ଏପଟେ ଯାଇଥାଏ ୨୦୦ରୁ ଅଧିକ ଜୀବନ; ସେପଟେ ପାର୍ଟିରେ ସମ୍‌ଗୁଲ୍‌ ଥାଆନ୍ତି ଏୟାର୍‌ ଇଣ୍ଡିଆ କର୍ମଚାରୀ

ନୂଆଦିଲ୍ଲୀ: ଏୟାର୍‌ ଇଣ୍ଡିଆ ବିମାନ ଦୁର୍ଘଟଣା ଏବର୍ଷର ସବୁଠାରୁ ବଡ଼ ଦୁର୍ଘଟଣା। ଏହି ଦୁର୍ଘଟଣାରେ ଶହ ଶହ ଲୋକଙ୍କ ଜୀବନ ଯାଇଛି। ବିମାନରେ ଥିବା ଯାତ୍ରୀମାନଙ୍କର ଅକାଳ ବିୟୋଗରେ ପୂରା ଦେଶ କାନ୍ଦୁଥିବା ବେଳେ ଏୟାର ଇଣ୍ଡିଆ କମ୍ପାନିର କିଛି କର୍ମଚାରୀଙ୍କ ଆଚରଣ ଲୋକଙ୍କୁ ଆଶ୍ଚର୍ଯ୍ୟ କରିଛି।

ବିମାନ ଦୁର୍ଘଟଣା ଘଟିବାର କିଛି ଦିନ ପରର ଏକ ଭିଡିଓ ଏବେ ସୋସିଆଲ୍‌ ମିଡିଆରେ ଭାଇରାଲ୍‌ ହେଉଛି। ଭାଇରାଲ୍‌ ଭିଡିଓରେ ଦୁର୍ଘଟଣା ପରେ ସାରା ଦେଶ କାନ୍ଦୁଥିବା ବେଳେ କମ୍ପାନୀର କର୍ମଚାରୀମାନେ ପାର୍ଟି କରି ନାଚଗୀତ କରୁଥିବାର ଦେଖିବାକୁ ମିଳିଛି।

ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଏୟାର ଇଣ୍ଡିଆର ବିମାନବନ୍ଦର ଗେଟୱେ ସେବା ପ୍ରଦାନକାରୀ ଏଆଇଏସ୍‌ଏଟିଏସ୍‌ର ଚାରି ଜଣ ବରିଷ୍ଠ କର୍ମଚାରୀଙ୍କୁ ଇସ୍ତଫା ଦେବାକୁ କୁହାଯାଇଛି।

ଏଆଇଏସ୍‌ଏଟିଏସ୍‌ର ଗୁରୁଗ୍ରାମ କାର୍ଯ୍ୟାଳୟରେ ଆୟୋଜିତ ପାର୍ଟି ଅହମ୍ମଦାବାଦରେ ଏୟାର ଇଣ୍ଡିଆ ବୋଇଂ ୭୮୭-୮ ଡ୍ରିମଲାଇନ ଦୁର୍ଘଟଣାର କିଛି ଦିନ ପରେ ଆୟୋଜିତ ହୋଇଥିବା ଜଣାପଡ଼ିଛି। ଯେଉଁ ଦୁର୍ଘଟଣାରେ ୨୫୯ ଜଣଙ୍କର ମୃତ୍ୟୁ ହୋଇଥିଲା।

ଏଆଇଏସ୍‌ଏଟିଏସ୍‌ର ଜଣେ ମୁଖପାତ୍ର କହିଛନ୍ତି ଯେ କମ୍ପାନୀ ଏୟାର୍‌ ଇଣ୍ଡିଆ ୧୭୧ ବିମାନର ଦୁଃଖଦ କ୍ଷତିରେ ପ୍ରଭାବିତ ପରିବାର ସହିତ ଏକତା ପ୍ରକାଶ କରୁଛି ଏବଂ  ଭିଡିଓ ପାଇଁ ଦୁଃଖ ପ୍ରକାଶ କରିଛି। ଯାହାକୁ ଦେଖିବା ପରେ ଅନେକ ସୋସିଆଲ ମିଡିଆରେ ଉତ୍ସବ ପାଇଁ ଉପଯୁକ୍ତ ସମୟ ନୁହେଁ ବୋଲି ଦେଖିଥିଲେ।