ଲୋକସଭା ବୈଠକ ପୂର୍ବରୁ ବିିରୋଧୀ ଦଳର ନେତାଙ୍କ ସହିତ ବୈଠକ କଲେ ରାହୁଲ ଗାନ୍ଧୀ, ସରକାରଙ୍କୁ ଘେରିବାକୁ ପ୍ରସ୍ତୁତ ହେଲା ମାଷ୍ଟର ପ୍ଲାନ୍

ନୂଆଦିଲ୍ଲୀ: ଲୋକସଭା ବୈଠକ ପୂର୍ବରୁ ସୋମବାର ଦିନ ରାହୁଲ ଗାନ୍ଧୀ, କଂଗ୍ରେସର ବରିଷ୍ଠ ସଂସଦୀୟ ନେତା ଓ କିଛି ବିରୋଧୀଦଳ ନେତାଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ କଂଗ୍ରେସ ସମେତ ରାଷ୍ଟ୍ରବାଦୀ କଂଗ୍ରେସ ପାର୍ଟି, ଡିଏମକେ ଓ ଅନ୍ୟ କିଛି ଦଳର ନେତାମାନେ ସାମିଲ ହୋଇଥିଲେ । କୁହାଯାଉଛି କି, ଲୋକସଭାରେ ସରକାରଙ୍କୁ ଘେରିବାକୁ ଏହି ବୈଠକରେ ଯୋଜନା ପ୍ରସ୍ତୁତ ହୋଇଛି । ଆଗାମୀ ଲୋକସଭା ବୈଠକରେ ଚାଷୀ ଆନ୍ଦୋଳନକୁ ନେଇ କିଭଳି ସରକାରଙ୍କ ଉପରେ ଚାପ ପକାଯାଇ ପାରିବ ସେ ନେଇ ବି ଆଲୋଚନା ହୋଇଥିବା ସୂଚନା ମିଳିଛି ।

ସେପେଟ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଷ୍ଟ୍ରପତିଙ୍କ ଅଭିଭାଷଣ ଉପରେ ରାଜ୍ୟସଭାରୁ ବିରୋଧୀଙ୍କୁ ଟାର୍ଗେଟ୍ କରିଛନ୍ତି । କୃଷକ ଆନ୍ଦୋଳନ ନେଇ ରାଜ୍ୟସଭାରେ ପ୍ରଧାନମନ୍ତ୍ରୀ ବିରୋଧୀଙ୍କ ଡିଏନଏ ପର୍ଯ୍ୟନ୍ତ କଥା ନେଇଛନ୍ତି । ପ୍ରଧାନମନ୍ତ୍ରୀ ଦେଶରେ ବୈଦେଶିକ ପୁଞ୍ଜି ନିବେଶର ନୂଆ ପରିଭାଷା ବି ବୁଝାଇଛନ୍ତି । ଏହା ସହ ଭାରତ ତା’ର ନାଗରିକମାନଙ୍କୁ ରକ୍ଷା କରିବା ନିମନ୍ତେ କରୋନାଭାଇରସ୍‌ରୂପୀ ଅଜ୍ଞାନ୍ତ ଶତ୍ରୁ ସହ ଲଢ଼ିଛି। ତେଣୁ, ଏହି ଲଢ଼େଇରେ ହୋଇଥିବା ବିଜୟ କୌଣସି ସରକାରଙ୍କର ନୁହେଁ, ସମଗ୍ର ଦେଶର ବୋଲି ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟସଭାରେ କହିଥିଲେ।