ବିବାଦ ଭିତରେ ଆରକେଏମ୍‌ ଓ ଭାରତ ସେବାଶ୍ରମକୁ ପ୍ରଶଂସା କଲେ ମମତା

କୋଲକତା: ରାମକୃଷ୍ଣ ମିଶନ ବା ଭାରତ ସେବାଶ୍ରମ ସଂଘର ଜନହିତକର କାର୍ଯ୍ୟକୁ ପ୍ରଶଂସା କରି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର କହିଛନ୍ତି ଯେ ସେ କୌଣସି ଅନୁଷ୍ଠାନ ବିରୋଧରେ ନୁହଁନ୍ତି ବରଂ ରାଜନୀତିରେ ଲିପ୍ତ ଥିବା ଜଣେ କିମ୍ବା ଦୁଇ ଜଣ ବ୍ୟକ୍ତିଙ୍କୁ ସମାଲୋଚନା କରିଛନ୍ତି।

ଶନିବାର ଦିନ ମମତା ବାନାର୍ଜୀ ଅଭିଯୋଗ କରିଥିଲେ ଯେ ଏହି ଦୁଇ ମଠର କିଛି ସାଧୁ ବିଜେପିର ନିର୍ଦ୍ଦେଶରେ କାମ କରୁଛନ୍ତି।

ଏହି ବୟାନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତୀବ୍ର ସମାଲୋଚନା କରି ଅଭିଯୋଗ କରିଛନ୍ତି ଯେ ସେ ମୁସଲମାନ ଉଗ୍ରବାଦୀଙ୍କ ଚାପରେ ଅଛନ୍ତି ଏବଂ ଟିଏମସିର ଭୋଟ୍‌ ବ୍ୟାଙ୍କକୁ ସନ୍ତୁଷ୍ଟ କରିବାକୁ ଏହି ସାମାଜିକ-ଧାର୍ମିକ ସଂଗଠନଗୁଡ଼ିକୁ ଧମକ ଦେଉଛନ୍ତି।

ଏହି ପରିପ୍ରେକ୍ଷୀରେ ବାଙ୍କୁରାର ଓଣ୍ଡାରେ ଏକ ନିର୍ବାଚନୀ ରାଲିକୁ ସମ୍ବୋଧିତ କରି ମମତା ବାନାର୍ଜୀ କହିଛନ୍ତି, ‘ମୁଁ ରାମକୃଷ୍ଣ ମିଶନ ବିରୋଧରେ ନୁହେଁ, ମୁଁ କାହିଁକି କୌଣସି ଅନୁଷ୍ଠାନ ବିରୋଧରେ ରହିବି କିମ୍ବା ଅପମାନିତ କରିବି? ସେ ଆହୁରି ମଧ୍ୟ କହିଛନ୍ତି, ମୁଁ ଜଣେ କିମ୍ବା ଦୁଇ ଜଣଙ୍କ ବିଷୟରେ କହିଛି।’ ଭାରତ ସେବାଶ୍ରମ ସଂଘ ଲୋକଙ୍କ ପାଇଁ କାମ କରୁଛି ବୋଲି ମୁଖ୍ୟମନ୍ତ୍ରୀ ମମତା ପ୍ରଶଂସା କରିଛନ୍ତି।

ମମତା ବାନାର୍ଜୀ କହିଛନ୍ତି, ‘ମୁଁ କାର୍ତ୍ତିକ ମହାରାଜଙ୍କ ବିଷୟରେ କହିଥିଲି, ସେ ତୃଣମୂଳ କଂଗ୍ରେସ ଏଜେଣ୍ଟଙ୍କୁ ରେଜିନଗରର ଏକ ପୋଲିଂ ବୁଥରେ ବସିବାକୁ ଦେଇ ନଥିଲେ। ମୁର୍ଶିଦାବାଦ ଜିଲ୍ଲାର ଭାରତ ସେବାଶ୍ରମ ସଂଘ ଭିକ୍ଷୁ ବିଜେପି ପାଇଁ କାମ କରୁଥିବା ଦାବି କରି ରେଜିନଗରରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଥିବା ବେଳେ ସେ ଲୋକଙ୍କୁ ଉତ୍ତେଜିତ କରୁଥିବା ଅଭିଯୋଗ କରିଥିଲେ।’

ଯଦି ସେ ବିଜେପି ପାଇଁ କାମ କରିବାକୁ ଚାହୁଁଛନ୍ତି, ତେବେ ସେ ଏହା କରିପାରିବେ, କିନ୍ତୁ ଏହାର ବ୍ୟାଜ୍‌ ପିନ୍ଧି କରିବା ଉଚିତ୍‌ ବୋଲି ସେ କହିଛନ୍ତି।