ଏନଆରଆଇଙ୍କ ଠାରୁ ୧୦ହଜାର ଟଙ୍କା  ନେବା କୁଲିଙ୍କୁ ମହଙ୍ଗା ପଡ଼ିଲା

ନୂଆଦିଲ୍ଲୀ: ନୂଆଦିଲ୍ଲୀସ୍ଥିତ ନିଜାମୁଦ୍ଦିନ ରେଲୱେ ଷ୍ଟେସନରେ ଜଣେ ଏନଆରଆଇଙ୍କୁ ହୁଇଲଚେୟାରରେ ପ୍ଲାଟଫର୍ମ ପର୍ଯ୍ୟନ୍ତ ପହଞ୍ଚାଇବାକୁ ଜଣେ କୁଲି ୧୦ହଜାର ଟଙ୍କା ଦାବି କରିଥିଲେ। ଯାହା ତାଙ୍କୁ ମହଙ୍ଗା ପଡ଼ିଯାଇଛି। 

ଏହି ଘଟଣାକୁ ନେଇ ଅଭିଯୋଗ ହେବାପରେ ରେଳ ବିଭାଗକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିଲା।

ଅଧିକପଢ଼ନ୍ତୁ:ପୁନାମା ଗେଟ୍ ମାମଲା: ମୃତଦେହ ବ୍ୟବଚ୍ଛେଦ ନେଇ ଜିଆରପି-ଏୟାରପୋର୍ଟ ଥାନା ଟଣାଓଟରା

ଦିଲ୍ଲୀ ମଣ୍ଡଳର ଡିଆରଏମ ଏହି ଘଟଣାର କାର୍ଯ୍ୟାନୁଷ୍ଠାନ ଗ୍ରହଣ କରି କୁଲିଙ୍କ ଲାଇସେନ୍ସ ରଦ୍ଧ କରି ଲୋକଙ୍କୁ ଅନୁରୋଧ କରି କହିଛନ୍ତି, ‘ ଯଦି ଆଗାମୀ ଦିନରେ କୌଣସି ଯାତ୍ରୀଙ୍କ ସହିତ ଏମିତି ଘଟଣା ଘଟେ ତେବେ ତୁରନ୍ତ ହେଲପଲାଇନ ନମ୍ବର ୧୩୯ରେ ଅଭିଯୋଗ କରି ପାରିବେ    ।’

ସୂଚନାଯୋଗ୍ୟ, ଗୁଜୁରାଟର ନିବାସୀ ପାୟଲ ଲଣ୍ଡନରେ ବସବାସ କରନ୍ତି। ଗତ ଡିସେମ୍ବର ୨୧ ତାରିଖରେ ସେ ପରିବାର ସହିତ ଭାରତ ଆସିଥିଲେ। ଡିସେମ୍ବର ୨୮ ତାରିଖରେ ପରିବାର ସହିତ ପାୟଲ ଆଗ୍ରା ବୁଲି ଯିବା ପାଇଁ ନିଜାମୁଦ୍ଦିନ ରେଲୱେ ଷ୍ଟେସନରେ ପହଞ୍ଚିଥିଲେ। ଯେଉଁଠାରୁ ତାଙ୍କୁ ବନ୍ଦେ ଭାରତ ଏକ୍ସପ୍ରେସ ଟ୍ରେନ ଯୋଗେ ଆଗ୍ରା ଯିବାର ଥିଲା।

ତେଣୁ ସେ ପ୍ଲାଟଫର୍ମ ପର୍ଯ୍ୟନ୍ତ ଯିବାକୁ ହୁଇଲଚେୟାର ଲୋଡ଼ିଥିଲେ। ଏଥିପାଇଁ ପାୟଲ କୁଲିଙ୍କ ସାହାଯ୍ୟ ନେଇଥିଲେ। ପ୍ଲାଟଫର୍ମ ପର୍ଯ୍ୟନ୍ତ ପହଞ୍ଚାଇବା ପରେ କୁଲି ପାୟଲଙ୍କ ଠାରୁ ପାରିଶ୍ରମିକ ବାବଦକୁ ୧୦ହଜାର ଟଙ୍କା ନେଇଥିଲେ। ଆଗ୍ରା ପହଞ୍ଚିବା ପରେ ପାୟଲ ରେଳ ପୁଲିସ ନିକଟରେ ଏହି ଘଟଣା ନେଇ ଅଭିଯୋଗ କରିଥିଲେ।

ଅଧିକପଢ଼ନ୍ତୁ:ଓଡ଼ିଶାରେ ପହଞ୍ଚିଲା ପ୍ରଥମ ଡବଲ ଡେକର ବସ୍‌

ଏହି ଅଭିଯୋଗକୁ କେନ୍ଦ୍ର କରି ପୁଲିସ ନିଜାମୁଦ୍ଦିନ ରେଳ ଷ୍ଟେସନର ସିସିଟିଭି ଫୁଟେଜ ଯାଞ୍ଚ କରି କୁଲିଙ୍କ ପରିଚୟ ସଂଗ୍ରହ କରିଥିଲା। ଏହାପରେ କୁଲିଙ୍କୁ ଗିରଫ କରି ଥାନାକୁ ଆଣିଥିଲା। କୁଲି ପୁଲିସ ସମ୍ମୁଖରେ ଏନଆରଆଇଙ୍କ ଠାରୁ  ୧୦ହଜାର ଟଙ୍କା ନେଇଥିବା କଥାକୁ ସ୍ବୀକାର କରିଥିଲେ। ଏଥିସହିତ ୧୦ହଜାର ଟଙ୍କା ଏନଆରଆଇଙ୍କୁ ଫେରାଇ ଦେବ ବୋଲି ପୁଲିସକୁ କଥା ଦେଇଥିଲେ।
ଏହି ଘଟଣାକୁ କେନ୍ଦ୍ର କରି ରେଳବିଭାଗର ବରିଷ୍ଠ ଅଧିକାରୀ ସୁଖବିନ୍ଦର ସିଂହ କୁଲିଙ୍କ ଲାଇସେନ୍ସ ରଦ୍ଧ କରି ଦେଇଥିଲେ।