ପରିବାର ସହ ଜନ୍ମଦିନ ପାଳିବାକୁ ଯାଇଥିଲେ, ଶବ ହୋଇ ଫେରିଲେ

ପହଲଗାମ୍: ଜମ୍ମୁ-କଶ୍ମୀରର ପହଲଗାମରେ ପର୍ଯ୍ୟଟକଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ସମଗ୍ର ଦେଶ ସ୍ତବ୍ଧ ଏବଂ ସମସ୍ତେ ଆତଙ୍କବାଦୀଙ୍କୁ ଉଚିତ ଜବାବ ଦେବାକୁ ଦାବି କରୁଛନ୍ତି। ପହଲଗାମର ବୈସାରନ ଉପତ୍ୟକାକୁ ବୁଲିବାକୁ ଯାଇଥିବା ପର୍ଯ୍ୟଟକଙ୍କୁ ଆତଙ୍କବାଦୀମାନେ ସେମାନଙ୍କ ନାମ ଏବଂ ଧର୍ମ ପଚାରି ହତ୍ୟା କରିଥିଲେ। ଏପର୍ଯ୍ୟନ୍ତ ମୋଟ ୨୮ ଜଣଙ୍କର ଯନ୍ତ୍ରଣାଦାୟକ ମୃତ୍ୟୁ ଘଟିଥିବା ନେଇ କୁହାଯାଉଥିବା ବେଳେ ମୃତକଙ୍କ ବିଭିନ୍ନ ହୃଦୟ ବିଦାରକ କାହାଣୀ ସାମ୍ନାକୁ ଆସୁଛି।

ଏବେ ମୃତକଙ୍କ ମଧ୍ୟରେ ଥିବା ଶୈଲେଶ କଲଠିଆଙ୍କ କାହାଣୀ ସମସ୍ତଙ୍କ ଆଖିରେ ଲୁହ ଆଣିଛି। ମଙ୍ଗଳବାର ଜନ୍ମଦିନ ଥିବାରୁ ସେ ନିଜ ପୁଅ-ଝିଅ ଓ ପତ୍ନୀଙ୍କୁ ନେଇ ପହଲଗାମ୍ ବୁଲିବାକୁ ଯାଇଥିଲେ। ହେଲେ ଏହା ତାଙ୍କର ଶେଷ ଦିନ ହେବ ବୋଲି ତାଙ୍କୁ ଜଣାନଥିଲା। ଶୈଳେଶ ମୂଳତଃ ଅମରୋଲିର ବାସିନ୍ଦା ଥିଲେ ଏବଂ ତାଙ୍କ ପରିବାର ସୁରଟରେ ରହୁଥିଲେ। ବ୍ୟାଙ୍କ ଚାକିରି ଯୋଗୁଁ ଗତ ଗୋଟିଏ ବର୍ଷ ଧରି ଶୈଲେଶ ମୁମ୍ବାଇରେ ରହୁଥିଲେ। ୪୪ ବର୍ଷୀୟ ଶୈଳେଶ ତାଙ୍କ ପତ୍ନୀ ଶୀତଲ, ଝିଅ ନୀତି ଏବଂ ପୁଅ ନକ୍ଷତ୍ରଙ୍କ ସହିତ ମୁମ୍ବାଇରୁ କାଶ୍ମୀର ଯାଇଥିଲେ। କିନ୍ତୁ ମଙ୍ଗଳବାର ଦିନ, ପହଲଗାମରେ ବୁଲିବା ସମୟରେ, ଏପରି କିଛି ଘଟିଥିଲା ଯାହା ଏହି ପରିବାରର ଖୁସିକୁ ଛଡ଼ାଇ ନେଇଥିଲା। ଯେତେବେଳେ ସେ ପହଲଗାମରେ ଘୋଡା ଚଢ଼ି ଏହାର ମଜା ନେଉଥିଲେ, ସେତେବେଳେ ଆତଙ୍କବାଦୀମାନେ ଆକ୍ରମଣ କରିଥିଲେ ​​ଏବଂ ଶୈଳେଶ ଏଥିରେ ପ୍ରାଣ ହରାଇଥିଲେ। ଏହି ଆକ୍ରମଣରେ ତାଙ୍କ ସ୍ତ୍ରୀ ଓ ପିଲାମାନେ ସୁରକ୍ଷିତ ଥିବା ଜଣାଯାଇଛି।