ରାଜସ୍ଥାନରେ ବାୟୁସେନାର ମିଗ-୨୧ ବିମାନ ଦୁର୍ଘଟଣାଗ୍ରସ୍ତ, ୨ ପାଇଲଟ ମୃତ

ନୂଆଦିଲ୍ଲୀ : ରାଜସ୍ଥାନରେ ବାରମେରରେ ଆଜି ଭାରତୀୟ ବାୟୁସେନାର ଏକ ମିଗ-୨୧ ବିସନ ଲଢୁଆ ବିମାନ ଦୁର୍ଘଟଣାଗ୍ରସ୍ତ ହୋଇଛି । ବିମାନରେ ଥିବା ଦୁଇ ଜଣ ପାଇଲଟ ଘଟଣାସ୍ଥଳରେ ମୃତ୍ୟୁବରଣ କରିଥିବା ସୂଚନା ମିଳିଛି । ପାଇଲଟ ଦ୍ବୟଙ୍କ ମୃତ୍ୟୁ ସଂପର୍କରେ ଜିଲ୍ଲାପାଳ ଲୋକବନ୍ଧୁ ଯାଦବ ସ୍ପଷ୍ଟ କରିଥିବା ଜଣାଯାଇଛି ।

ବିମାନଟି ରାତି ୯ଟା ବେଳେ ବାରମେର ଉପରେ ଉଡ଼ୁଥିବାବେଳେ ଭାମରା ଗ୍ରାମ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ପ୍ରାୟ ଅଧ କିଲୋମିଟର ଅଂଚଳରେ ବିମାନର ବିଭିନ୍ନ ଅଂଶ ପଡ଼ିରହିଥିଲା । ବିମାନର ମୁଖ୍ୟ ଅଂଶ ଏକ ଜମିରେ ପଡ଼ିଥିଲା ଓ ତାହାର ନିଆଁ ବହୁ ଦୂରକୁ ଦେଖାଯାଉଥିଲା ।
ଭାରତୀୟ ବାୟୁସେନା ପକ୍ଷରୁ ଏପର୍ଯ୍ୟନ୍ତ ଏହି ଦୁର୍ଘଟଣା ସଂପର୍କରେ କୌଣସି ଘୋଷଣା କରାଯାଇନାହିଁ ।

ପ୍ରତ୍ୟକ୍ଷଦର୍ଶୀମାନେ କହିଛନ୍ତି, ରାତି ୯ଟାବେଳେ ଗ୍ରାମବାସୀମାନେ ଏକ ଭୟଙ୍କର ବିସ୍ଫୋରଣ ଶୁଣିବାକୁ ପାଇଥିଲେ । ଏ ସଂପର୍କରେ ସେମାନେ ସ୍ଥାନୀୟ ପ୍ରଶାସନକୁ ସୂଚନା ଦେଇଥିଲେ ।