା ସିଦ୍ଦିକି ଓ ତାଙ୍କ ପୁଅ ଜିଶାନ୍ ସିଦ୍ଦିକିଙ୍କ ମଧ୍ୟରୁ ଯିଏ ଆଗ ଅଫିସ ବାହାରକୁ ଆସିବା ତାକୁ ହତ୍ୟା କରିବାକୁ ସୁପାରୀ ଦେଇଥିଲା |

ଅକ୍ଟୋବର ୧୨ରେ ମୁମ୍ବାଇରେ ଥିବା ଜିଶାନ ସିଦ୍ଦିକିଙ୍କ କାର୍ଯ୍ୟାଳୟ ବାହାରେ ବାବା ସିଦ୍ଦିକଙ୍କୁ ହତ୍ୟା କରିଥିଲେ ହରିୟାଣାର ବାସିନ୍ଦା ଗୁରନେଲ ସିଂ, ଉତ୍ତରପ୍ରଦେଶର ଧର୍ମରାଜ କଶ୍ୟପ ଓ ଶିବ କୁମାର। ଏହି ଘଟଣା ପରେ ଗୁରନେଲ ସିଂ ଏବଂ ଧର୍ମରାଜ କଶ୍ୟପଙ୍କୁ ଗିରଫ କରାଯାଇଥିବା ବେଳେ ଖସି ପଳାଇଥିଲା ଶିବ କୁମାର | କିଭଳି ସେ ଖସି ପଳାଇବାକୁ ସଫଳ ହେଲା ତାହା ପୁଲିସକୁ ଜଣାଇଛି ଶିବ | ଅଭିଯୁକ୍ତର କହିବା ମୁତାବକ, "ଗୁଳି ମାରିବା ପରେ ମୁଁ ତୁରନ୍ତ ମୋ ପୋଷାକ ବଦଳାଇଦେଇଥିଲି | ଏଥିପାଇଁ ମୋତେ କେହି ଜାଣି ପାରିଲେ ନାହିଁ | ଏଥିପାଇଁ ମୁଁ କିଛି ସମୟ ଘଟଣାସ୍ଥଳରେ ରହିବା ପରେ ସେଠାରୁ ଚାଲିଆସିଥିଲି |"