ନୀତୀଶ ମୁଖ୍ୟମନ୍ତ୍ରୀ ହେଲେ ବି ତେଜସ୍ୱୀଙ୍କର ରହିବ ଦବଦବା: ଜେଡିୟୁରୁ ୧୩, ଆରଜେଡିରୁ ହୋଇପାରନ୍ତି ୧୬ ଜଣ ମନ୍ତ୍ରୀ

ପାଟନା: ମଙ୍ଗଳବାର ବିଜେପି ସହ ମେଣ୍ଟ ଭାଙ୍ଗି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ ଜେଡି(ୟୁ) ନେତା ନୀତୀଶ କୁମାର। ବିଜେପି ହାତ ଛାଡ଼ି ଏବେ ପୁରୁଣା ସାଥୀ ଆରଜେଡି ହାତ ଧରିଛନ୍ତି ନୀତୀଶ। ଆରଜେଡି ସହ ମେଣ୍ଟ କରି ବୁଧବାର ବିହାରର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ନୀତୀଶ। ତେବେ ଶପଥ ଗ୍ରହଣ ପରେ ମନ୍ତ୍ରିମଣ୍ଡଳର ରୂପରେଖ କଣ ହେବ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି | ନୀତୀଶ କୁମାରଙ୍କ ନୂତନ ମନ୍ତ୍ରିମଣ୍ଡଳରେ ସର୍ବାଧିକ ୩୫ ଜଣ ବିଧାୟକ ମନ୍ତ୍ରୀ ହୋଇପାରନ୍ତି । ନୀତୀଶ କୁମାରଙ୍କ ନୂତନ ମନ୍ତ୍ରିମଣ୍ଡଳରେ ଆରଜେଡିରେ ସର୍ବାଧିକ ସଂଖ୍ୟକ ମନ୍ତ୍ରୀ ରହିବେ ବୋଲି କୁହାଯାଉଛି। କେଉଁ ଦଳରୁ କେତେ ବିଧାୟକ କେତେ ଜଣ ମନ୍ତ୍ରୀ ହେବେ ସେନେଇ ସ୍ପଷ୍ଟ ସୂଚନା ମିଳିନଥିଲେ ବି ପାୱାର ସେୟାରିଂ ଫର୍ମୁଲା ସ୍ଥିର ହୋଇଛି।

ବିହାରରେ ମୋଟ ବିଧାୟକଙ୍କ ସଂଖ୍ୟା ୨୪୩ ହୋଇଥିବାବେଳେ ସେଥିମଧ୍ୟରୁ ୧୬୪ ଜଣ ବିଧାୟକ ନୀତୀଶ କୁମାରଙ୍କୁ ସମର୍ଥନ କରୁଛନ୍ତି । ଯଦିଓ ବାମ ଦଳ ସରକାରରେ ଯୋଗ ନଦେବାକୁ ନିଷ୍ପତ୍ତି ନେଇଛି, ସେମାନେ ବାହାରୁ ଗଠବନ୍ଧନକୁ ସମର୍ଥନ କରିବେ। ଏଭଳି ପରିସ୍ଥିତିରେ କେବଳ ୧୪୩ ଜଣ ବିଧାୟକ ସିଧାସଳଖ ସରକାରଙ୍କ ଅଂଶ ହେବେ। ଏଥିମଧ୍ୟରୁ ସର୍ବାଧିକ ୩୫ ଜଣ ମନ୍ତ୍ରୀ ହୋଇପାରିବେ। ଅର୍ଥାତ ୪ ଜଣ ବିଧାୟକଙ୍କ ମଧ୍ୟରୁ ଜଣେ ବିଧାୟକ ମନ୍ତ୍ରୀ ହୋଇପାରିବେ |

ସୂତ୍ର ଅନୁଯାୟୀ, ଲାଲୁ ପ୍ରସାଦ ଯାଦବଙ୍କ ଆରଜେଡି ବିହାର ବିଧାନସଭାର ସବୁଠାରୁ ବଡ ଦଳ। ତେଣୁ ଆରଜେଡି କୋଟାରୁ ସର୍ବାଧିକ ୧୬ ଜଣ ମନ୍ତ୍ରୀ ହୋଇପାରନ୍ତି | ଏଥି ସହିତ, ଜେଡିୟୁ କୋଟାରୁ ୧୩ ଜଣ, କଂଗ୍ରେସରୁ ସର୍ବାଧିକ ଚାରିଜଣ, ଜିତନ ରାମ ମାଂଝୀଙ୍କ ଦଳ ହମରୁ ଜଣେ ମନ୍ତ୍ରୀ ହୋଇପାରନ୍ତି | ମୁଖ୍ୟମନ୍ତ୍ରୀ ନୀତୀଶ କୁମାର ସବୁଠାରୁ ଗୁରୁତ୍ୱପୂର୍ଣ୍ଣ ଗୃହ ବିଭାଗକୁ ନିଜ ପାଖରେ ରଖିବେ। ତେଜସ୍ୱୀ ଯାଦବଙ୍କୁ ଶିକ୍ଷା କିମ୍ବା ସଡ଼କ ନିର୍ମାଣ ଭଳି ଗୁରୁତ୍ୱପୂର୍ଣ୍ଣ ବିଭାଗ ଦିଆଯାଇପାରେ |