ଜଳାତଙ୍କରେ ଛଟପଟ ହେଉଥିଲେ: ତାମିଲନାଡୁ ହସ୍ପିଟାଲରେ ଓଡ଼ିଆ ଯୁବକ ଗଳା କାଟିଦେଲେ

କୋଏମ୍ବାଟୁର: ତାମିଲନାଡୁର କୋଏମ୍ବାଟୁରର ଏକ ସରକାରୀ ହସ୍ପିଟାଲରେ ମଙ୍ଗଳବାର ଜଣେ ରାବିଜ୍ (ଜଳାତଙ୍କ) ସଂକ୍ରମିତ ବ୍ୟକ୍ତି ନିଜ ଗଳା କାଟି ଦେଇଛନ୍ତି। ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଓଡ଼ିଶାର ୩୫ ବର୍ଷୀୟ ରାମ ଚନ୍ଦ୍ରଙ୍କୁ କିଛି ଦିନ ତଳେ ଏକ କୁକୁର କାମୁଡ଼ି ଦେଇଥିଲା। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇ ଆଇସୋଲେସନ୍ ୱାର୍ଡରେ ରଖାଯାଇଥିଲା।

ତେବେ ରୋଗ ବଢିବା ସହିତ ସେ ଅତ୍ୟଧିକ ଆକ୍ରମଣାତ୍ମକତା ଏବଂ ଅନିୟମିତ ଆଚରଣ ପ୍ରଦର୍ଶନ କରିଥିଲେ, ଯାହା କି ଶେଷ ପର୍ଯ୍ୟାୟ ଜଳାତଙ୍କର ଲକ୍ଷଣ ଥିଲା। ଆଇସୋଲେସନରେ ଥିବା ବେଳେ ସେ ଏକ ନୋଟିସ୍ ବୋର୍ଡରେ ଲାଗିଥିବା କାଚ ଭାଙ୍ଗି ସେହି କାଚ ଖଣ୍ଡକୁ ବ୍ୟବହାର କରି ନିଜକୁ ଗୁରୁତର ଭାବେ ଆହତ କରିଥିଲେ। ଶାରୀରିକ ତରଳ ପଦାର୍ଥ ମାଧ୍ୟମରେ ଜଳାତଙ୍କ ସଂକ୍ରମଣର ବିପଦ ବିଷୟରେ ସମ୍ପୂର୍ଣ୍ଣ ସଚେତନ ଥିବା ଡାକ୍ତରଖାନା କର୍ମଚାରୀମାନେ ତୁରନ୍ତ ହସ୍ତକ୍ଷେପ କରିବାରୁ ଦୂରେଇ ରହି ରେସ୍‌କୋର୍ସ ପୁଲିସକୁ ସତର୍କ କରାଇଥିଲେ। କର୍ତ୍ତୃପକ୍ଷ ପହଞ୍ଚିବା ବେଳକୁ ରାମ ଚନ୍ଦ୍ର ବହୁ ପରିମାଣର ରକ୍ତ ହରାଇ ସାରିଥିଲା। ବହୁ ଚେଷ୍ଟା ସତ୍ତ୍ୱେ ତାଙ୍କର ମୃତ୍ୟୁ ଘଟିଥିଲା। ହସ୍ପିଟାଲ କର୍ମଚାରୀମାନେ ସୂଚନା ଦେଇଛନ୍ତି ଯେ ତାଙ୍କର ବଢୁଥିବା ଆକ୍ରୋଶ ଯୋଗୁଁ ତାଙ୍କ ପାଖକୁ ସୁରକ୍ଷିତ ଭାବରେ ପହଞ୍ଚିବା ପ୍ରାୟ ଅସମ୍ଭବ ହୋଇପଡିଥିଲା। ଘଟଣା ସମ୍ପର୍କରେ ପୁଲିସ ଏକ ମାମଲା ରୁଜୁ କରିଛି। ସେପଟେ ତାଙ୍କର ଶେଷ ମୁହୂର୍ତ୍ତର ଭାଇରାଲ୍ ଫୁଟେଜ୍ ଜଳାତଙ୍କର ବିପଦ ଏବଂ ପଶୁ କାମୁଡ଼ା ପରେ ଠିକ୍ ସମୟରେ ଟିକାକରଣର ଆବଶ୍ୟକତା ବିଷୟରେ ଚର୍ଚ୍ଚା ସୃଷ୍ଟି କରିଛି।