କୌଣସି ଧର୍ମ ପ୍ରଦୂଷଣକୁ ପ୍ରୋତ୍ସାହିତ କରେ ନାହିଁ: ସୁପ୍ରିମକୋର୍ଟ

ନୂଆଦିଲ୍ଲୀ: ବାଣଫୁଟା ଉପରେ ଲାଗୁ ହୋଇଥିବା ନିଷେଧାଦେଶକୁ ଗୁରୁତର ଭାବେ ଗ୍ରହଣ ନ କରିଥିବାରୁ ସୁପ୍ରିମକୋର୍ଟ ଦିଲ୍ଲୀ ପୁଲିସକୁ ଭର୍ତ୍ସନା କରିଛନ୍ତି। ସୁପ୍ରିମକୋର୍ଟ କହିଛନ୍ତି ବାଣଫୁଟା ଉପରେ ନିଷେଧାଦେଶ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ କରାଯାଇ ନାହିଁ ଏବଂ ଏହା କେବଳ ଲୋକ ଦେଖାଣିଆ ଭାବେ କରାଯାଇଛି।

ସୁପ୍ରିମକୋର୍ଟ ଦିଲ୍ଲୀ ପୁଲିସକୁ ଏହି ଆଦେଶକୁ ସମ୍ପୂର୍ଣ୍ଣ ପାଳନ ପାଇଁ ଏକ ସ୍ୱତନ୍ତ୍ର ସେଲ୍ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଲାଇସେନ୍ସ ବିନା କେହି ବାଣ ତିଆରି ଏବଂ ବିକ୍ରୟ କରିପାରିବେ ନାହିଁ ବୋଲି ନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି। 

ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇ କହିଛନ୍ତି, ବିଶ୍ୱାସ କରାଯାଏ ଯେ କୌଣସି ଧର୍ମ ଏଭଳି କୌଣସି କାର୍ଯ୍ୟକଳାପକୁ ପ୍ରୋତ୍ସାହିତ କରେ ନାହିଁ ଯାହା ପ୍ରଦୂଷଣକୁ ବଢ଼ାଇଥାଏ କିମ୍ବା ଲୋକଙ୍କ ସ୍ୱାସ୍ଥ୍ୟକୁ କ୍ଷତି ପହଞ୍ଚାଇଥାଏ। ବିଚାରପତି ଅଭୟ ଏସ୍ ଓକ ଏବଂ ଜଷ୍ଟିସ ଅଗଷ୍ଟିନ ଜର୍ଜ ମସିହଙ୍କୁ ନେଇ ଗଠିତ ଏକ ବେଞ୍ଚ୍ କହିଛନ୍ତି ଯଦି ଏଭଳି ଭାବେ ବାଣଫୁଟା ଜାରି ରହେ ତେବେ ଏହା ନାଗରିକଙ୍କ ସ୍ୱାସ୍ଥ୍ୟ ସମ୍ପର୍କିତ ମୌଳିକ ଅଧିକାର ଉପରେ ପ୍ରଭାବ ପକାଇବ। 

ଦିଲ୍ଲୀ ସରକାର ଦୀପାବଳି ପୂର୍ବରୁ ବାଣଫୁଟାକୁ ନିଷିଦ୍ଧ କରିବାକୁ ନିର୍ଦ୍ଦେଶ ଦେଇଛନ୍ତି। ତଥାପି, ଏହା ସତ୍ତ୍ୱେ ଦୀପାବଳିରେ ବହୁ ସଂଖ୍ୟକ ବାଣଫୁଟା ହୋଇଥିଲା।  ଅନେକ ସ୍ଥାନରେ ଏହାର କୌଣସି ପ୍ରଭାବ ପଡ଼ି ନ ଥିଲା। ଏନେଇ ଦିଲ୍ଲୀ ପୁଲିସ କମିସନର ଏକ ସତ୍ୟପାଠ ଦାଖଲ କରି ସୁପ୍ରିମକୋର୍ଟଙ୍କୁ କହିଛନ୍ତି ଯେ ବାଣ ତିଆରି ସମ୍ପର୍କରେ କ’ଣ ପଦକ୍ଷେପ ନିଆଯାଇଛି।

ତେବେ ଏହି ସତ୍ୟପାଠ ନେଇ ସୁପ୍ରିମକୋର୍ଟ ସନ୍ତୁଷ୍ଟ ହୋଇ ନ ଥିଲେ। ଦିଲ୍ଲୀ ପୁଲିସ ଉପରେ ଅସନ୍ତୋଷ ବ୍ୟକ୍ତ କରି ସୁପ୍ରିମକୋର୍ଟ କହିଛନ୍ତି ଯେ ଆପଣ କେବଳ କଞ୍ଚାମାଲ ଜବତ କରି ଦେଖାଉଛନ୍ତି। ବାଣଫୁଟା ଉପରେ ପ୍ରତିବନ୍ଧକ ଗୁରୁତର ଭାବେ କାର୍ଯ୍ୟକାରୀ କରାଯାଇ ନାହିଁ।

ପ୍ରଦୂଷଣକୁ ହ୍ରାସ କରିବା ପାଇଁ ସେମାନେ କ’ଣ ପଦକ୍ଷେପ ନେଇଛନ୍ତି ତାହା କହିବା ପାଇଁ ଜାତୀୟ ରାଜଧାନୀ ଅଞ୍ଚଳର ସମସ୍ତ ରାଜ୍ୟକୁ ରିପୋର୍ଟ ଦାଖଲ କରିବାକୁ ଶୀର୍ଷକୋର୍ଟ କହିଛନ୍ତି। ହିତାଧିକାରୀଙ୍କ ସହ ପରାମର୍ଶ ପରେ ନଭେମ୍ବର ୨୫ପୂର୍ବରୁ ବାଣଫୁଟା ଉପରେ ସ୍ଥାୟୀ ପ୍ରତିବନ୍ଧକ ଲାଗୁ କରିବାକୁ ସୁପ୍ରିମକୋର୍ଟ ଦିଲ୍ଲୀ ସରକାରଙ୍କୁ ମଧ୍ୟ କହିଛନ୍ତି।

ଅଧିକ ପଢ଼ନ୍ତୁ: ସିରିଆରେ ଇସ୍ରାଏଲର ଏୟାର ଷ୍ଟ୍ରାଇକ୍: ଜଣେ ଶିଶୁଙ୍କ ସମେତ ୭ ମୃତ, ୨୦ ଆହତ

ସୁପ୍ରିମକୋର୍ଟ ଦିଲ୍ଲୀ ସରକାରଙ୍କ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି ଏବଂ ବାଣଫୁଟା ନେଇ କାହିଁକି ବିଳମ୍ବରେ ଘୋଷଣା କରାଯାଇଥିଲା ବୋଲି ପଚାରିଛନ୍ତି। ଅଦାଲତ କହିଛନ୍ତି ଯେ ସରକାର ଘୋଷଣା କରିବା ବେଳକୁ ଲୋକମାନେ ହୁଏତ ବାଣ କିଣି ରଖି ସାରିଥିଲେ।

ସୂଚନାଯୋଗ୍ୟ, ରାଜଧାନୀ ଦିଲ୍ଲୀ ସମେତ ସମଗ୍ର ଜାତୀୟ ରାଜଧାନୀ ଅଞ୍ଚଳରେ ବାୟୁ ପ୍ରଦୂଷଣ ସମସ୍ୟା ଗୁରୁତର ରହିଛି। ଗତ ସପ୍ତାହରେ, ଦିଲ୍ଲୀର ଅନେକ ଅଞ୍ଚଳରେ ଏକ୍ୟୁଆଇ ସୂଚକାଙ୍କ ୪୦୦ ଅତିକ୍ରମ କରିଥିଲା ​। ପ୍ରଦୂଷଣର ଏହା ଏକ ଗମ୍ଭୀର ସ୍ଥିତି ବୋଲି  ବିବେଚନା କରାଯାଇଥାଏ।

ଅଧିକ ପଢ଼ନ୍ତୁ: ଇରାନ ଆକ୍ରମଣ ଭୟ: ବଙ୍କରରେ ଲୁଚିଛନ୍ତି ନେତାନ୍ୟାହୁ