ମା’ଙ୍କ ୧୦୦ତମ ଜନ୍ମଦିନକୁ ଏଭଳି ଭାବେ ପାଳନ କରିବେ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ଜୁନ୍ ୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମା’ ହୀରାବେନ୍ ମୋଦୀଙ୍କ ୧୦୦ତମ ଜନ୍ମଦିନ। ନିଜ ମା’ଙ୍କ ଜନ୍ମଦିନକୁ ସ୍ବତନ୍ତ୍ର କରିବା ପାଇଁ ପ୍ରଧାନମନ୍ତ୍ରୀ ମୋଦୀ ମା’ଙ୍କୁ ଭେଟିବା ପାଇଁ ଗୁଜୁରାଟ ଗସ୍ତ କରିବେ। ଏହା ସହ ମା’ଙ୍କ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ମୋଦୀ  ବଡ଼ନଗରର ହାଟକେଶ୍ୱର ମନ୍ଦିରରେ ଏକ ପୂଜାର ଆୟୋଜନ କରିବେ ବୋଲି ଜଣାପଡ଼ିଛି। ଏହାପୂର୍ବରୁ ମାର୍ଚ୍ଚ ୧୧ ରେ ପ୍ରଧାନମନ୍ତ୍ରୀ ମୋଦୀ ଅହମ୍ମଦାବାଦରେ ତାଙ୍କ ମା’ଙ୍କୁ ଭେଟିଥିଲେ।

କରୋନା ମହାମାରୀ ହେତୁ ପ୍ରାୟ ଦୁଇ ବର୍ଷ ପରେ ପ୍ରଧାନମନ୍ତ୍ରୀ ମୋଦୀ ଏବଂ ତାଙ୍କ ମା’ ହୀରାବେନ ମୋଦୀଙ୍କ ମଧ୍ୟରେ ମାର୍ଚ୍ଚ ୧୧ ରେ ସାକ୍ଷାତ ହୋଇଥିଲା। ଇଣ୍ଡିଆ ଟୁଡେ ରିପୋର୍ଟ ଅନୁଯାୟୀ, ଜୁନ୍ ୧୮ରେ ପ୍ରଧାନମନ୍ତ୍ରୀ ମୋଦୀ ମା’ଙ୍କ ଜନ୍ମଦିନ ପାଳନ କରିବା ସହ ବିଭିନ୍ନ କାର୍ଯ୍ୟକ୍ରମରେ ଅଂଶଗ୍ରହଣ କରିବେ। ଭଦୋଦରାଠାରେ ଏକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦୀ ପ୍ରାୟ ୪ ଲକ୍ଷ ଲୋକଙ୍କୁ ସମ୍ବୋଧିତ କରିବେ।  ପ୍ରଧାନମନ୍ତ୍ରୀଙ୍କ ଏହି କାର୍ଯ୍ୟକ୍ରମ ସର୍ଦ୍ଦାର ଇଷ୍ଟେଟର ନିକଟସ୍ଥ କୁଷ୍ଠରୋଗ ହସ୍ପିଟାଲରେ ଅନୁଷ୍ଠିତ ହେବ ବୋଲି ଜଣାପଡ଼ିଛି।

ଗୋଟିଏ ମାସ ମଧ୍ୟରେ ଗସ୍ତରେ ଏହା ହେଉଛି ପ୍ରଧାନମନ୍ତ୍ରୀ ମୋଦୀଙ୍କର ଦ୍ୱିତୀୟ ଗୁଜୁରାଟ ଗସ୍ତ। ଜୁନ୍ ୧୦ରେ ତାଙ୍କର ପ୍ରଥମ ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀ ନବସାରୀର ଆଦିବାସୀ ଅଞ୍ଚଳରେ ୩୦୫୦ କୋଟି ଟଙ୍କା ମୂଲ୍ୟର ୭ଟି ପ୍ରକଳ୍ପର ଉଦଘାଟନ କରିଥିଲେ। ଏହା ବ୍ୟତୀତ ଜଳ ଯୋଗାଣରେ ଉନ୍ନତି ଆଣିବା ପାଇଁ ୧୪ରୁ ଅଧିକ ପ୍ରକଳ୍ପର ମୂଳଦୁଆ ପକାଯାଇଥିଲା।