ଖଲିସ୍ତାନ ପ୍ରସଙ୍ଗ ଉଠାଇଲେ ମୋଦୀ, ଜବାବ ରଖିଲେ ଟ୍ରୁଡୋ

ନୂଆଦିଲ୍ଲୀ: ଦିଲ୍ଲୀରେ ଅନୁଷ୍ଠିତ ଜି-୨୦ ଶିଖର ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କୁ ଭେଟି ଦ୍ବିପାକ୍ଷିକ ସଂପର୍କ ଉପରେ ଆଲୋଚନା କରିଛନ୍ତି । ଏହି ଆଲୋଚନା ବେଳେ ମୋଦୀ ଖଲିସ୍ତାନୀ ଆତଙ୍କବାଦ ପ୍ରସଙ୍ଗ ଉଠାଇଥିଲେ ।

ଏହି ବୈଠକ ପରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଖାଲିସ୍ତାନ ଏବଂ ବିଦେଶୀ ହସ୍ତକ୍ଷେପ ପ୍ରସଙ୍ଗରେ କହିଛନ୍ତି, "ଉଭୟ ପ୍ରସଙ୍ଗ ଉଠିଛି। ବର୍ଷ ବର୍ଷ ଧରି ପ୍ରଧାନମନ୍ତ୍ରୀ ମୋଦୀଙ୍କ ସହ ଏହି ଦୁଇଟି ପ୍ରସଙ୍ଗରେ ଅନେକ ଆଲୋଚନା ହୋଇଛି। କାନାଡା ସର୍ବଦା ଅଭିବ୍ୟକ୍ତିର ସ୍ୱାଧୀନତା, ବିବେକର ସ୍ୱାଧୀନତା ଏବଂ ଶାନ୍ତିପୂର୍ଣ୍ଣ ପ୍ରତିବାଦ ସ୍ୱାଧୀନତାକୁ ସୁରକ୍ଷା ଦେଇଆସିଛି ଏବଂ ଏହା ଆମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।

ସେ ଆହୁରି ମଧ୍ୟ କହିଛନ୍ତି, ହିଂସା ରୋକିବା ଏବଂ ଘୃଣାକୁ ପଛକୁ ଠେଲିବାର ସମୟ ଆସିଛି। ମୁଁ ଭାବୁଛି ଏହି ସମୁଦାୟ ପ୍ରସଙ୍ଗରେ, ଏହା ମନେ ରଖିବା ଜରୁରୀ ଯେ କିଛି ଲୋକଙ୍କ କାର୍ଯ୍ୟ ସମଗ୍ର ସମ୍ପ୍ରଦାୟ କିମ୍ବା ସମଗ୍ର କାନାଡାର ପ୍ରତିନିଧିତ୍ୱ କରେ ନାହିଁ । ଏହାର ବିପରୀତ ଦିଗ ହେଉଛି ଆମେ ଆଇନର ଶାସନକୁ ସମ୍ମାନ ଦେବା ଉପରେ ବି ଗୁରୁତ୍ବ ଦେଇଥିଲୁ ଏବଂ ଆମେ ବିଦେଶୀ ହସ୍ତକ୍ଷେପ ବିଷୟରେ ମଧ୍ୟ ଆଲୋଚନା କରିଥିଲୁ।

ଅନ୍ୟପକ୍ଷରେ ମୋଦୀ ଏକ ଟୁଇଟ କରି ଲେଖିଛନ୍ତି, ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ସହ ଫଳପ୍ରଦ ବୈଠକ ହୋଇଛି ଏବଂ ଆମେ ବିଭିନ୍ନ କ୍ଷେତ୍ରରେ ଭାରତ-କାନାଡା ସମ୍ପର୍କର ସମ୍ପୂର୍ଣ୍ଣ ପରିସର ଉପରେ ଆଲୋଚନା କରିଛୁ ।