ସମସ୍ତ ଦଳୀୟ ପଦବୀରୁ ପୁତୁରାଙ୍କୁ ହଟାଇ ମାୟାବତୀ ଦେଲେ ଏଭଳି ପ୍ରତିକ୍ରିୟା

ନୂଆଦିଲ୍ଲୀ: ଉତ୍ତରପ୍ରଦେଶ ପୂର୍ବତନ ମୁଖ୍ୟମନ୍ତ୍ରୀ ଏବଂ ବହୁଜନ ସମାଜ ପାର୍ଟି (ବିଏସପି) ମୁଖ୍ୟ ମାୟାବତୀ ପୁଣି ଥରେ ପୁତୁରା ଆକାଶ ଆନନ୍ଦଙ୍କଠାରୁ ତାଙ୍କ ଉତ୍ତରାଧିକାରୀ ଛଡ଼ାଇ ନେଇଛନ୍ତି ଏବଂ ତାଙ୍କୁ ସମସ୍ତ ଦଳୀୟ ପଦବୀରୁ ହଟାଇ ଦେଇଛନ୍ତି। 

ଏହି ନିଷ୍ପତ୍ତି ପରେ ଦୁଇଜଣ ନୂତନ ଜାତୀୟ ସଂଯୋଜକଙ୍କୁ ନିଯୁକ୍ତ କରାଯାଇଛି। ଆକାଶଙ୍କ ସ୍ଥାନରେ ତାଙ୍କ ପିତା ତଥା ପୂର୍ବତନ ବିଏସପି ମହାସଚିବ ଆନନ୍ଦ କୁମାର ଏବଂ ସାଂସଦ (ରାଜ୍ୟସଭା) ରାମଜୀ ଗୌତମଙ୍କୁ ଜାତୀୟ ସଂଯୋଜକ କରାଯାଇଛି। 

ପୁତୁରାଙ୍କ ଉତ୍ତରାଧିକାରୀ ଛଡ଼ାଇ ନେବା ସହିତ ଏବଂ ତାଙ୍କୁ ସମସ୍ତ ଦଳୀୟ ପଦବୀରୁ ହଟାଇ ଦେବା ଘଟଣାକୁ ନେଇ ମାୟାବତୀ କହିଛନ୍ତି, ‘ ମୁଁ ନିଜେ ଏହି ନିଷ୍ପତ୍ତି ନେଇଛି ଯେ ଯେପର୍ଯ୍ୟନ୍ତ ମୁଁ ଜୀବିତ ଅଛି, ଯେପର୍ଯ୍ୟନ୍ତ ମୋର ଶେଷ ନିଶ୍ୱାସ ଚାଲିଛି ଦଳରେ ମୋର କୌଣସି ଉତ୍ତରାଧିକାରୀ ରହିବେ ନାହିଁ।  ଏମିତି କି ଭାଇ ଆନନ୍ଦଙ୍କ ପିଲାମାନେ ରାଜନୀତି ସହିତ ଜଡିତ ପରିବାରରେ ବିବାହ ବି କରିବେ ନାହିଁ।

ମାୟାବତୀ ରବିବାର ଲକ୍ଷ୍ନୌରେ ବିଏସପିର ଏକ ବୈଠକ ଡାକିଥିଲେ। ଏଥିରେ ଅନେକ ରାଜ୍ୟର ଦଳର ରାଜ୍ୟ ସଭାପତିମାନେ ମଧ୍ୟ ଅଂଶଗ୍ରହଣ କରିଥିଲେ। ବିଏସପି ମୁଖ୍ୟ ଦଳର ବର୍ତ୍ତମାନର ସ୍ଥିତି ଏବଂ ଭବିଷ୍ୟତରେ ଏହାକୁ ମଜବୁତ କରିବାର ଲକ୍ଷ୍ୟ ବିଷୟରେ ଦଳୀୟ ପଦାଧିକାରୀଙ୍କ ସହ ସମୀକ୍ଷା ଏବଂ ଆଲୋଚନା କରିଥିଲେ। ଏହି ସମୟରେ ଅନେକ ବଡ଼ ନିଷ୍ପତ୍ତି ନିଆଯାଇଥିଲା।

ମାୟାବତୀଙ୍କ ନିଷ୍ପତ୍ତି ଲୋକଙ୍କୁ ଆଶ୍ଚର୍ଯ୍ୟ କରିଥିଲା। ସକାଳ ପ୍ରାୟ ୧୧ଟାରେ ଆରମ୍ଭ ହୋଇଥିବା ଏହି ବୈଠକରେ ବିଏସପି ସୁପ୍ରିମୋ ମାୟାବତୀଙ୍କ ବ୍ୟତୀତ ଦଳର ନେତା ଏବଂ ତାଙ୍କ ଭାଇ ଆନନ୍ଦ, ଇତ୍ୟାଦି ଉପସ୍ଥିତ ଥିଲେ। ଏହି ସମୟରେ ମାୟାବତୀଙ୍କ ପୁତୁରା ଆକାଶ ଆନନ୍ଦଙ୍କୁ ଦେଖିବାକୁ ମିଳି ନଥିଲା। 

୨୦୨୨ ୟୁପି ବିଧାନସଭା ନିର୍ବାଚନରେ ଆକାଶ ଆନନ୍ଦଙ୍କୁ ମୟାବତୀ ଏକ ବଡ଼ ଦାୟିତ୍ୱ ଦେଇଥିଲେ। ଡିସେମ୍ବର ୧୦, ୨୦୨୩ରେ ସେ ଆକାଶ ଆନନ୍ଦଙ୍କୁ ତାଙ୍କର ଉତ୍ତରାଧିକାରୀ ଭାବରେ ଘୋଷଣା କରିଥିଲେ। ଗତ ବର୍ଷ ମେ ମାସରେ, ଲୋକସଭା ନିର୍ବାଚନ ସମୟରେ ଏକ ବିବାଦୀୟ ଭାଷଣ ଦେବା ପରେ, ସେ ଆକାଶଙ୍କୁ ଅପରିପକ୍ୱ ବୋଲି କହି ତାଙ୍କୁ ସମସ୍ତ ପଦବୀରୁ ବହିଷ୍କାର କରିଥିଲେ। 
କିଛି ଦିନ ପରେ  ଜୁନ୍ ୨୩ ତାରିଖରେ ଏକ ବିଏସପି ବୈଠକରେ ମାୟାବତୀ ପୁଣି ଥରେ ଆକାଶ ଆନନ୍ଦଙ୍କୁ ଜାତୀୟ ସଂଯୋଜକ ଭାବରେ ନିଯୁକ୍ତି ଘୋଷଣା କଲେ। ଏହାପରେ ଆକାଶଙ୍କୁ ମାୟାବତୀଙ୍କ ଉତ୍ତରାଧିକାରୀ ବୋଲି କୁହାଯାଉଥିଲା।