ଆପଣଙ୍କ ଭୋଟ ଦେଶର ଦିଗ ନିର୍ଣ୍ଣୟ କରିବ: ନୂତନ ଭୋଟରଙ୍କୁ ଏଭଳି କହିଲେ ମୋଦୀ

ନୂଆଦିଲ୍ଲୀ: ୨୦୨୪ ସାଧାରଣ ନିର୍ବାଚନ ପୂର୍ବରୁ ଭାରତୀୟ ଜନତା ପାର୍ଟି (ବିଜେପି) ନୂତନ ଯୁବ ଭୋଟରଙ୍କୁ ଆକର୍ଷିତ କରିବାକୁ ଚେଷ୍ଟା କରିଥିବାର ଦେଖିବାକୁ ମିଳିଛି | ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୫୦୦୦ ସ୍ଥାନରେ ଭିଡିଓ କନଫରେନସିଂ ମାଧ୍ୟମରେ ନୂତନ ଭୋଟରଙ୍କ ସହ ଯୋଗାଯୋଗ କରିଥିଲେ। ପ୍ରଧାନମନ୍ତ୍ରୀ ମୋଦୀ ଦେଶବାସୀଙ୍କୁ ଜାତୀୟ ଭୋଟର ଦିବସରେ ଅଭିନନ୍ଦନ ଜଣାଇବା ସହ କହିଛନ୍ତି ଯେ ଆଜି ଭାରତର ଜୀବନ୍ତ ଗଣତନ୍ତ୍ର ପାଳନ କରିବାର ଏକ ସୁଯୋଗ। ପ୍ରଧାନମନ୍ତ୍ରୀ ମୋଦୀ ଭୋଟରଙ୍କୁ ସମ୍ବୋଧିତ କରି କହିଛନ୍ତି ଯେ "ନୂତନ ଭୋଟରଙ୍କୁ ଅଭିବାଦନ ଜଣାଇବା ପାଇଁ ଏହା ଏକ କାର୍ଯ୍ୟକ୍ରମ। ତୁମମାନଙ୍କୁ ଏକାଠି ଏକ ଦାୟିତ୍ୱ ତୁଲାଇବାକୁ ପଡିବ |

ମୁଁ ଜାଣେ ଏହି ବୟସରେ କୌଣସି ନୂତନ ଆରମ୍ଭ ପାଇଁ ଉତ୍ସାହ ଅଛି | ତୁମର ନାମ ଭୋଟର ତାଲିକାରେ ପଂଜିକୃତ ହେବା ମାତ୍ରେ ତୁମେମାନେ ଗଣତନ୍ତ୍ର ପାଇଁ ଗୁରୁତ୍ୱପୂର୍ଣ୍ଣ ଅଂଶ ହୋଇସାରିଛ | ଆସନ୍ତାକାଲି ଦେଶ ଏହାର ୭୫ ତମ ଗଣତନ୍ତ୍ର ଦିବସ ପାଳନ କରିବ। ଆପଣଙ୍କ ସମସ୍ତଙ୍କର ଦାୟିତ୍ୱ ସବୁଠୁ ବଡ ହେବ। ୧୯୪୭ ପୂର୍ବରୁ ଭାରତର ଯୁବକମାନଙ୍କୁ ଦେଶକୁ ଯେଭଳି ସ୍ୱାଧୀନତା କରିବାର ଦାୟିତ୍ୱ ମିଳିଥିଲା ଠିକ ସେହିପରି ଏକ ବିକଶିତ ଭାରତ ଗଠନ କରିବାର ଦାୟିତ୍ୱ ଆପଣମାନଙ୍କର ଅଛି । ମନେରଖନ୍ତୁ, ଆପଣଙ୍କର ଗୋଟିଏ ଭୋଟ୍ ଭାରତର ବିକାଶର ଦିଗ ସ୍ଥିର କରିବ। ଆପଣଙ୍କର ଗୋଟିଏ ଭୋଟ୍ ଭାରତରେ ଏକ ସ୍ଥିର ସରକାର ଗଠନ କରିବ। ସେହିପରି ଏହି ବିଶେଷ କାର୍ଯ୍ୟକ୍ରମ ଅବସରରେ ବିଜେପି ପକ୍ଷରୁ ନିର୍ବାଚନ ପୂର୍ବରୁ ଏହାର ଥିମ୍ ଗୀତ ମଧ୍ୟ ପ୍ରକାଶ କରାଯାଇଛି ।