ରୁଷ ସେନା ଶିବିର ଉପରେ ୟୁକ୍ରେନର କ୍ଷେପଣାସ୍ତ୍ର ମାଡ଼ରେ ୮୯ ମୃତ, ସୈନିକଙ୍କ ମୋବାଇଲ ଫୋନକୁ ଦାୟୀ କଲା ରୁଷ୍

କିବ୍ : ଜାନୁଆରି ପହିଲାରେ ରୁଷ ଅଧିକୃତ ଡୋନେସ୍କ ରାଜ୍ୟର ରାଜଧାନୀ  ମାକିଭକାରେ ହୋଇଥିବା ୟୁକ୍ରେନର ଭୟଙ୍କର କ୍ଷେପଣାସ୍ତ୍ର ମାଡ଼ ଯୋଗୁଁ ମୃତ୍ୟୁବରଣ କରିଥିବା ରୁଷ ସୈନ୍ୟଙ୍କ ସଂଖ୍ୟା ୮୯ରେ ପହଞ୍ଚିଛି । ଏହି ଘଟଣା ସମଗ୍ର ରୁଷରେ ଆଲୋଡନ ଖେଳାଇ ଦେଇଛି ଓ ରୁଷ ଲୋକଙ୍କ ମଧ୍ୟରେ ଜନମତ ତେଜିବାରେ ଲାଗିଛି ।

ତେବେ ଏ ସଂପର୍କରେ ରୁଷର ମିଲିଟାରୀ ପକ୍ଷରୁ କୁହାଯାଇଛି ଯେ ରୁଷ ସୈନ୍ୟମାନେ ବେଆଇନ ଭାବେ ମୋବାଇଲ ଫୋନ ବ୍ୟବହାର କରୁଥିବାରୁ ଏପରି ଘଟଣା ଘଟିଲା । କୌଣସି ରୁଷ ସୈନ୍ୟଙ୍କ ମୋବାଇଲ ଫୋନକୁ ଟ୍ରାକ୍ କରି ୟୁକ୍ରେନ ପକ୍ଷରୁ ଏହି କ୍ଷେପଣାସ୍ତ୍ର ଆକ୍ରମଣ କରାଯାଇଥିଲା ବୋଲି ରୁଷ କହିଛି ।

ରବିବାର ଦିନ ହୋଇଥିବା ୟୁକ୍ରେନର କ୍ଷେପଣାସ୍ତ୍ରଟି ଏକ ରୁଷର ଏକ ଅସ୍ଥାୟୀ ସେନା ଶିବିର ଉପରେ ପଡ଼ିଥିଲା । ଫଳରେ ଏତେ ସଂଖ୍ୟକ ସୈନ୍ୟ ମୃତ୍ୟୁବରଣ କରିଛନ୍ତି । ରୁଷ ସୈନ୍ୟମାନେ ଏକ ୟୁକ୍ରେନୀୟ ବୈଷୟିକ କଲେଜକୁ ନିଜର ଅସ୍ଥାୟୀ ଶିବିର କରିଥିଲେ । ସେଠାରେ ହିଁ କ୍ଷେପଣାସ୍ତ୍ରଟି ମାଡ଼ କରିଥିଲା ।

ଅନ୍ୟପକ୍ଷରେ ବ୍ରିଟିଶ ଗୁଇନ୍ଦା ଅନୁସାରେ ଉକ୍ତ କଲେଜରେ ରୁଷ ପକ୍ଷରୁ ବିପୁଳ ପରିମାଣରେ ବିସ୍ଫୋରକ ରଖାଯାଇଥିଲା । ଏହି କାରଣରୁ ବିସ୍ଫୋରଣର ଆକାର ଏତେ ଭୟାନକ ହୋଇଯାଇଥିଲା ।

ଏହି ଘଟଣା ସଂପର୍କରେ ରୁଷ ରାଷ୍ଟ୍ରପତି ଭ୍ଲାଦମିର ପୁଟିନଙ୍କ ମତାମତ ଜଣାପଡ଼ିନାହିଁ ।