ଶିଖ ସଂଗଠନର ଆପତ୍ତି ପରେ ଏନସିଇଆରଟି ବହିରୁ ହଟିଲା ‘ଖଲିସ୍ତାନ’ ସଂପର୍କିତ ଲେଖା

ନୂଆଦିଲ୍ଲୀ : ଖାଲିସ୍ତାନକୁ ନେଇ କେନ୍ଦ୍ର ସରକାରଙ୍କ ପକ୍ଷରୁ ଏକ ବଡ ନିଷ୍ପତ୍ତି ନିଆଯାଇଛି । ଏନସିଇଆରଟି ପକ୍ଷରୁ ଜାରି ବିବୃତି ଅନୁଯାୟୀ ଦ୍ୱାଦଶ ଶ୍ରେଣୀ ବହିରୁ ଖଲିସ୍ତାନର ଉଲ୍ଲେଖ ହଟାଇ ଦିଆଯାଇଛି । ଶିରୋମଣି ଗୁରୁଦ୍ୱାର ପ୍ରବନ୍ଧକ କମିଟି ପକ୍ଷରୁ ଲେଖାଯାଇଥିବା ଏକ ଚିଠି ପରେ ଏହି ନିଷ୍ପତ୍ତି ନିଆଯାଇଛି। ବାସ୍ତବରେ, ଗତ ମାସରେ ଗୁରୁଦ୍ୱାର କମିଟି ଏନସିଇଆରଟିକୁ ଏକ ଚିଠି ଲେଖି ଖାଲିସ୍ତାନର ଉଲ୍ଲେଖ ହଟାଇବାକୁ ଦାବି କରିଥିଲା ।

ବିଦ୍ୟାଳୟ ଶିକ୍ଷା ସଚିବ ସଞ୍ଜୟ କୁମାର କହିଛନ୍ତି, ଏନସିଇଆରଟି ଦ୍ୱାଦଶ ରାଜନୀତି ବିଜ୍ଞାନ ପାଠ୍ୟପୁସ୍ତକରେ ପୃଥକ ଖଲିସ୍ତାନ ଦାବି ବିଷୟରେ ଉଲ୍ଲେଖ କରାଯାଇଥିଲା । ଏହି ପୁସ୍ତକରେ ଖାଲିସ୍ତାନ ସମର୍ଥକଙ୍କୁ ବିଚ୍ଛିନ୍ନତାବାଦୀ ଭାବେ ଦର୍ଶାଯାଇଥିଲା । ଏବେ ଉକ୍ତ ଅଂଶକୁ ହଟାଇଦିଆଯାଇଛି ।

ଏନସିଇଆରଟିକୁ ଲେଖିଥିବା ଚିଠିରେ ଏସଜିପିସି କେତେକ ଅଭିଯୋଗ ଆଣିଥିଲା । ବହିରେ ଥିବା ଭୁଲ ସୂଚନା ଉପରେ ଏସଜିପିସି ଆପତ୍ତି ଉଠାଇଥିଲା । କୁହାଯାଇଥିଲା ଯେ ଏନସିଇଆରଟି ଐତିହାସିକ ତଥ୍ୟକୁ ବିକୃତ କରୁଛି  । ଏସଜିପିସି କହିଛି ଯେ ଦ୍ୱାଦଶ ଶ୍ରେଣୀ ରାଜନୀତି ବିଜ୍ଞାନ ପାଠ୍ୟପୁସ୍ତକର ସପ୍ତମ ଅଧ୍ୟାୟରେ ଆନନ୍ଦପୁର ସାହିବ ସଂକଳ୍ପ ନେଇ ଖଲିସ୍ତାନ ବିଷୟରେ ଭୁଲ ସୂଚନା ରହିଛି। ଏହାକୁ ନେଇ କମିଟି ଆପତ୍ତି ଉଠାଇଥିଲା। ଏହି ତଥ୍ୟକୁ ପୁସ୍ତକରୁ ହଟାଇବାକୁ ଦାବି ହୋଇଥିଲା।