ଭାବି ଜ୍ବାଇଁ ସହ ଫେରାର ହୋଇଥିବା ଶାଶୁ ଜଣାଇଲେ କାରଣ

ଗୋଣ୍ଡା: ଉତ୍ତରପ୍ରଦେଶର ଗୋଣ୍ଡା ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ସମ୍ପର୍କର ମର୍ଯ୍ୟାଦାକୁ ଦୋହଲାଇ ଦେଇଛି। ଏଠାରେ, ଜଣେ ମହିଳା ନିଜ ଝିଅର ଭାବିସ୍ବାମୀଙ୍କ ସହ ପ୍ରେମରେ ପଡ଼ି ଘର ଛାଡି ଚାଲିଯାଇଥିଲେ ବୋଲି ଜଣାଯାଇଛି। ପୁଲିସ ୨୭ ଏପ୍ରିଲରେ ନିଖୋଜ ହୋଇଥିବା ଏହି ୪୪ ବର୍ଷୀୟ ମହିଳାଙ୍କୁ ବସ୍ତି ଜିଲ୍ଲାରୁ ଉଦ୍ଧାର କରି ତାଙ୍କ ସ୍ୱାମୀଙ୍କୁ ହସ୍ତାନ୍ତର କରିଛି।

ଏହି ଅଜବ ପ୍ରେମ କାହାଣୀ ଗୋଣ୍ଡା ଜିଲ୍ଲାରେ ଥିବା ଖୋଡାରେ ପୁଲିସ ଷ୍ଟେସନ ଅଞ୍ଚଳର। ଏଠାରେ, ଜଣେ ୪୪ ବର୍ଷୀୟ ମହିଳାଙ୍କ ଝିଅର ବିବାହ ବସ୍ତି ଜିଲ୍ଲାର ଦୁବୌଲିଆ ଥାନା ଅଞ୍ଚଳରେ ରହୁଥିବା ଜଣେ ଯୁବକଙ୍କ ସହିତ ସ୍ଥିର ହୋଇଥିଲା। କିଛି କାରଣରୁ, ଏହି ସମ୍ପର୍କ ଭାଙ୍ଗିଗଲା ଏବଂ ଦୁଇ ପରିବାର ମଧ୍ୟରେ ଯୋଗାଯୋଗ ମଧ୍ୟ ଶେଷ ହୋଇଗଲା। କିନ୍ତୁ ଏ ମଧ୍ୟରେ ମହିଳା, ଯୁବକଙ୍କ ସହିତ ଫୋନ୍‌ରେ କଥାବାର୍ତ୍ତା ଆରମ୍ଭ କରିଥିଲେ। ଏହା ପରେ ଦୁହିଁଙ୍କ ମଧ୍ୟରେ ସମ୍ପର୍କ ନିବିଡ଼ ହୋଇଥିଲା। ଏପ୍ରିଲ ୨୭ରେ ମହିଳା ଘର ଛାଡ଼ି ଯୁବକଙ୍କ ସହିତ ଫେରାର ହୋଇଯାଇଥିଲେ। ପରିବ‌ାର ଲୋକେ ଅନେକ ଖୋଜାଖୋଜି ପରେ ଖୋଡାରେ ପୁଲିସ ଷ୍ଟେସନରେ ଅଭିଯୋଗ କରିଥିଲେ। ପୁଲିସ ସିସିଟିଭି ଯାଞ୍ଚ କରିବା ସହିତ ମହିଳାଙ୍କୁ ଖୋଜିବାକୁ ତଦନ୍ତ ଆରମ୍ଭ କରିଥିଲା। ପୁଲିସ ଖୋଜୁଥିବା ଜାଣି ମହିଳାଜଣକ ଦୁବୌଲିଆ ଥାନାରେ ପହଞ୍ଚିଥିଲେ। ମହିଳା ନିଜର ପରିଚୟ ଦେବା ପରେ ଦୁବୌଲିଆ ଥାନା ପୁଲିସ, ଖୋଡାରେ ପୁଲିସ ଷ୍ଟେସନକୁ ଖବର ଦେଇଥିଲା ଏବଂ ମହିଳାଙ୍କୁ ନେଇ ଖୋଡାରେ ପୁଲିସ ଷ୍ଟେସନରେ ପହଞ୍ଚିଥିଲା।

ଏଭଳି ଯୁବକଙ୍କ ସହିତ ଫେରାର ହେବା ପଛର କାରଣ ପଚରାଯିବାରୁ ମହିଳାଜଣକ କହିଥିଲେ ଯେ, 'ମୋର ମାନସିକ ଅବସ୍ଥା ଭଲ ନଥିଲା।  ଏହି କାରଣରୁ ଯୁବକଙ୍କ ସହିତ ଚାଲିଯାଇଥିଲି। ଏବେ ମୁଁ ମୋ ସ୍ବାମୀଙ୍କ ସହିତ ରହିବାକୁ ଚାହୁଛି।' ଏହା ପରେ ମହିଳାଙ୍କୁ ତାଙ୍କ ସ୍ବାମୀଙ୍କ ସହିତ ଛାଡ଼ିଦିଆଯାଇଥିବା ଜଣାଯାଇଛି।