କେତେ କୋଟିର ମାଲିକ ନୋଏଲ ଟାଟା?

ନୂଆଦିଲ୍ଲୀ: ଗତ ବୁଧବାର ବିଳମ୍ବିତ ରାତିରେ ୮୬ ବର୍ଷ ବୟସରେ ରତନ ଟାଟାଙ୍କର ଦେହାନ୍ତ ହୋଇଥିଲା। ଏହାପରେ ଟାଟା ଟ୍ରଷ୍ଟ୍ରର ଚେୟାରମ୍ୟାନ କିଏ ହେବ ତାହାକୁ ନେଇ ଅନେକ କଳ୍ପନାଜଳ୍ପନା ଚାଲିଥିଲା। ହେଲେ ଆଜି ଟାଟା ଟ୍ରଷ୍ଟର ନୂତନ ଚେୟାରମ୍ୟାନଙ୍କ ନାମ ଘୋଷଣା କରାଯାଇଛି। ସ୍ୱର୍ଗତ ରତନ ଟାଟାଙ୍କ ସାବତ ଭାଇ ନୋଏଲ୍ ଟାଟାଙ୍କୁ ଏହି ଦାୟିତ୍ୱ ଦିଆଯାଇଛି। ୬୭ ବର୍ଷୀୟ ନୋଏଲ୍, ଡୋରାବଜୀ ଟାଟା ଟ୍ରଷ୍ଟ ଏବଂ ସାର୍ ରତନ ଟାଟା ଟ୍ରଷ୍ଟର ଜଣେ ଟ୍ରଷ୍ଟି ଅଟନ୍ତି | ତାଙ୍କୁ ରତନ ଟାଟାଙ୍କ ଉତ୍ତରାଧିକାରୀ କରାଯିବ ବୋଲି ପୂର୍ବରୁ ଚର୍ଚ୍ଚା ହେଉଥିଲା, ଯାହା ଆଜି ସତ ହୋଇଛି । ନୋଏଲ୍ ସବୁବେଳେ ଲାଇମଲାଇଟଠାରୁ ଦୂରରେ ରହି ଚୁପଚାପ୍ ନିଜ କାମ କରିବାକୁ ପସନ୍ଦ କରନ୍ତି |

ନୋଏଲ୍ ଟାଟା, ନାଭାଲ୍ ଟାଟା ଏବଂ ସିମୋନ୍ ଟାଟାଙ୍କ ପୁତ୍ର, ଯିଏ  ୧୯୫୭ ମସିହାରେ ଜନ୍ମଗ୍ରହଣ କରିଥିଲେ | ସେ ବ୍ରିଟେନର ସସେକ୍ସ ୟୁନିଭରସିଟିରୁ ସ୍ନାତକ ଡିଗ୍ରୀ ହାସଲ କରିଥିଲେ ଏବଂ ପରେ ଫ୍ରାନ୍ସରେ ବିଶ୍ୱର ଅନ୍ୟତମ ପ୍ରମୁଖ ବ୍ୟବସାୟ ବିଦ୍ୟାଳୟ ଇନସେଡରେ ସମ୍ମାନଜନକ ଆନ୍ତର୍ଜାତୀୟ କାର୍ଯ୍ୟନିର୍ବାହୀ କାର୍ଯ୍ୟକ୍ରମରେ ଯୋଗ ଦେଇଥିଲେ | ଏହା ପରେ ସେ ଟାଟା ଗ୍ରୁପର ଟାଟା ଇଣ୍ଟରନ୍ୟାସନାଲରେ ନିଜର ବୃତ୍ତିଗତ ଯାତ୍ରା ଆରମ୍ଭ କରିଥିଲେ | ଏହି କମ୍ପାନି ବିଦେଶରେ ଟାଟା ବ୍ୟବସାୟ ବିଷୟରେ ବୁଝେ | ଏତେ ବର୍ଷର କ୍ୟାରିଅର ଭିତରେ ଯଦି ଆମେ ନୋଏଲ୍ ଟାଟାଙ୍କ ସମ୍ପତ୍ତି ମୂଲ୍ୟ ଦେଖିବା ତେବେ ସେ ୧.୫ ବିଲିୟନ ଡ଼ଲାର୍ ଅର୍ଥାତ୍ ପ୍ରାୟ ୧୨,୪୫୫ କୋଟି ଟଙ୍କାର ମାଲିକ ଅଟନ୍ତି ।