ଆମେରିକା ପର୍ଯ୍ୟନ୍ତ ଲକ୍ଷ୍ୟଭେଦ କରୁଥିବା ଘାତକ ପରମାଣୁ କ୍ଷେପଣାସ୍ତ୍ର ବିକଶିତ କରୁଛି ପାକିସ୍ତାନ: ୱାଶିଂଟନର ଚିନ୍ତା ବଢ଼ିଲା

ୱାଶିଂଟନ: ଆମେରିକାର ଗୁଇନ୍ଦା ସଂସ୍ଥାଗୁଡ଼ିକ ଦାବି କରିଛନ୍ତି ଯେ ପାକିସ୍ତାନ ଗୁପ୍ତ ଭାବରେ ଏକ ଆନ୍ତଃମହାଦେଶୀୟ ନ୍ୟୁକ୍ଲିୟର ବାଲିଷ୍ଟିକ୍ କ୍ଷେପଣାସ୍ତ୍ର (ଆଇସିବିଏମ) ନିର୍ମାଣ କରିବା ପାଇଁ ଦ୍ରୁତ ଗତିରେ କାମ କରୁଛି। ରିପୋର୍ଟରେ କୁହାଯାଇଛି ଯେ, ଯଦି ପାକିସ୍ତାନ ଏହି କ୍ଷମତା ହାସଲ କରେ, ତେବେ ଏହା ଆମେରିକା ଉପରେ ପରମାଣୁ ବୋମା ପକାଇବା ପାଇଁ ସକ୍ଷମ ଦେଶ ହୋଇଯିବ। ବୈଦେଶିକ ବ୍ୟାପାର ରିପୋର୍ଟରେ ଦାବି କରାଯାଇଛି ଯେ, ଭାରତ ସହିତ ଯୁଦ୍ଧ ପରେ, ପାକିସ୍ତାନ ଏବେ ଚୀନ୍ ସହିତ ନିଜର ପରମାଣୁ ଭଣ୍ଡାରକୁ ଆଗକୁ ବଢ଼ାଇବା ପାଇଁ କାମ କରୁଛି।

ଆମେରିକୀୟ ଅଧିକାରୀଙ୍କ  ସୂଚନା ଆଧାରରେ  ରିପୋର୍ଟରେ କୁହାଯାଇଛି, ଯଦି ପାକିସ୍ତାନ ଏପରି କ୍ଷେପଣାସ୍ତ୍ର ନିର୍ମାଣ କରେ, ତେବେ ୱାଶିଂଟନ ତକୁ 'ପରମାଣୁ ଶତ୍ରୁ' ଘୋଷଣା କରିବ। ପରମାଣୁ ଅସ୍ତ୍ର ଥିବା ଯେକୌଣସି ଦେଶ, ଯାହାକୁ ଆମେରିକା ପାଇଁ ଏକ ସମ୍ଭାବ୍ୟ ବିପଦ କିମ୍ବା ଶତ୍ରୁ ବୋଲି ଅନୁମାନ କରାଯାଏ, ତାହାକୁ ସାଧାରଣତଃ ଆମେରିକା ପକ୍ଷରୁ ପରମାଣୁ ବିରୋଧୀ ବୋଲି ବିବେଚନା କରାଯାଇଥାଏ। ବର୍ତ୍ତମାନ, ରୁଷିଆ, ଚୀନ୍ ଏବଂ ଉତ୍ତର କୋରିଆକୁ ଆମେରିକାର ଶତ୍ରୁ ବୋଲି ବିବେଚନା କରାଯାଉଛି।

ପାକିସ୍ତାନ ସର୍ବଦା ଦାବି କରିଆସୁଛି ଯେ, ଆମର ପରମାଣୁ କାର୍ଯ୍ୟକ୍ରମ କେବଳ ଭାରତକୁ ରୋକିବା ପାଇଁ। ଏପର୍ଯ୍ୟନ୍ତ ପାକିସ୍ତାନର କ୍ଷେପଣାସ୍ତ୍ର ନୀତି ମଧ୍ୟ କ୍ଷୁଦ୍ର ଏବଂ ମଧ୍ୟମ ଦୂରଗାମୀ କ୍ଷମତା ପର୍ଯ୍ୟନ୍ତ ସୀମିତ ରହିଛି। ପାକିସ୍ତାନର ଶାହିନ-୩ କ୍ଷେପଣାସ୍ତ୍ର , ଯାହାର ଲକ୍ଷ୍ୟଭେଦ କ୍ଷମତା ପ୍ରାୟ ୨,୭୦୦ କିଲୋମିଟର, ଭାରତର ଅନେକ ପ୍ରମୁଖ ସହରକୁ କଭର କରେ। କିନ୍ତୁ  ଇଣ୍ଟରକଣ୍ଟିନେଣ୍ଟାଲ ବାଲିଷ୍ଟିକ୍ ମିସାଇଲ(ଆଇସିବିଏମ)କୁ ୫,୫୦୦କିଲୋମିଟରରୁ ଅଧିକ ଲକ୍ଷ୍ୟଭେଦ କ୍ଷମତାର ବୋଲି ସାଧାରଣତଃ ବିବେଚନା କରାଯାଇଥାଏ। ଯାହାର ଅର୍ଥ ହେଉଛି ପାକିସ୍ତାନ ଆମେରିକା ଭଳି ଦେଶକୁ ନିଜର ମିସାଇଲ ଦ୍ବାରା ଲକ୍ଷ୍ୟଭେଦ କରିପାରିବ। 

ପାକିସ୍ତାନର କ୍ଷେପଣାସ୍ତ୍ର କ୍ଷମତା ଦେଖି ଆମେରିକା ଭୟଭୀତ! ହେବାରେ ଲାଗିଛି। ରିପୋର୍ଟରେ ଆମେରିକୀୟ ଅଧିକାରୀଙ୍କ ସୂଚନା ଆଧାରରେ କୁହାଯାଇଛି ଯେ, ଯଦି ପାକିସ୍ତାନ ଏକ ଆଇସିବିଏମ ପାଏ, ତେବେ ୱାଶିଂଟନ ପାଖରେ ଏହାକୁ ପରମାଣୁ ପ୍ରତିଦ୍ୱନ୍ଦ୍ୱୀ ବୋଲି ବିବେଚନା କରିବା ବ୍ୟତୀତ ଅନ୍ୟ କୌଣସି ବିକଳ୍ପ ରହିବ ନାହିଁ। ଆମେରିକାକୁ ଟାର୍ଗେଟ କରୁଥିବା ଆଇସିବିଏମ ଥିବା ଅନ୍ୟ କୌଣସି ଦେଶକୁ ବନ୍ଧୁ ବୋଲି ବିବେଚନା କରାଯିବ ନାହିଁ। 

ବର୍ତ୍ତମାନ ପାକିସ୍ତାନ ପାଖରେ କୌଣସି ଆଇସିବିଏମ ନାହିଁ। ୨୦୨୨ରେ, ପାକିସ୍ତାନ ଶାହିନ-୩ ଭୂପୃଷ୍ଠରୁ ଭୂପୃଷ୍ଠକୁ ନିକ୍ଷେପ କରାଯାଉଥିବା ମଧ୍ୟମ ଦୂରଗାମୀ ବାଲିଷ୍ଟିକ୍ କ୍ଷେପଣାସ୍ତ୍ର ପରୀକ୍ଷଣ କରିଥିଲା। ଯାହା ଅନେକ ଭାରତୀୟ ସହରକୁ ପାକିସ୍ତାନର ଲକ୍ଷ୍ୟଭେଦ ପରିସରକୁ ଆଣିଥିଲା। ଏକ ଆନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର ବିକଶିତ କରିବା ପଛରେ ପାକିସ୍ତାନର ଉଦ୍ଦେଶ୍ୟ ହେଉଛି ଆମେରିକା ଦ୍ବାରା ସମ୍ଭାବ୍ୟ ଆକ୍ରମଣ ହେଲେ ନିଜର ପରମାଣୁ ଅସ୍ତ୍ରାଗାର ନଷ୍ଟ କରିବାରୁ ରୋକିବା। ରିପୋର୍ଟରେ କୁହାଯାଇଛି ଯେ, ପାକିସ୍ତାନ ଏବେ ଚୀନ୍ ସହାୟତାରେ ତାର ପରମାଣୁ ଏବଂ କ୍ଷେପଣାସ୍ତ୍ର କାର୍ଯ୍ୟକ୍ରମକୁ ପ୍ରଯୁକ୍ତିବିଦ୍ୟା ଭାବରେ ଅପଗ୍ରେଡ୍ କରୁଛି। ଚୀନ୍ ଉପାଦାନ, ଇନ୍ଧନ ପ୍ରଯୁକ୍ତିବିଦ୍ୟା ଏବଂ ରାଡାର ପ୍ରଣାଳୀ ସାହାଯ୍ୟରେ, ପାକିସ୍ତାନ ଏକ ତରଳ-ଇନ୍ଧନ ଅବା କଠିନ-ଇନ୍ଧନ ଆଇସିବିଏମ ଉପରେ କାମ କରୁଥିବା ଜଣାପଡ଼ିଛି।

ଅଧିକ ପଢ଼ନ୍ତୁ: ଟ୍ରମ୍ପଙ୍କ ସାଙ୍ଗରେ ବୁଲୁଥିବା ଏର୍ଦୋଗାନଙ୍କ ମନରେ କ୍ଷମତା ଦଖଲ ଭୟ: ୧୮୨ ଅଧିକାରୀଙ୍କୁ ଗିରଫ କଲେ

ଏହି ପ୍ରସଙ୍ଗକୁ ଗମ୍ଭୀରତାର ସହ ନେଇ ୱାଶିଂଟନ୍ ଗତ ବର୍ଷ ପାକିସ୍ତାନର କ୍ଷେପଣାସ୍ତ୍ର ନିର୍ମାଣ ସଂସ୍ଥା, ନ୍ୟାସନାଲ୍ ଡେଭଲପମେଣ୍ଟ କମ୍ପ୍ଲେକ୍ସ (ଏନଡିସି) ଏବଂ ଅନ୍ୟ ତିନୋଟି କମ୍ପାନି ଉପରେ ପ୍ରତିବନ୍ଧକ ଲଗାଇଥିଲା। ଏହି ସଂସ୍ଥାଗୁଡ଼ିକୁ ପାକିସ୍ତାନର ଦୀର୍ଘ ଦୂରଗାମୀ କ୍ଷେପଣାସ୍ତ୍ର କାର୍ଯ୍ୟକ୍ରମ ପାଇଁ ଦାୟୀ ବୋଲି ବିବେଚନା କରାଯାଉଛି। ଆମେରିକାର ପ୍ରତିବନ୍ଧକ ଅଧୀନରେ, ଏହି ସଂସ୍ଥାଗୁଡ଼ିକର ଆମେରିକୀୟ ସମ୍ପତ୍ତି ଜବତ କରାଯାଇଛି ଏବଂ ଆମେରିକୀୟ କମ୍ପାନିଗୁଡ଼ିକୁ ସେମାନଙ୍କ ସହିତ ବ୍ୟବସାୟ କରିବାରୁ ବାରଣ କରାଯାଇଛି।

ପାକିସ୍ତାନ ଏହାକୁ  ବେଆଇନ କାର୍ଯ୍ୟାନୁଷ୍ଠାନ ବୋଲି କହିଥିଲା, କିନ୍ତୁ ଆମେରିକାର ବୈଦେଶିକ ବିଭାଗ ସେତେବେଳେ କହିଥିଲା ​​ଯେ ପାକିସ୍ତାନକୁ ଏପରି ଅସ୍ତ୍ର ତିଆରି କରିବାରୁ ରୋକିବା ପାଇଁ ଏହି ପଦକ୍ଷେପ ନିଆଯାଇଛି। ପାକିସ୍ତାନ ପାଖରେ ପ୍ରାୟ ୧୭୦ଟି ପରମାଣୁ ଅସ୍ତ୍ର ଅଛି ଏବଂ ଏହା ପରମାଣୁ ଅପ୍ରସାର ଚୁକ୍ତି (ଏନପିଟି)ରେ ସ୍ୱାକ୍ଷରକାରୀ ନୁହେଁ। ଏହି ଚୁକ୍ତିର ଲକ୍ଷ୍ୟ ପରମାଣୁ ଅସ୍ତ୍ରର ପ୍ରସାରକୁ ରୋକିବା ଏବଂ ପରମାଣୁ ଶକ୍ତିର ଶାନ୍ତିପୂର୍ଣ୍ଣ ବ୍ୟବହାରକୁ ପ୍ରୋତ୍ସାହିତ କରିବା।

ବିଶେଷଜ୍ଞମାନଙ୍କ ଅନୁସା‌ରେ ପାକିସ୍ତାନର ଆଇସିବିଏମ କାର୍ଯ୍ୟକ୍ରମ କେବଳ ଆମେରିକା ଉପରେ ଆକ୍ରମଣ କରିବା ପାଇଁ ନୁହେଁ, ବରଂ ଏହାକୁ ରଣନୈତିକ ବ୍ଲାକମେଲିଂର ଏକ ରୂପ ଭାବରେ ବ୍ୟବହାର କରିବା ପାଇଁ। ଏକ ଆଇସିବିଏମ ସହିତ ସଜ୍ଜିତ, ପାକିସ୍ତାନ ଆମେରିକାକୁ ସଙ୍କେତ ଦେବାକୁ ଚାହୁଁଛି ଯେ, ଯଦି ଆମେରିକା ପାକିସ୍ତାନର ପରମାଣୁ ଘାଟିଗୁଡ଼ିକୁ ନଷ୍ଟ କରିବାକୁ ଚେଷ୍ଟା କରେ କିମ୍ବା ଭାରତ ସହିତ କୌଣସି ବିବାଦକୁ ଖୋଲାଖୋଲି ସମର୍ଥନ କରେ, ତେବେ ପରିଣାମ ଗମ୍ଭୀର ହୋଇପାରେ। ଏହି ପ୍ରତିରୋଧ ଭାରତଠାରୁ ଆଗକୁ ଯାଇ ବିଶ୍ୱ ସ୍ତରରେ ନିଜକୁ  ପରମାଣୁ ବିପଦ ଭାବରେ ପ୍ରତିଷ୍ଠିତ କରିବା ପାଇଁ ପାକିସ୍ତାନର ଏକ ଯୋଜନାବଦ୍ଧ ପ୍ରୟାସ।

ଅଧିକ ପଢ଼ନ୍ତୁ: ଭିଜିଲାନ୍ସ ରେଡ୍‌ ପରେ ଶିରୋମଣି ଅକାଳୀ ଦଳ ନେତା ବିକ୍ରମ ମାଜିଥିଆ ଗିରଫ

pakistan | India | USA | ICBM