ପିକେଙ୍କ ସତର୍କ ପଦକ୍ଷେପ: ଉପ-ନିର୍ବାଚନରେ ​​ଦୁଇ ପ୍ରାର୍ଥୀ ବଦଳାଇଲେ

ପାଟନା: ବିହାରର ନିର୍ବାଚନୀ ରାଜନୀତିରେ ପ୍ରଶାନ୍ତ କିଶୋର(ପିକେ)ଙ୍କ ଦଳ ଜନ ସୁରାଜ ଉପ-ନିର୍ବାଚନ ପାଇଁ ଚାରିଜଣ ପ୍ରାର୍ଥୀଙ୍କୁ ବଦଳାଇଛି।  ରାଜ୍ୟର ରାଜନୈତିକ ସ୍ଥିତିକୁ ଦୃଷ୍ଟିରେ ରଖି  ପିକେ ସତର୍କ ହୋଇ ପଦକ୍ଷେପ ଗ୍ରହଣ କରୁଛନ୍ତି।   ପିକେ ଗୟାର ବେଲାଗଞ୍ଜ ଆସନରେ ବାରମ୍ବାର ପ୍ରାର୍ଥୀ ବଦଳାଇବା ପ୍ରକ୍ରିୟା ଜାରି ରଖିଛନ୍ତି।

ଏହାପୂର୍ବରୁ ଜନ ସୁରାଜ ପକ୍ଷରୁ  ମହମ୍ମଦ ଅମଜାଦଙ୍କୁ ଏହି ଆସନ ପାଇଁ ପ୍ରାର୍ଥୀ କରିଥିଲା। କିନ୍ତୁ ଟଙ୍କା ଅଭାବ ଦର୍ଶାଇ ଅମଜାଦ ତାଙ୍କ ନାମ ପ୍ରତ୍ୟାହାର କରି ନେଇଥିଲେ। ଏହା ପରେ ପ୍ରଫେସର ଖିଲାଫତ ହୁସେନ୍‌ଙ୍କ ନାମ ନେଇ ଚର୍ଚ୍ଚା ହୋଇଥିଲା।  

ତେବେ ପିକେ ପୁଣି ଥରେ ଅମଜାଦଙ୍କୁ  ଦଳର  ପ୍ରାର୍ଥୀ ଘୋଷିତ କରିଛନ୍ତି। ଏହି ନିଷ୍ପତ୍ତି ସମ୍ପର୍କରେ ପିକେ କହିଛନ୍ତି  ଅମଜାଦଙ୍କୁ ବୁଝାଇବା ପରେ  ବର୍ତ୍ତମାନ  ନିର୍ବାଚନରେ ​ସେ ​ପ୍ରତିଦ୍ୱନ୍ଦ୍ୱିତା କରିବାକୁ ପ୍ରସ୍ତୁତ ଅଛନ୍ତି। ଭୋଜପୁର ଜିଲ୍ଲାର ତରାରି ଆସନରେ ଜଣେ ପ୍ରାର୍ଥୀଙ୍କୁ ମଧ୍ୟ ପରିବର୍ତ୍ତନ କରାଯାଇଛି।

ସେଠାରେ ଲେଫ୍ଟନାଣ୍ଟ ଜେନେରାଲ ଶ୍ରୀକୃଷ୍ଣ ସିଂଙ୍କୁ ପ୍ରଥମ ପ୍ରାର୍ଥୀ କରାଯାଇଥିଲା, କିନ୍ତୁ ତାଙ୍କ ନାମ ବିହାରର ଭୋଟର ତାଲିକାରେ ନ ଥିଲା, ଯେଉଁଥିପାଇଁ ସେ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିପାରି ନ ଥିଲେ। ଫଳସ୍ୱରୂପ ଦଳ ଏହି ଆସନରେ ଏବେ କିରଣ ସିଂଙ୍କୁ ପ୍ରାର୍ଥୀ କରିଛି।

ବିହାରରେ ଉପ-ନିର୍ବାଚନ ପାଇଁ ଯେଉଁ ଆସନରେ ଭୋଟ୍ ଅନୁଷ୍ଠିତ ହେବ, ସେଥିରେ ଭୋଜପୁରର ତରାରି, କାଇମୁର ଜିଲ୍ଲାର ରାମଗଡ, ଗୟାର ବେଲାଗଞ୍ଜ ଏବଂ ଇମାମଗଞ୍ଜ ଅନ୍ତର୍ଭୁକ୍ତ। ନଭେମ୍ବର ୧୩ ରେ ଏହି ଚାରିଟି ଆସନରେ ମତଦାନ ଅନୁଷ୍ଠିତ ହେବ ଏବଂ ମହାରାଷ୍ଟ୍ର-ଝାଡଖଣ୍ଡ ନିର୍ବାଚନର ଫଳାଫଳ ସହିତ ଫଳାଫଳ ଘୋଷଣା କରାଯିବ। ଏହି ଉପ-ନିର୍ବାଚନରେ ​​ସମସ୍ତ ବିଧାୟକ ଲୋକସଭା ନିର୍ବାଚନରେ ​​ସାଂସଦ ଭାବରେ ନିର୍ବାଚିତ ହୋଇଛନ୍ତି। ତରାରି ବିଧାୟକ ସୁଦାମା ପ୍ରସାଦ ଆରାରୁ , ରାମଗଡ ବିଧାୟକ ସୁଧାକର ସିଂ ବକ୍ସରରୁ, ଇମାମଗଞ୍ଜ ବିଧାୟକ ଜିତନ ରାମ ମାଂଝୀ  ଗୟାରୁ  ଏବଂ ବେଲାଗଞ୍ଜ ବିଧାୟକ ସୁରେନ୍ଦ୍ର ଯାଦବ ଜେହାନାବାଦରୁ ସାଂସଦ ହୋଇଛନ୍ତି। 

ଏଥର ଉପ-ନିର୍ବାଚନରେ ​​ଗ୍ରାଣ୍ଡ ଆଲାଇନ୍ସର ବିଶ୍ୱସନୀୟତା ବିପଦରେ ରହିଛି।  ଚାରିଟି ଆସନ ମଧ୍ୟରୁ  ତିନିଟିରେ ମେଣ୍ଟର ବିଧାୟକ ଥିବାବେଳେ ଗୟାର ଇମାମଗଞ୍ଜ ଆସନରେ ଏନଡିଏର ବିଧାୟକ ରହିଥିଲେ। ଗ୍ରାଣ୍ଡ ଆଲାଏନ୍ସରୁ ଆରଜେଡି ତିନିଟି ଆସନରେ ଏବଂ ସିପିଆଇ (ଏମଏଲ) ଗୋଟିଏ ଆସନରେ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ଏନଡିଏରୁ ବିଜେପି ଦୁଇଟି ଆସନରେ ପ୍ରତିଦ୍ୱନ୍ଦ୍ୱିତା କରିବାର ସମ୍ଭାବନା ରହିଛି।  

ଜେଡିୟୁ ଏବଂ ହମ୍‌ ଗୋଟିଏ  ଗୋଟିଏ ଆସନରେ ପ୍ରତିଦ୍ୱନ୍ଦ୍ୱିତା କରିବାର ସମ୍ଭାବନା ରହିଛି। ଚଳିତ ଉପ-ନିର୍ବାଚନ ବିହାର ରାଜନୀତିରେ ଗୁରୁତ୍ୱପୂର୍ଣ୍ଣ ପ୍ରମାଣିତ ହେବାକୁ ଯାଉଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ:

ହିଜବୁଲ୍ଲାର ଭୟଙ୍କର ଯୋଜନା: ପ୍ରଥମେ ବନ୍ଧକ, ତା’ପରେ ଚୁକ୍ତି...

ଜଳବାୟୁ ପରିବର୍ତ୍ତନ ରୋକିବା ପାଇଁ ନୂତନ ଯୋଜନା: ବାୟୁମଣ୍ଡଳରେ ପକାଯିବ ହୀରାଗୁଣ୍ଡ