“ତଥ୍ୟକୁ ଭୁଲଭାବେ ଉପସ୍ଥାପନ କରୁଛ”, ରାହୁଲ ଗାନ୍ଧୀଙ୍କୁ ବୈଦେଶିକ ମନ୍ତ୍ରାଳୟର ଜବାବ

ନୂଆଦିଲ୍ଲୀ : ଅପରେସନ ସିନ୍ଦୁର ସଂପର୍କରେ ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ପାକିସ୍ତାନକୁ ଆଗୁଆ ସୂଚନା ଦେଇଥିବା ରାହୁଲ ଗାନ୍ଧି ଓ କଂଗ୍ରେସ ଅଭିଯୋଗ ଆଣି ତାଙ୍କ ଇସ୍ତଫା ଦାବି କରିଛି । ଏବେ ବୈଦେଶିକ ମନ୍ତ୍ରାଳୟ ଏହାର ଜବାବ ଦେଇଛି । ମନ୍ତ୍ରାଳୟ କହିଛି ଯେ ତଥ୍ୟଗୁଡ଼ିକୁ ସମ୍ପୂର୍ଣ୍ଣ ଭୁଲ ଭାବରେ ଉପସ୍ଥାପନ କରାଯାଉଛି।

ଗଣମାଧ୍ୟମକୁ ବୈଦେଶିକ ମନ୍ତ୍ରଣାଳୟ କହିଛି ଯେ "ବୈଦେଶିକ ମନ୍ତ୍ରୀ ଡକ୍ଟର ଏସ୍ ଜୟଶଙ୍କର କହିଥିଲେ ଯେ ଆମେ ଆରମ୍ଭରୁ ହିଁ ପାକିସ୍ତାନକୁ ଚେତାବନୀ ଦେଇଥିଲୁ, ଯାହା ସ୍ପଷ୍ଟ ଭାବରେ ଅପରେସନ ସିନ୍ଦୁର ଆରମ୍ଭ ହେବା ପରେ ପ୍ରାରମ୍ଭିକ ପର୍ଯ୍ୟାୟ। ଏହାକୁ ଅପରେସନ ସିନ୍ଦୁର ଆରମ୍ଭ ହେବା ପୂର୍ବରୁ ଭୁଲ ଭାବରେ ବର୍ଣ୍ଣନା କରାଯାଉଛି। ତଥ୍ୟଗୁଡ଼ିକୁ ସମ୍ପୂର୍ଣ୍ଣ ଭୁଲ ଭାବରେ ଉପସ୍ଥାପନ କରାଯାଉଛି।"

ଆଜି ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି  ଏକ୍ସରେ ଲେଖିଥିଲେ ଯେ ଆକ୍ରମଣ ପୂର୍ବରୁ ସରକାର ପାକିସ୍ତାନକୁ କାହିଁକି ସୂଚନା ଦେଇଥିଲେ? ଏଥିପାଇଁ ଆମେ କେତେ ଯୁଦ୍ଧଜାହାଜ ହରାଇଲୁ? ତେବେ ଏହାର ଜବାବରେ ସରକାର ପତ୍ର ସୂଚନା କାର୍ଯ୍ୟାଳୟ( ପିଆଇବି) କହିଥିଲା ଯେ ବୈଦେଶିକ ମନ୍ତ୍ରୀଙ୍କ ଭୁଲ ଉଦ୍ଧୃତି ଦିଆଯାଉଛି ଏବଂ ସେ ଏହି ବୟାନ ଦେଇନାହାଁନ୍ତି ।