ସୋନିଆଙ୍କୁ ଭେଟିଲେ ଦିଦି, କଂଗ୍ରେସ ଅଧ୍ୟକ୍ଷାଙ୍କୁ ପ୍ରଶଂସାରେ ପୋତିଲେ ମମତା ବାନାର୍ଜୀ

ନୂଆଦିଲ୍ଲୀ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି ତାଙ୍କର ପାଞ୍ଚ ଦିନିଆ ଦିଲ୍ଲୀ ଗସ୍ତର ତୃତୀୟ ଦିନରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଛନ୍ତି। ତେବେ ମମତା ସୋନିଆଙ୍କୁ ଏମିତି ସମୟରେ ଭେଟିଛନ୍ତି ଯେତେବେଳେ ବିରୋଧୀ ଦଳର ଏକତା ଉପରେ ନିରନ୍ତର ଆଲୋଚନା ଚାଲିଛି | ପେଗାସସ୍, କୃଷି ଆଇନ ଏବଂ ମୁଦ୍ରାସ୍ଫୀତି ପ୍ରସଙ୍ଗରେ ସଂସଦ ଅଚଳ ଥିବାବେଳେ ଆଜି ସୋନିଆ ଗାନ୍ଧୀଙ୍କୁ ଭେଟିବା ପୂର୍ବରୁ ମମତା ବିରୋଧୀ ଦଳମାନଙ୍କୁ ଏକଜୁଟ ହେବାକୁ ନିବେଦନ କରିଛନ୍ତି।

Photo-abp news

ସେ କହିଛନ୍ତି ଯେ ସୋନିଆ ଗାନ୍ଧୀ ବିରୋଧୀ ଦଳର ଏକତା ଚାହୁଁଛନ୍ତି। ଆଞ୍ଚଳିକ ଦଳ ଉପରେ କଂଗ୍ରେସର ବିଶ୍ୱାସ ରହିଛି। ମମତା ଆହୁରି କହିଛନ୍ତି ଯେ ଯଦି ସମସ୍ତ ଆଞ୍ଚଳିକ ଦଳ ଏକାଠି ହୁଅନ୍ତି, ତେବେ ଗୋଟିଏ ଦଳ(ବିଜେପି) ପରାଜିତ ହେବ | ସେ କହିଛନ୍ତି ଯେ ମୁଁ ସୋନିଆ ଗାନ୍ଧୀ ଏବଂ ଅରବିନ୍ଦ କେଜ୍ରିୱାଲଙ୍କୁ ଭେଟିଛି। ଗତକାଲି ଲାଲୁ ଯାଦବଙ୍କ ସହ ଫୋନରେ କଥା ହୋଇଥିଲି । ଆମେ ପ୍ରତିଦିନ କଥାବାର୍ତ୍ତା କରୁଛୁ | ଆହୁରି ତିନି ବର୍ଷ ବାକି ଅଛି | ଆମେ ଆଲୋଚନା କରୁଛୁ |

ସେ କହିଛନ୍ତି, "ମୋର ସମସ୍ତଙ୍କ ପ୍ରତି ସମ୍ମାନ ଅଛି। ସୋନିଆ ଗାନ୍ଧୀ ବିରୋଧୀଙ୍କ ଏକତା ଚାହୁଁଛନ୍ତି।" ଏହା ସହିତ ସେ କହିଛନ୍ତି, ଦେଶ ନରେନ୍ଦ୍ର ମୋଦୀଙ୍କ ସହିତ ପ୍ରତିଦ୍ୱନ୍ଦ୍ୱିତା କରିବ। ଗଣତନ୍ତ୍ରକୁ ବଞ୍ଚାଇବା ପାଇଁ ଏକ ନୂଆ ଚେହେରା ଆସିବ |