ରାଜ୍ୟରେ ଯଥେଷ୍ଟ କୋଭିଡ୍‌-୧୯ ଟିକା ନାହିଁ: ମହାରାଷ୍ଟ୍ର ସ୍ୱାସ୍ଥ୍ୟମନ୍ତ୍ରୀ ଟୋପେ

ମୁମ୍ବାଇ: ରାଜ୍ୟର କେତେକ କୋଭିଡ୍‌-୧୯ ଟିକାକରଣ କେନ୍ଦ୍ରରେ ଯଥେଷ୍ଟସଂଖ୍ୟକ ଟିକା ନ ଥିବାରୁ ଲୋକମାନଙ୍କୁ ଫେରାଇ ଦିଆଯାଉଛି ବୋଲି ଆଜି ମହାରାଷ୍ଟ୍ରର ସ୍ୱାସ୍ଥ୍ୟମନ୍ତ୍ରୀ ରାଜେଶ ଟୋପେ କହିଛନ୍ତି। ଟୋପେ କହିଛନ୍ତି ପ୍ରାଥମିକତା ଭିତ୍ତିରେ ୨୦ରୁ ୪୦ ବର୍ଷ ବୟସ ବର୍ଗର ଲୋକମାନଙ୍କୁ ଟିକା ଦିଆଯାଉ ବୋଲି ରାଜ୍ୟ ସରକାର କେନ୍ଦ୍ର ସରକାରଙ୍କ ଠାରେ ଦାବି କରିଛନ୍ତି।

ସେ ଆହୁରି ମଧ୍ୟ କହିଛନ୍ତି ଯେ, ପୁଣେ, ମୁମ୍ବାଇ, ନାଶିକ ଏବଂ ରାଜ୍ୟର ଅନ୍ୟ ଭାଗରେ ଶଯ୍ୟାସଂଖ୍ୟା ବୃଦ୍ଧି ନିମନ୍ତେ ଆମେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରୁଛୁ।

Image Courtesy of NDTV

ରାଜ୍ୟରେ ଗଚ୍ଛିତ ଥିବା କୋଭିଡ୍‌-୧୯ ଟିକା ସଂକ୍ରାନ୍ତରେ ସବିଶେଷ ବିବରଣୀ ଦେଇ ସ୍ୱାସ୍ଥ୍ୟମନ୍ତ୍ରୀ କହିଲେ, ସମ୍ପ୍ରତି ରାଜ୍ୟରେ ୧୪ ଲକ୍ଷ ଡୋଜ୍‌ ଟିକା ଅଛି। ତାହା ଆଗାମୀ ୩ ଦିନରେ ସରିଯିବ। କେନ୍ଦ୍ର ସରକାର ଆମକୁ ଟିକା ଯୋଗାଇ ଦେବା ବେଳେ ପ୍ରତି ସପ୍ତାହରେ ୪୦ ଲକ୍ଷ ଅତିରିକ୍ତ ଡୋଜ୍‌ ଟିକା ଯୋଗାଇ ଦେବାକୁ ରାଜ୍ୟ ସରକାର ଦାବି କରିଛନ୍ତି। ଟିକା ଯୋଗାଣ ବେଗ ମଧ୍ୟ ଖୁବ୍‌ ମନ୍ଥର। କେନ୍ଦ୍ର ଆମକୁ ଟିକା ଦେଉନାହିଁ ବୋଲି ମୁଁ କହୁନାହିଁ, କିନ୍ତୁ ଯୋଗାଣ ବେଗ ଖୁବ୍‌ ମନ୍ଥର।

ସୂଚନାଯୋଗ୍ୟ, ଦେଶରେ ସକ୍ରିୟ କୋଭିଡ୍‌ ସଂକ୍ରମଣ ବୃଦ୍ଧିରେ ମହାରାଷ୍ଟ୍ରର ଅବଦାନ ଯଥେଷ୍ଟ ଅଧିକ। ମଙ୍ଗଳବାର ଦିନ ରାଜ୍ୟରେ ନୂଆ କୋଭିଡ୍‌-୧୯ ସଂକ୍ରମଣ ସଂଖ୍ୟା ୫୫, ୦୦୦ରୁ ଅଧିକ ଥିଲା।