🔴 LIVE | News Updates 13 February 2026: ତୀର୍ଥଯାତ୍ରୀ ବସ୍‌ ଦୁର୍ଘଟଣାଗ୍ରସ୍ତ; ତାରିକ ରହମାନଙ୍କୁ ଅଭିନନ୍ଦନ ଜଣାଇଲେ ପ୍ରଧାନମନ୍ତ୍ରୀ ମୋଦୀ; ମୁଖ୍ୟମନ୍ତ୍ରୀଙ୍କ ଗସ୍ତ ପୂର୍ବରୁ ଉଠିଲା ଦାବି

ଆମେ ଆମର ପାଠକଙ୍କୁ ପ୍ରତ୍ୟେକ ମୁହୂର୍ତ୍ତରେ ଖବର ସହିତ ଅପଡେଟ୍ କରିବାକୁ ଉଦ୍ୟମ କରୁଛୁ। ଆପଣଙ୍କ ପାଇଁ ସଦ୍ୟତମ ଏବଂ ବ୍ରେକିଂ ନ୍ୟୁଜ୍ ଆଣିବାକୁ ଆମେ ପ୍ରତିବଦ୍ଧ। ପ୍ରାରମ୍ଭିକ ସୂଚନା ମାଧ୍ୟମରେ ଏହି ଖବରକୁ ନିରନ୍ତର କ୍ରମାଗତ ଭାବେ ଅପ୍‌ଡେଟ୍‌ କରୁଛୁ। ସଦ୍ୟତମ ବ୍ରେକିଂ ନ୍ୟୁଜ୍ ଏବଂ ଅପଡେଟ୍ ପାଇଁ sambad.in ସହିତ ଯୋଡ଼ି ରୁହନ୍ତୁ। 

New Update
Feb 13, 2026 10:07 IST

ତାରିକ ରହମାନଙ୍କୁ ଅଭିନନ୍ଦନ ଜଣାଇଲେ ପ୍ରଧାନମନ୍ତ୍ରୀ ମୋଦୀ



ନୂଆଦିଲ୍ଲୀ: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାଂଲାଦେଶ ସାଧାରଣ ନିର୍ବାଚନରେ ​​ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP)ର ବିପୁଳ ବିଜୟ ପାଇଁ ତାରିକ ରହମାନଙ୍କୁ ଅଭିନନ୍ଦନ ଜଣାଇଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଏହି ବିଜୟ ଆପଣଙ୍କ ଉପରେ ଜନସାଧାରଣଙ୍କ ବିଶ୍ୱାସକୁ ପ୍ରତିଫଳିତ କରୁଛି

Feb 13, 2026 09:53 IST

ଆଦିବାସୀଙ୍କୁ ନର୍ଯାତନା ଦେଉଥିଲେ ସବ୍ୟସାଚୀ, ନିଖିଲ



ରାୟଗଡା: ସବ୍ୟସାଚୀ ପଣ୍ଡା, ଆଜାଦ, ଉଦୟ ଓ ନିଖିଲ ଏମାନେ କେବେ ଆଦିବାସୀ ନଥିଲେ। ଆଦିବାସୀମାନଙ୍କୁ ନକ୍ସଲ ସଂଗଠନରେ ରଖି ନିର୍ଯାତନା ଦେଉଥିଲେI ଏଭଳି ଲେଖା ହୋଇଥିବା ବ୍ୟାନର ରାୟଗଡା ଜିଲ୍ଲା ସଦର ବ୍ଲକ ଧୁମଗୁଡାରେ ଲାଗିଥିବା ଦେଖିବାକୁ ମିଳିଛିI ଏହାର ଜବାବ ଦେବା ପାଇଁ ଡମ୍ବାଇ ମାଝୀ ଓ ମେଘ ଜାନି ପ୍ରସ୍ତୁତ ଅଛନ୍ତିI ଲାଲ ସଲାମ ଲେଖି ମେଘନାଦ, ଡମ୍ବାଇ ମାଝୀ ରାଜ୍ୟ ସମ୍ପାଦକ କେବିକେ ଡିଭିଜନ ବୋଲି ବ୍ୟାନରରେ ଦେଖିବାକୁ ମିଳିଛିI ଆଦିବାସୀ ଶୋଷଣ ନୀତି ବନ୍ଦ କରନ୍ତୁ ବୋଲି ବ୍ୟାନରରେ ଲେଖା ଯାଇଛିI ଏନେଇ ପୁଲିସ କୌଣସି ପ୍ରତିକ୍ରିୟା ଦେଇନାହିଁI

Feb 13, 2026 09:07 IST

ଉଗ୍ର ହେଲେ ହାତୀ; ୬ଜଣଙ୍କ ନେଲେ ଜୀବନ



ହଜାରିବାଗ: ଝାଡ଼ଖଣ୍ଡର ହଜାରିବାଗ ଜିଲ୍ଳା ଚର୍ଚ୍ଚୁ ବ୍ଲକର ଗୋଣ୍ଡୱାର ଗାଁରେ ହାତୀ ଆକ୍ରମଣରେ ଛଅ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଗୋଟିଏ ପରିବାରର ଚାରି ଜଣ ସଦସ୍ୟ ଅଛନ୍ତି। ଘଟଣାଟି ରାତି ୧ ରୁ ୨ ଟା ମଧ୍ୟରେ ଘଟିଥିବା ଜଣାପଡ଼ିଛି। ଏହି ହୃଦୟବିଦାରକ ଘଟଣା ପରେ ଗାଁରେ ଶୋକ ଏବଂ ଆତଙ୍କ ଖେଳିଯାଇଛି। ରିପୋର୍ଟ ଅନୁଯାୟୀ, ପାଞ୍ଚ ଜଣିଆ ହାତୀପଲ ହଠାତ୍ ଗାଁରେ ପ୍ରବେଶ କରିଥିଲେ। ସେହି ସମୟରେ ଅଧିକାଂଶ ବାସିନ୍ଦା ଗଭୀର ନିଦ୍ରାରେ ଶୋଇଥିଲେ। ହାତୀମାନେ ମାଟି ଘର ଭାଙ୍ଗି ପଳାଇବାକୁ ଚେଷ୍ଟା କରୁଥିବା ଲୋକଙ୍କୁ ଆକ୍ରମଣ କରିଥିଲେ।

Feb 13, 2026 08:10 IST

ତୀର୍ଥଯାତ୍ରୀ ବସ୍‌ ଦୁର୍ଘଟଣାଗ୍ରସ୍ତ, ଜଣେ ମୃତ 



ଖନ୍ତାପଡା: ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା ବାହାନଗା ଛକ ନିକଟରେ ଏକ ତୀର୍ଥଯାତ୍ରୀ ବସ ଦୁର୍ଘଟଣାଗ୍ରସ୍ତ ହୋଇଛି। ଆଜି ସକାଳ ୫ଟା ୧୫ ମିନିଟ ସମୟରେ କୋଲକାତାରୁ ପୁରୀ ଅଭିମୁଖେ ଯାଉଥିବା ଶ୍ରୀ ଭେଙ୍କେଟଲକ୍ଷ୍ମୀ ନାମକ(ଏପି-୨୫ଡବ୍ଲୁ-୯୯୨୯) ଏକ ତୀର୍ଥଯାତ୍ରୀ ବସ ଭାରସମ୍ୟ ହରାଇ ଡିଭାଇଡର ଉପରକୁ ଚଡ଼ିଯାଇଥିଲା। ଫଳରେ ବସ ରେ ଥିବା ଡ୍ରାଇଭର ପୋଲକୁ ବାଡେଇହୋଇ ପୋଲ ତଳକୁ ଖସି ପଡ଼ିଥିବା ବେଳେ ଘଟଣା ସ୍ଥଳରେ ମୃତ୍ୟୁବରଣ କରିଥିବା ଜଣାପଡ଼ିଛି। ତେବେ ବସରେ ୪୦ଯାତ୍ରୀ ନେଇ ଯାଉଥିବାବେଳେ ୧୦ରୁ ଅଧିକ ଗୁରୁତର ଥିବା ଜଣା ପଡ଼ିଛି। ସେମାନଙ୍କୁ ଖନ୍ତାପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ନିମନ୍ତେ ନିଆଯାଇଥିବା ଜଣାପଡ଼ିଛି। ଘଟଣା ସ୍ଥଳରେ ଖନ୍ତାପଡ଼ା ପୁଲିସ, ବାହାନଗା ଅଗ୍ନିଶମ ବିଭାଗ, ଜାତୀୟ ରାଜପଥ ପୁଲିସ ମିଳିତ ଭାବେ ଆହତ ଯାତ୍ରୀ ମାନଙ୍କୁ ଉଧାର କରି ତଦନ୍ତ ଚଳାଇଛନ୍ତି। ଦୁର୍ଘଟଣାର କାରଣ ଜଣା ପଡିନଥିବା ବେଳେ ମୃତକ ଡ୍ରାଇଭରଙ୍କ ପରିଚୟ ମିଳିପାରି ନାହିଁ। ଏମାନେ ସମସ୍ତେ ଜେନାଲୁରମ ଜିଲ୍ଲାରୁ ଆସଥିବା ଜଣାପଡ଼ିଛି।

Feb 13, 2026 07:52 IST

ପାଣିପାଗ: ଡେରାଡୁନରେ ପାରା ୨୬ ଡିଗ୍ରି ରେକର୍ଡ



ଡେରାଡୁନ: ଉତ୍ତରାଖଣ୍ଡରେ ପାଗ ସମ୍ପୂର୍ଣ୍ଣ ଶୁଷ୍କ ରହିଛି। ବର୍ଷା କିମ୍ବା ତୁଷାରପାତ ଅଭାବରୁ ତାପମାତ୍ରା ସ୍ୱାଭାବିକଠାରୁ ତିନିରୁ ପାଞ୍ଚ ଡିଗ୍ରୀ ସେଲସିୟସ୍ ଅଧିକ ବୃଦ୍ଧି ପାଉଛି। ରାଜଧାନୀ ଡେରାଡୁନରେ ସର୍ବାଧିକ ତାପମାତ୍ରା ୨୬ ଡିଗ୍ରି ସେଲସିୟସ୍ ଉପରେ ପହଞ୍ଚିଛି, ଯାହା ଫଳରେ ଗରମ ଅନୁଭବ ହେଉଛି।ରାଜ୍ୟର ପାହାଡ଼ ଏବଂ ସମତଳ ଅଞ୍ଚଳରେ ସ୍ଥିର ସୂର୍ଯ୍ୟ କିରଣ ଅନୁଭୂତ ହେଉଛି। ଦିନରେ ଥଣ୍ଡା ପ୍ରାୟ ହଜିଯାଇଛି। ସକାଳ ଏବଂ ସନ୍ଧ୍ୟାରେ ସାମାନ୍ୟ ଥଣ୍ଡା ଲାଗି ରହିଥାଏ। ପାଣିପାଗ ବିଭାଗ ବର୍ତ୍ତମାନ ପାଇଁ ରାଜ୍ୟରେ ପାଗ ଶୁଖିଲା ରହିବ। ଫଳରେ ତାପମାତ୍ରା ଆହୁରି ବୃଦ୍ଧି ପାଇପାରେ।

Feb 13, 2026 07:27 IST

ଆଜି ଉଦ୍‌ଘାଟନ ହେବ ସେବା ତୀର୍ଥ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଅପରାହ୍ନ ପ୍ରାୟ ୧ଟା ୩୦ରେ ‘ସେବା ତୀର୍ଥ’ ଭବନ ପରିସରର ନାମ ଉନ୍ମୋଚନ କରିବେ। ଏହାପରେ ପ୍ରଧାନମନ୍ତ୍ରୀ ଆନୁଷ୍ଠାନିକ ଭାବେ ‘ସେବା ତୀର୍ଥ’ ଏବଂ ‘କର୍ତ୍ତବ୍ୟ ଭବନ-୧ ଓ ୨’ ର ଉଦ୍‌ଘାଟନ କରିବେ। ଏହା  ସହ ସନ୍ଧ୍ୟା ପ୍ରାୟ ୬ଟା ସମୟରେ ‘ସେବା ତୀର୍ଥ’ଠାରେ ଏକ ସାଧାରଣ କାର୍ଯ୍ୟକ୍ରମକୁ ମଧ୍ୟ ପ୍ରଧାନମନ୍ତ୍ରୀ ସମ୍ବୋଧିତ କରିବେ। ଏହି ଉଦଘାଟନ ଦେଶର ପ୍ରଶାସନିକ ଶାସନ ଢାଞ୍ଚାରେ ଏକ ପରିବର୍ତ୍ତନକାରୀ ମାଇଲଖୁଣ୍ଟ। ଏହା ଏକ ଆଧୁନିକ, ଦକ୍ଷ, ସୁଗମ ଏବଂ ନାଗରିକ-କୈନ୍ଦ୍ରିକ ଶାସନ ବ୍ୟବସ୍ଥା ନିର୍ମାଣ ପାଇଁ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତାକୁ ମଧ୍ୟ ପ୍ରତିଫଳିତ କରେ।



ଦଶନ୍ଧି ଦଶନ୍ଧି ଧରି, ଅନେକ ପ୍ରମୁଖ ସରକାରୀ କାର୍ଯ୍ୟାଳୟ ଏବଂ ମନ୍ତ୍ରଣାଳୟ ସେଣ୍ଟ୍ରାଲ ଭିଷ୍ଟା ଅଞ୍ଚଳର ବିଭିନ୍ନ ସ୍ଥାନରେ ବିକ୍ଷିପ୍ତ ଏବଂ ପୁରୁଣା କାର୍ଯ୍ୟଳୟରୁ କାର୍ଯ୍ୟ କରୁଥିଲେ। ଏହି ବିକ୍ଷିପ୍ତ ଅବସ୍ଥା ଯୋଗୁଁ କାର୍ଯ୍ୟକ୍ଷମ ଅକ୍ଷମତା, ସମନ୍ୱୟର ଅଭାବ, ରକ୍ଷଣାବେକ୍ଷଣ ଖର୍ଚ୍ଚ ବୃଦ୍ଧି ଏବଂ କାର୍ଯ୍ୟ କରିବାର ଅନୁକୂଳ ବାତାବରଣ ସୃଷ୍ଟି ହେଉନଥିଲା । ନୂତନ ଅଟ୍ଟାଳିକା ପରିସରଗୁଡ଼ିକ ଆଧୁନିକ ଏବଂ ଭବିଷ୍ୟତ ପାଇଁ ପ୍ରସ୍ତୁତ ସୁବିଧା ମଧ୍ୟରେ ପ୍ରଶାସନିକ କାର୍ଯ୍ୟଗୁଡ଼ିକୁ ଏକତ୍ରିତ କରି ଏହି ସମସ୍ୟାଗୁଡ଼ିକର ସମାଧାନ କରୁଛି। ‘ସେବା ତୀର୍ଥ’ରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ, ଜାତୀୟ ସୁରକ୍ଷା ପରିଷଦ ସଚିବାଳୟ ଏବଂ କ୍ୟାବିନେଟ୍ ସଚିବାଳୟ ରହିଛି, ଯାହା ପୂର୍ବରୁ ଭିନ୍ନ ଭିନ୍ନ ସ୍ଥାନରେ ଅବସ୍ଥିତ ଥିଲା।

Feb 13, 2026 07:12 IST

ମୁଖ୍ୟମନ୍ତ୍ରୀଙ୍କ ଗସ୍ତ ପୂର୍ବରୁ ଉଠିଲା ଦାବି

‌

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ନବରଙ୍ଗପୁର ଜିଲ୍ଲା ଗସ୍ତରେ ଆସିବେ ଏବଂ ପୂର୍ବଘୋଷିତ ମେଡ଼ିକାଲ କଲେଜ ପାଇଁ ଭିତ୍ତିପ୍ରସ୍ତର ସ୍ଥାପନ କରିବେ। ମେଡ଼ିକାଲ କଲେଜର ଭିତ୍ତିପ୍ରସ୍ତର ପୂର୍ବରୁ ନବରଙ୍ଗପୁର ଭଳି ଦୁର୍ଗମ ଅଞ୍ଚଳରେ କାର୍ଯ୍ୟରତ ଡକ୍ଟର ପାଇଁ ଉଦ୍ଧିଷ୍ଟ କ୍ୟାଟଗରିରେ ପରିବର୍ତ୍ତନ ଆଣି ପ୍ରୋତ୍ସାହନ ରାଶି ପ୍ରଦାନର ତାରତମ୍ୟ ଦୂର କରିବା ସହ ବିଭିନ୍ନ ପ୍ରତିକୂଳ ପରିସ୍ଥିତିରେ ଜିଲ୍ଲାର ବିଭିନ୍ନ ମେଡ଼ିକାଲରେ କାର୍ଯ୍ୟରତ ଡାକ୍ତରଙ୍କ ସମସ୍ୟାର ସମାଧାନ ପାଇଁ ଉଠିଛି ଦାବି। ଖାଲି ପଡ଼ିଥିବା ବିଶେଷଜ୍ଞ ଡାକ୍ତର, ଡାକ୍ତର ‌ଓ ଅନ୍ୟ ବୈଷୟିକ କର୍ମଚାରୀ ପଦବୀ ପୂରଣ କରିବାକୁ ମତ ପ୍ରକାଶ ପାଇଛି।

Feb 13, 2026 07:11 IST

ଯୁକ୍ତ୨ ପରୀକ୍ଷା: ଆଜିଠୁ ପଠାଯିବ ପ୍ରଶ୍ନପତ୍ର



ଭୁବନେଶ୍ବର: ଫେବ୍ରୁଆରି ୧୮ରୁ ଯୁକ୍ତ୨ ଥିଓରି ପରୀକ୍ଷା। ତେଣୁ ଆଜି ଠାରୁ ଫେବ୍ରୁଆରି ୧୬ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟ ଏବଂ ମାର୍ଚ୍ଚ ୪ରୁ ୬ ଯାଏଁ ଦ୍ବିତୀୟ ପର୍ଯ୍ୟାୟରେ ‘ପରୀକ୍ଷା ପରିଚାଳନା ହବ୍‌’(ଇଏମ୍‌ଏଚ୍‌)ଗୁଡ଼ିକୁ ପ୍ରଶ୍ନପତ୍ର ସମେତ ଅନ୍ୟାନ୍ୟ ଜରୁରି କାଗଜପତ୍ର ପଠାଯିବ। ହବ୍‌ଗୁଡ଼ିକର ସୁରକ୍ଷା ସହ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ପରିଷଦ ପକ୍ଷରୁ ସମସ୍ତ ହବ୍‌ ସୁପରଭାଇଜରଙ୍କୁ ନିର୍ଦ୍ଦେଶ ଦିଆଯାଇଛି। ଶୁକ୍ରବାର ଦୂରଦୂରାନ୍ତ ଜିଲ୍ଲାଗୁଡ଼ିକୁ ପ୍ରଶ୍ନପତ୍ର ପଠାଯିବ। ତେଣୁ ପ୍ରଶ୍ନପତ୍ର ଓ ଉତ୍ତର ଖାତା ପ୍ୟାକେଟ୍‌ ପରିବହନ ସମୟରେ ଜଣେ ବନ୍ଧୁକଧାରୀ ପୁଲିସ ଗାଡ଼ିରେ ରହିବେ। ଏଥର  ଯୁକ୍ତ୨ରେ ୧୩୫୭ଟି ପରୀକ୍ଷାକେନ୍ଦ୍ରରେ ୪ଲକ୍ଷ ୧ହଜାର ୬୩୨ଛାତ୍ରଛାତ୍ରୀ ପରୀକ୍ଷା ଦେବେ। ଚଳିତବର୍ଷ ଯୁକ୍ତ୨ କଲେଜ ତଥା ଉଚ୍ଚ ମାଧ୍ୟମିକ ବିଦ୍ୟାଳୟ, ସ୍ବୟଂଶାସିତ ମହାବିଦ୍ୟାଳୟ, ବିଶ୍ବବିଦ୍ୟାଳୟ ଓ ସବ୍‌-ଟ୍ରେଜେରିକୁ ୨୧୧ଟି ହବ୍‌ ଭାବେ ଚିହ୍ନଟ କରାଯାଇଛି। କଲେଜ ଅଧ୍ୟକ୍ଷମାନେ ମୁଖ୍ୟତଃ ହବ୍‌ ସୁପରଭାଇଜର ଭାବେ ନିଯୁକ୍ତ ହୋଇଛନ୍ତି।

Feb 13, 2026 07:08 IST

ତାରିକ ରହମାନ ହେବେ  ପ୍ରଧାନମନ୍ତ୍ରୀ? ବାଂଲାଦେଶରେ ବିଏନପିକୁ ବହୁମତ 

ଢାକା: ବାଂଲାଦେଶରେ ସାଧାରଣ ନିର୍ବାଚନ ପାଇଁ ଗୁରୁବାର ଦିନ ଭୋଟ ଦେବା ପରେ ଫଳାଫଳ ଏବେ ଆସିଛି। ଟ୍ରେଣ୍ଡ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP) ପାଇଁ ଏକ ବିଶାଳ ବିଜୟ ସୂଚାଇଛି। ତାରିକ ରହମାନ ଦୁଇଟି ଆସନରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ଉଭୟରେ ବିଜୟୀ ହୋଇଛନ୍ତି। ବାଂଲାଦେଶୀ ଗଣମାଧ୍ୟମ ଅନୁଯାୟୀ ବିଏନପି ୨୦୯ ଆସନ ଜିତି ଦୁଇ-ତୃତୀୟାଂଶ ସଂଖ୍ୟାଗରିଷ୍ଠତା ହାସଲ କରିଛି। ଜମାତ-ଏ-ଇସଲାମି ଏବଂ ଏହାର ସହଯୋଗୀମାନେ କେବଳ ୫୭ ଆସନରେ ବିଜୟୀ ହୋଇଛନ୍ତି।



ସାରା ଦେଶରେ ୩୬,୦୦୦ ଭୋଟ କେନ୍ଦ୍ରରେ ପ୍ରାୟ ୪୭.୯୧% ଭୋଟର ମତଦାନ ରେକର୍ଡ କରାଯାଇଥିଲା। ମତଦାନ ସମୟରେ କିଛି ସ୍ଥାନରେ ସଂଘର୍ଷ ହୋଇଥିଲା। ତାରିକ ରହମାନଙ୍କ ବିଏନପିର ଜଣେ ନେତାଙ୍କ ମୃତ୍ୟୁ ହୋଇଥିଲା। ଅନେକ କର୍ମୀ ଆହତ ହୋଇଥିଲେ। ବାଂଲାଦେଶରେ ପ୍ରଥମ ଥର ପାଇଁ ସଂସଦୀୟ ନିର୍ବାଚନ ସହିତ ଏକ ଜନମତ ସଂଗ୍ରହ କରାଯାଇଥିଲା ଏବଂ ପ୍ରଥମ ଥର ପାଇଁ ପୋଷ୍ଟାଲ୍ ଭୋଟିଂ ପ୍ରଚଳନ କରାଯାଇଥିଲା। ବାଂଲାଦେଶରେ, ମୁଖ୍ୟ ପ୍ରତିଯୋଗିତା ବିଏନପିର ତାରିକ ରହମାନ ଏବଂ ଜମାତର ଶଫିକୁର ରହମାନଙ୍କ ମଧ୍ୟରେ ଥିଲା, ଯେଉଁଥିରେ ତାରିକ ରହମାନ ବିଜୟୀ ହୋଇଥିଲେ।