ତିନି ପଡ଼ୋଶୀଙ୍କର ଗୋଟିଏ ଷଡ଼ଯନ୍ତ୍ର!: ଭାରତର ସୁରକ୍ଷା ବିପଦରେ ଅଛି କହିଲେ ସିଡିଏସ୍

ନୂଆଦିଲ୍ଲୀ: ଭାରତର ପ୍ରତିରକ୍ଷା ମୁଖ୍ୟ(ସିଡିଏସ) ଜେନେରାଲ ଅନିଲ ଚୌହାନ ଆଶଙ୍କା ପ୍ରକାଶ କରିଛନ୍ତି ଯେ, ଚୀନ୍, ପାକିସ୍ତାନ ଏବଂ ବାଂଲାଦେଶ ନିଜ ନିଜ ସ୍ୱାର୍ଥ ପାଇଁ ପରସ୍ପର ଆଡ଼କୁ ଢଳିବା ଭାରତର ସ୍ଥିରତା ଏବଂ ସୁରକ୍ଷା ଉପରେ ଗମ୍ଭୀର ପ୍ରଭାବ ପକାଇପାରେ।

ସେ କହିଛନ୍ତି, ଚୀନ୍ ଉତ୍ତର ସୀମାରେ ସିଧାସଳଖ ମୁକାବିଲା କରିବା ଅପେକ୍ଷା ପଡ଼ୋଶୀ ଦେଶ ପାକିସ୍ତାନକୁ ଭାରତକୁ କ୍ଷତି ପହଞ୍ଚାଇବା ପାଇଁ ବ୍ୟବହାର କରିବାକୁ ପସନ୍ଦ କରୁଛି। ଫଳରେ ତିନି ପଡ଼ୋଶୀଙ୍କର ଗୋଟିଏ ଷଡ଼ଯନ୍ତ୍ର ରହିଛି। ତାହା ହେଉଛି ଭାରତ ଉପରେ ଆକ୍ରମଣ କରିବା।

'ଅବଜରଭର ରିସର୍ଚ୍ଚ ଫାଉଣ୍ଡେସନ' ଦ୍ୱାରା ଆୟୋଜିତ 'ଏକ ଥିଙ୍କ ଟ୍ୟାଙ୍କ' କାର୍ଯ୍ୟକ୍ରମରେ ତାଙ୍କ ଭାଷଣରେ, ଜେନେରାଲ ଅନିଲ ଚୌହାନ ୭-୧୦ ମେ'ରେ ଭାରତ ଏବଂ ପାକିସ୍ତାନ ମଧ୍ୟରେ ହୋଇଥିବା ସାମରିକ ସଂଘର୍ଷର ଉଲ୍ଲେଖ କରିଥିଲେ ଏବଂ କହିଥିଲେ ଯେ, ଏହା ହୁଏତ ପ୍ରଥମ ଥର ଥିଲା ଯେତେବେଳେ ଦୁଇଟି ପରମାଣୁ ଅସ୍ତ୍ରଶସ୍ତ୍ର ସମ୍ପନ୍ନ ଦେଶ ସିଧାସଳଖ ଏକ ସଂଘର୍ଷରେ ଜଡିତ ହୋଇଥିଲେ।

ଭାରତ ପ୍ରତି ଚୀନ୍ ଏବଂ ପାକିସ୍ତାନର ସମାନ ସ୍ୱାର୍ଥ ସମ୍ପର୍କରେ ଉଲ୍ଲେଖ କରି ପ୍ରତିରକ୍ଷା ବିଭାଗ ମୁଖ୍ୟ କହିଛନ୍ତି, ପାକିସ୍ତାନ ଗତ ପାଞ୍ଚ ବର୍ଷ ମଧ୍ୟରେ ଚୀନ୍‌ଠାରୁ ପ୍ରାୟ ୭୦ ରୁ ୮୦ ପ୍ରତିଶତ ଅସ୍ତ୍ରଶସ୍ତ୍ର ଏବଂ ଉପକରଣ ହାସଲ କରିଛି। ଚୀନ୍‌ର ସାମରିକ କମ୍ପାନିଗୁଡ଼ିକର ପାକିସ୍ତାନରେ ବାଣିଜ୍ୟିକ କାର୍ଯ୍ୟାଳୟ ରହିଛି।

ଭାରତ ମହାସାଗର କ୍ଷେତ୍ରର ଦେଶଗୁଡ଼ିକରେ ଆର୍ଥିକ ସଙ୍କଟ "ବାହ୍ୟ ଶକ୍ତି"କୁ ସେମାନଙ୍କର ପ୍ରଭାବ ବୃଦ୍ଧି କରିବାକୁ ଅନୁମତି ଦେଇଛି, ଯାହା ଭାରତ ପାଇଁ ସଙ୍କଟ ସୃଷ୍ଟି କରିପାରେ। ସେ କହିଛନ୍ତି, ଚୀନ୍, ପାକିସ୍ତାନ ଏବଂ ବାଂଲାଦେଶ ମଧ୍ୟରେ ସ୍ୱାର୍ଥର ଏକ ସମ୍ଭାବ୍ୟ ସମନ୍ୱୟ ରହିଛି। ଏହା ଭାରତର ସ୍ଥିରତା ଏବଂ ସୁରକ୍ଷା ପାଇଁ ପ୍ରଭାବ ପକାଇପାରେ।

ଅଧିକ ପଢ଼ନ୍ତୁ: ଧରି ସିଧା ଗୁଳି କର:ହସିନାଙ୍କ ଅଡିଓ ଟେପ୍ ଭାଇରାଲ୍

ସିଡିଏସଙ୍କୁ ଅପରେସନ ସିନ୍ଦୂର ସମୟରେ ଚୀନର ଭୂମିକା ବିଷୟରେ ମଧ୍ୟ ପଚରାଯାଇଥିଲା। ସେ କହିଥିଲେ, ଚୀନ ପାକିସ୍ତାନକୁ କେତେ ସମର୍ଥନ ଦେଇଥିଲା ତାହା ଜାଣିବା ବହୁତ କଷ୍ଟକର। ଏହି ସଂଘର୍ଷ ସମୟରେ ଉତ୍ତର ସୀମାରେ କୌଣସି ଅସାଧାରଣ କାର୍ଯ୍ୟକଳାପ ହୋଇ ନଥିଲା, ଯାହା ଏକ ଭିନ୍ନ ବିଷୟ। ସଂଘର୍ଷ ସମୟରେ ସୀମାରେ ସମସ୍ୟା ଆରମ୍ଭ ହୁଏ।

ପୂର୍ବରୁ ଡେପୁଟି ଆର୍ମି ଚିଫ୍ ଲେଫ୍ଟନାଣ୍ଟ ଜେନେରାଲ୍ ରାହୁଲ୍ ଆର.ସିଂହ ଶୁକ୍ରବାର ଦିନ କହିଥିଲେ ଯେ, ସମ୍ମୁଖରୁ ପାକିସ୍ତାନ ଦୃଶ୍ୟମାନ ହେଉଥିଲେ ମଧ୍ୟ ଚୀନ୍ ନିଜର ଚିରହରିତ ବନ୍ଧୁକୁ ପରଦା ପଛରେ ରହି ସମସ୍ତ ପ୍ରକାରେ ସାହାଯ୍ୟ କରୁଛି। ଅନ୍ୟପକ୍ଷରେ, ତୁର୍କୀ ମଧ୍ୟ ଇସଲାମାବାଦକୁ ସାମରିକ ଉପକରଣ ଯୋଗାଇ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।  ୭ ମେ’ରୁ ୧୦ ମେ’ ମଧ୍ୟରେ ସଂଘର୍ଷ ସମୟରେ, ଭାରତ  ତିନି ଶତ୍ରୁ ସହିତ ମୁକାବିଲା କରୁଥିଲା।

ସେ କହିଥିଲେ, ପାକିସ୍ତାନ କେବଳ ଭାରତ ବିରୁଦ୍ଧରେ ଏକ ମୋର୍ଚ୍ଚା ଗଠନ କରିବାର ଅଭିନୟ କରୁଥିଲା। ଯେତେବେଳେ ଶତ୍ରୁ ପାଖକୁ ପ୍ରକୃତ ସମର୍ଥନ ଚୀନ୍‌ରୁ ଆସୁଥିଲା। ଆମେ ଏଥିରେ ଆଶ୍ଚର୍ଯ୍ୟ ହୋଇ ନଥିଲୁ, କାରଣ ଗତ ପାଞ୍ଚ ବର୍ଷର ତଥ୍ୟରୁ ଜଣା ଜଣାପଡୁଛି ଯେ, ପାକିସ୍ତାନକୁ ଯୋଗାଇ ଦିଆଯାଉଥିବା ସାମରିକ ଉପକରଣର ୮୧ ପ୍ରତିଶତ ଚୀନ୍‌ରୁ ଆସୁଛି।

ଅଧିକ ପଢ଼ନ୍ତୁ: ପାଞ୍ଚ ମାସ ମଧ୍ୟରେ ତିନିଟି ଜାଗୁଆର୍‌ ବିମାନ ଦୁର୍ଘଟଣା

India | China | pakistan | Bangladesh | CDS General Anil Chauhan | DCAS Lt Gen. Rahul R Singh