ଭାରତର କୌଣସି ବନ୍ଦରକୁ ଆସିବନି ପାକିସ୍ତାନ ପତାକା ଥିବା ଜାହାଜ: ଭାରତୀୟ ନୌସେନାର କଡ଼ା ନିର୍ଦ୍ଦେଶ

ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତ ସରକାର ପାକିସ୍ତାନ ବିରୁଦ୍ଧରେ କଠୋର ନିଷ୍ପତ୍ତି ନେଇଛନ୍ତି। ଭାରତୀୟ ସେନା, ଭାରତୀୟ ବାୟୁସେନା ଏବଂ ଭାରତୀୟ ନୌସେନା ହାଇ ଆଲର୍ଟ ମୋଡ୍‌ରେ ଅଛନ୍ତି।

ଭାରତୀୟ ନୌସେନା ଆରବ ସାଗରରେ ସତର୍କ ରହିଛି ଏବଂ ଯୁଦ୍ଧାଭ୍ୟାସ କରୁଛି। ଭାରତୀୟ ନୌସେନା ଶନିବାର ପାକିସ୍ତାନ ପାଇଁ ନିଜର ସାମୁଦ୍ରିକ କ୍ଷେତ୍ର ବନ୍ଦ କରିବା ପାଇଁ ଏକ ନିର୍ଦ୍ଦେଶ ଜାରି କରିଛି।

ନିର୍ଦ୍ଦେଶ ଅନୁସାରେ, ପାକିସ୍ତାନୀ ପତାକା ଉଡ଼ାଉଥିବା କୌଣସି ଜାହାଜକୁ ଭାରତର କୌଣସି ବନ୍ଦରରେ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ। ଭାରତୀୟ ପତାକା ଉଡ଼ାଉଥିବା କୌଣସି ଜାହାଜ ପାକିସ୍ତାନର କୌଣସି ବନ୍ଦରକୁ ଯିବ ନାହିଁ। ଭାରତ ସରକାରଙ୍କ ଜାହାଜ ଚଳାଚଳ ମହାନିର୍ଦ୍ଦେଶାଳୟ ନିର୍ଦ୍ଦେଶ ଜାରି କରିଛନ୍ତି ଏବଂ ବିଜ୍ଞପ୍ତି ମଧ୍ୟ ଜାରି କରାଯାଇଛି।

ଶନିବାର ଭାରତ ପାକିସ୍ତାନ ସହିତ ବାଣିଜ୍ୟ ସମ୍ପର୍କ ମଧ୍ୟ ଶେଷ କରିଛି। ଭାରତ ପାକିସ୍ତାନ ସହିତ ଆମଦାନି-ରପ୍ତାନି ନିଷିଦ୍ଧ କରିବା ପାଇଁ ଏକ ନିର୍ଦ୍ଦେଶ ଜାରି କରିଛି। କେନ୍ଦ୍ର ବାଣିଜ୍ୟ ଏବଂ ଶିଳ୍ପ ମନ୍ତ୍ରଣାଳୟ ଅଧୀନସ୍ଥ ବୈଦେଶିକ ବାଣିଜ୍ୟ ମହାନିର୍ଦ୍ଦେଶାଳୟ (ଡିଜିଏଫଟି) ଏ ସମ୍ପର୍କରେ ଏକ ବିଜ୍ଞପ୍ତି ଜାରି କରିଛି। 

ର୍ଦ୍ଦେଶରେ କୁହାଯାଇଛି ଯେ, ଏବେ ପାକିସ୍ତାନ ସହିତ କୌଣସି ବାଣିଜ୍ୟ ହେବ ନାହିଁ। ଭାରତରୁ ପାକିସ୍ତାନକୁ କୌଣସି ସାମଗ୍ରୀ ଯିବ ନାହିଁ କିମ୍ବା ପାକିସ୍ତାନରୁ କୌଣସି ସାମଗ୍ରୀ ଆସିବ ନାହିଁ।

ଭାରତ ସରକାରଙ୍କ ନିର୍ଦ୍ଦେଶ ପରେ, ବୈଦେଶିକ ବାଣିଜ୍ୟ ନୀତି ୨୦୨୩ ରେ ଏକ ନୂତନ ବ୍ୟବସ୍ଥା ୨.୨୦ଏ କରାଯାଇଛି। ଏହି ନିଷେଧ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଜାରି ରହିବ ବୋଲି ସୂଚନା ପ୍ରଦାନ କରାଯାଇଛି।

ଭାରତ ପକ୍ଷରୁ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ଏକ୍ସ ହ୍ୟାଣ୍ଡେଲ ଏବଂ ୟୁଟ୍ୟୁବ୍ ଚ୍ୟାନେଲକୁ ବ୍ଲକ୍ କରାଯାଇଛି। ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଏବଂ ସୂଚନା ମନ୍ତ୍ରୀଙ୍କ ଏକ୍ସ ଆକାଉଣ୍ଟଗୁଡ଼ିକୁ ମଧ୍ୟ ଅବରୋଧ କରାଯାଇଛି।

ଅଧିକ ପଢ଼ନ୍ତୁ: ପରିଚୟ ଲୁଚାଇ ବାସ କରୁଥିବା ଗିରଫ ବାଂଲାଦେଶୀଙ୍କ ଅପରାଧିକ ରେକର୍ଡ ଯାଞ୍ଚ୍

ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଏକ୍ସ ଆକାଉଣ୍ଟକୁ ବ୍ଲକ କରିଦିଆଯାଇଛି। ପାକିସ୍ତାନର ଆଇଏସପିଆର ୟୁଟ୍ୟୁବ୍ ଚ୍ୟାନେଲକୁ ବନ୍ଦ କରିଦିଆଯାଇଛି। ଏପରିକି ପାକିସ୍ତାନୀ ଅଭିନେତା-ଅଭିନେତ୍ରୀ, ପାକିସ୍ତାନୀ ଖେଳାଳି, ସାମ୍ବାଦିକ ଏବଂ ନ୍ୟୁଜ୍ ୱେବସାଇଟଗୁଡ଼ିକର ୟୁଟ୍ୟୁବ ଏବଂ ଏକ୍ସ ଆକାଉଣ୍ଟଗୁଡ଼ିକୁ ମଧ୍ୟ ଅବରୋଧ କରାଯାଇଛି।

ଅଧିକ ପଢ଼ନ୍ତୁ: ବସ୍ ଚଢ଼ିଯିବାରୁ କଟିଗଲା ଯୁବକଙ୍କ ହାତ

 India | pakistan | pahalgam-terror-attack