ସର୍ବଦଳୀୟ ବୈଠକରେ କେନ୍ଦ୍ରର ଉକ୍ତି: ଗୃହରେ ସବୁ ପ୍ରସଙ୍ଗ ଆଲୋଚନା କରାଯାଇ ପାରିବନି

ନୂଆଦିଲ୍ଲୀ : ସୋମବାର କେନ୍ଦ୍ର ସରକାର କହିଛନ୍ତି ଯେ ପାର୍ଲାମେଣ୍ଟରେ ଚୀନ୍ ଅନୁପ୍ରବେଶ ପ୍ରସଙ୍ଗରେ ଆଲୋଚନା କରାଯାଇ ପାରିବନି, କାରଣ ତାହା ଦେଶର ସୁରକ୍ଷା ସହ ଜଡ଼ିତ।

ପ୍ରାପ୍ତ ସୂଚନା ଅନୁଯାୟୀ, ସୋମବାର ଅନୁଷ୍ଠିତ ସର୍ବଦଳୀୟ ବୈଠକରେ ମାୟାବତୀଙ୍କ ବହୁଜନ ସମାଜ ପାର୍ଟି ଚୀନ୍ ଅନୁପ୍ରବେଶ ପ୍ରସଙ୍ଗ ଉଠାଇଥିଲା ଏବଂ ପାର୍ଲାମେଣ୍ଟରେ ଏହା ଉପରେ ଆଲୋଚନା କରିବାକୁ ଦାବି କରିଥିଲା। ଏହା ଉପରେ କେନ୍ଦ୍ର ସରକାର କହିଲେ ଯେ କେତେକ ପ୍ରସଙ୍ଗ ଉପରେ ଗୃହରେ ଆଲୋଚନା କରାଯାଇପାରିବନି କାରଣ ସେଗୁଡ଼ିକ ଦେଶର ସୁରକ୍ଷା ସହ ଜଡ଼ିତ।

ତେବେ ସାମ୍ବାଦିକମାନଙ୍କ ସହ କଥାହେଲା ବେଳେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କହିଥିଲେ ଯେ ସରକାର ସବୁ ପ୍ରସଙ୍ଗରେ ଆଲୋଚନା କରିବାକୁ ରାଜି ଅଛନ୍ତି।

ଏହି ସର୍ବଦଳୀୟ ବୈଠକରେ ୨୭ଟି ଦଳର ୩୭ ଜଣ ନେତା ଯୋଗ ଦେଇଥିଲେ। ଆଜିର ବୈଠକ ଭଲରେ ସମ୍ପନ୍ନ ହୋଇଥିଲା। ମୁଁ ଗୃହକୁ ଭଲରେ ଚଳାଇବା ପାଇଁ ବିରୋଧୀ ନେତାମାନଙ୍କୁ ଅନୁରୋଧ କରିଥିଲି। ଆମେ ସବୁ ପ୍ରସଙ୍ଗରେ ଆଲୋଚନା କରିବାକୁ ରାଜି ଅଛୁ ବୋଲି ଯୋଶୀ କହିଥିଲେ।

ବୈଠକ ପରେ ବିଜେଡି ସାଂସଦ ସସ୍ମିତ ପାତ୍ର କହିଥିଲେ, ଏହି ଅଧିବେଶନରେ ମହିଳା ସଂରକ୍ଷଣ ବିଲ୍ ଉପରେ ଆଲୋଚନାକୁ ବିଜେଡି ପ୍ରାଥମିକତା ଦେବ। ବିଲ୍ ପାସ୍ ପାଇଁ ସରକାରଙ୍କ ଉପରେ ଚାପ ପକାଇବାକୁ ଆମେ ସମଧର୍ମା ଦଳଗୁଡ଼ିକୁ ରାଜି କରାଇବୁ ବୋଲି ସେ କହିଥିଲେ। ଅନେକ ବିରୋଧୀ ଦଳ ଶିଳ୍ପପତି ଗୌତମ ଆଦାନିଙ୍କ ସହ ଜଡ଼ିତ ସାମ୍ପ୍ରତିକ ଷ୍ଟକ୍ ମାର୍କେଟ ପ୍ରସଙ୍ଗ ସମେତ ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉଠାଇଥିଲେ।

ଗୃହର ଉପନେତା ରାଜନାଥ ସିଂହ, ସଂସଦୀୟ ବ୍ୟାପାର ମନ୍ତ୍ରୀ ତଥା ଗୃହର ନେତା ଯୋଶୀ, ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ପୀୟୂଷ ଗୋୟଲ, ଅର୍ଜୁନ, ରାମ ମେଘୱାଲ ଏବଂ ଭି ମୁରଲୀଧରନ୍ ପ୍ରଭୃତି ସଂସଦଭବନ ପରିସରରେ ଅନୁଷ୍ଠିତ ବୈଠକରେ ଉପସ୍ଥିତ ଥିଲେ। ବିରୋଧୀ ଦଳଗୁଡ଼ିକ ମଧ୍ୟରୁ ଡିଏମ୍‌କେର ଟିଆର୍‌ ବାଲୁ, ତୃଣମୂଳର ସୁଦୀପ ବନ୍ଦ୍ୟୋପାଧ୍ୟାୟ, ସୁଖେନ୍ଦୁ ଶେଖର ରାୟ, ଟିଆର୍‌ଏସ୍‌ର କେ‌ କେଶବ ରାଓ ଓ ନାମ ନାଗେଶ୍ବର ପ୍ରମୁଖ ମଧ୍ୟ ଉପସ୍ଥିତ ଥିଲେ।