ଦିନେ ତୁମେ ପ୍ରଧାନ ବିଚାରପତି ହେବ, ହେଲେ ମୁଁ...; ଭବିଷ୍ୟତକୁ ନେଇ ଏଭଳି କହିଥିଲେ ବିଆର ଗବାଇଙ୍କ ବାପା

ନୂଆଦିଲ୍ଲୀ: ଜଷ୍ଟିସ୍ ଭୂଷଣ ରାମକୃଷ୍ଣ ଗବାଇ ଆଜି ସୁପ୍ରିମକୋର୍ଟର ନୂତନ ପ୍ରଧାନ ବିଚାରପତି ଭାବେ ଶପଥ ଗ୍ରହଣ କରିଛନ୍ତି। ସେ ଦେଶର ୫୨ତମ ପ୍ରଧାନ ବିଚାରପତି ଭାବରେ ଶପଥ ନେଇ ଜଷ୍ଟିସ୍ ସଞ୍ଜିବ ଖାନ୍ନାଙ୍କ ସ୍ଥାନ ନେଇଛନ୍ତି। ଜଷ୍ଟିସ୍ ସଞ୍ଜିବ ଖାନ୍ନା ମଙ୍ଗଳବାର ଦିନ ୫୧ତମ ପ୍ରଧାନ ବିଚାରପତି ଭାବରେ ଅବସର ଗ୍ରହଣ କରିଥିଲେ। ହୁଏତ ବହୁତ କମ୍ ଲୋକ ଜାଣିଥିବେ ଯେ ପ୍ରଧାନ ବିଚାରପତି ହୋଇଥିବା ଜଷ୍ଟିସ୍ ଗବାଇ ସ୍ଥପତି ହେବାକୁ ଚାହୁଁଥିଲେ। କିନ୍ତୁ ତାଙ୍କ ବାପାଙ୍କ ଇଚ୍ଛା ପୂରଣ କରିବା ପାଇଁ ସେ ଜଣେ ଓକିଲ ହୋଇଥିଲେ।

ଜଷ୍ଟିସ୍ ଗଭାଇଙ୍କ ପିତା ରାମକୃଷ୍ଣ ସୂର୍ଯ୍ୟଭାନ ଗବାଇ ଜଣେ ପ୍ରସିଦ୍ଧ ଆମ୍ବେଦକରାଇଟ୍ ନେତା ଥିଲେ। ସେ ଭାରତୀୟ ରିପବ୍ଲିକାନ୍ ପାର୍ଟିର ପ୍ରତିଷ୍ଠାତା ଥିଲେ। ଯେଉଁମାନେ ତାଙ୍କୁ ଜାଣିଥିଲେ, ସେମାନେ ତାଙ୍କୁ ସ୍ନେହରେ ଦାଦା ସାହେବ ବୋଲି ଡାକୁଥିଲେ। ସୂତ୍ର ଅନୁସାରେ, ଜଷ୍ଟିସ୍ ଗବାଇଙ୍କ ବାପା ଆରଏସ ଗବାଇ ମଧ୍ୟ ଜଣେ ଓକିଲ ହେବାକୁ ଚାହୁଁଥିଲେ। ଏଥିପାଇଁ ସେ ଆଇନ ସ୍କୁଲରେ ମଧ୍ୟ ପ୍ରବେଶ କରିଥିଲେ। କିନ୍ତୁ ସାମାଜିକ କ୍ଷେତ୍ରରେ ତାଙ୍କର କାର୍ଯ୍ୟ ଯୋଗୁଁ, ସେ ଦ୍ୱିତୀୟ ବର୍ଷ ପରେ ତାଙ୍କର ଆଇନ ପାଠପଢ଼ା ଜାରି ରଖିପାରିଲେ ନାହିଁ।

ଅନ୍ୟପକ୍ଷରେ ଜଷ୍ଟିସ୍ ବିଆର ଗବାଇ ଜଣେ ସ୍ଥପତି ହେବାକୁ ଚାହୁଁଥିଲେ। କିନ୍ତୁ ତାଙ୍କ ବାପା ଚାହୁଁଥିଲେ ଯେ ସେ ଜଣେ ଓକିଲ ହୁଅନ୍ତୁ। ବାପାଙ୍କ ଇଚ୍ଛାକୁ ସମ୍ମାନ ଜଣାଇ ଜଷ୍ଟିସ୍ ବିଆର ଗବାଇ ନାଗପୁର ବିଶ୍ୱବିଦ୍ୟାଳୟରେ ଆଡମିସନ୍ ନେଲେ। ସେଠାରୁ ଆଇନ ଡିଗ୍ରୀ ହାସଲ କରି ୧୬ ମାର୍ଚ୍ଚ ୧୯୮୫ରେ ସେ ଓକିଲାତି ଆରମ୍ଭ କରିଥିଲେ। ପରେ, ବମ୍ବେ ହାଇକୋର୍ଟର ପ୍ରଧାନ ବିଚାରପତି ସିକେ ଠକ୍କର, ହାଇକୋର୍ଟ ବିଚାରପତି ଭାବରେ ତାଙ୍କର ନିଯୁକ୍ତି ପାଇଁ ତାଙ୍କ ନାମ ସୁପାରିଶ କରିବାକୁ ଅନୁମତି ଲୋଡିଥିଲେ। କିନ୍ତୁ ସେ ଏଥିରେ ଆଗ୍ରହୀ ନଥିଲେ। 

ଏନେଇ ସେ ତାଙ୍କ ବାପାଙ୍କୁ ପଚାରିବାରୁ ରାମକୃଷ୍ଣ ସୂର୍ଯ୍ୟଭାନ ଗବାଇ କହିଥିଲେ ଯେ, "ତୁମେ ସମାଜକୁ ଅଧିକ ଅବଦାନ ଦେବ। ଆସୁଥିବା ସୁଯୋଗକୁ ହାତଛଡ଼ା କରନାହିଁ। ଦିନେ ତୁମେ ଭାରତର ପ୍ରଧାନ ବିଚାରପତି ହେବ। କିନ୍ତୁ ମୁଁ ସେହି ଦିନ ଦେଖିବାକୁ ନଥିବି।" ବାପାଙ୍କଠାରୁ ଏହା ଶୁଣିବା ପରେ ସେ ବମ୍ବେ ହାଇକୋର୍ଟର ପ୍ରଧାନ ବିଚାରପତି ସିକେ ଠକ୍କରଙ୍କ ପ୍ରସ୍ତାବକୁ ଗ୍ରହଣ କରିଥିଲେ।