ପ୍ରତିଦିନ ୯୦ଟି ଦୁଷ୍କର୍ମ ହେଉଛି! ମୋଦୀଙ୍କୁ ଚିଠି ଲେଖି ଏହା ଜଣାଇଲେ ମମତା

କୋଲକାତା: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦେଶରେ ମହିଳାଙ୍କ ପ୍ରତି ହେଉଥିବା ହିଂସା ସମ୍ପର୍କରେ ଏକ ଚିଠି ଲେଖିଛନ୍ତି। ଏହି ଚିଠି ମାଧ୍ୟମରେ ସେ ଦୁଷ୍କର୍ମ ବିରୋଧରେ କଠୋର ଆଇନ ଆଣିବାକୁ ଦାବି କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ମୁଖ୍ୟ ପରାମର୍ଶଦାତା ଆଲାପନା ବନ୍ଦୋପାଧ୍ୟାୟ ଏହି ବିଷୟରେ ସୂଚନା ଦେଇଛନ୍ତି। ମମତା ବାନାର୍ଜୀ ତାଙ୍କ ଚିଠିରେ ଲେଖିଛନ୍ତି, "ସାରା ଦେଶରେ ଦୁଷ୍କର୍ମ ମାମଲା କ୍ରମାଗତ ଭାବେ ବୃଦ୍ଧି ପାଉଛି ଏବଂ ଉପଲବ୍ଧ ତଥ୍ୟ ଅନୁଯାୟୀ, ଅନେକ କ୍ଷେତ୍ରରେ ଦୁଷ୍କର୍ମ ସହିତ ହତ୍ୟା ମଧ୍ୟ କରାଯାଏ। ଦେଶରେ ପ୍ରତିଦିନ ୯୦ଟି ଦୁଷ୍କର୍ମ ମାମଲା ହେଉଛି, ଯାହାଦ୍ୱାରା ଦେଶର ବିଶ୍ୱାସ ଓ ବିବେକକୁ ଏହା ଦୋହଲାଇଦେଉଛି |

ଏହାକୁ ଶେଷ କରିବା ଆମର କର୍ତ୍ତବ୍ୟ ଯାହା ଦ୍ୱାରା ମହିଳାମାନେ ନିରାପଦ ଅନୁଭବ କରିବେ। ମମତା ବାନାର୍ଜୀ ଲେଖିଛନ୍ତି, "ଏପରି ଜଘନ୍ୟ ଅପରାଧ ସହ ଜଡିତ ବ୍ୟକ୍ତିଙ୍କ ବିରୋଧରେ କଠୋର ଦଣ୍ଡବିଧାନର ବ୍ୟବସ୍ଥା ସହିତ ଏକ ଗୁରୁତର ତଥା ସମ୍ବେଦନଶୀଳ ପ୍ରସଙ୍ଗକୁ ବ୍ୟାପକ ଭାବରେ ସମାଧାନ କରାଯିବା ଆବଶ୍ୟକ। ଏଭଳି ମାମଲାରେ ଶୀଘ୍ର ନ୍ୟାୟ ପାଇବା ପାଇଁ ଏକ ଫାଷ୍ଟ-ଟ୍ରାକ୍ ପ୍ରତିଷ୍ଠା ପ୍ରସ୍ତାବିତ ଆଇନରେ ମଧ୍ୟ ଏହାକୁ ବିଚାର କରାଯିବା ଉଚିତ୍। " ପ୍ରଧାନମନ୍ତ୍ରୀଙ୍କୁ ଲେଖିଥିବା ଚିଠିରେ ମମତା ବାନାର୍ଜୀ ତିନୋଟି ଦାବି କରିଛନ୍ତି। ପ୍ରଥମ ଦାବିରେ ସେ ଲେଖିଛନ୍ତି ଯେ ଏପରି ଘୃଣ୍ୟ ତଥା ନିଷ୍ଠୁର ଅପରାଧକୁ ରୋକିବା ପାଇଁ କଠୋର ଆଇନ ଆବଶ୍ୟକ | ଦ୍ୱିତୀୟ ଦାବି ମୁତାବକ ଫାଷ୍ଟ ଟ୍ରାକ କୋର୍ଟରେ ଶୀଘ୍ର ଶୁଣାଣି କରିବା ଉଚିତ୍ | ତୃତୀୟ ଦାବିରେ ଟ୍ରାଏଲ ୧୫ ଦିନ ମଧ୍ୟରେ ଶେଷ କରିବାକୁ ପଡିବ |