ୱକଫ୍ ପ୍ରସଙ୍ଗରେ କଂଗ୍ରେସକୁ ଘେରିଲେ ପ୍ରଧାନମନ୍ତ୍ରୀ: ମୁସ୍‌ଲିମ୍‌ଙ୍କୁ ଦଳର ସଭାପତି କରୁନାହଁ କାହିଁକି?

ନୂଆଦିଲ୍ଲୀ: ଵକଫ୍ (ସଂଶୋଧନ) ଆଇନ ବିରୋଧରେ କଂଗ୍ରେସର ଆଭିମୁଖ୍ୟକୁ କଡ଼ା ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ପ୍ରଧାନମନ୍ତ୍ରୀ କହିଛନ୍ତି ଯେ କଂଗ୍ରେସ କେବଳ ମୁସଲମାନ ମୌଳବାଦୀମାନଙ୍କୁ ସନ୍ତୁଷ୍ଟ କରିଛି ଏବଂ ନୂଆ ଆଇନକୁ ବିରୋଧ କରିବା ଏହା ପ୍ରମାଣିତ କରୁଛି। କଂଗ୍ରେସ କାହିଁକି ଜଣେ ମୁସଲମାନ ସଭାପତିଙ୍କ ନାମ ଘୋଷଣା କରୁନାହିଁ ଏବଂ କାହିଁକି ନିର୍ବାଚନରେ ମୁସଲିମ ପ୍ରାର୍ଥୀଙ୍କ ପାଇଁ ୫୦ ପ୍ରତିଶତ ଟିକେଟ ସଂରକ୍ଷଣ କରୁନାହିଁ ବୋଲି ସେ ପ୍ରଶ୍ନ କରିଛନ୍ତି। ହରିୟାଣାର ହିସାର ବିମାନବନ୍ଦରରେ ଆୟୋଜିତ ଉତ୍ସବରେ ପ୍ରଧାନମନ୍ତ୍ରୀ ଏହା କହିଛନ୍ତି। ଆମ୍ବେଦକରଙ୍କ ଜୟନ୍ତୀ ଅବସରରେ ତାଙ୍କୁ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ଡ. ଆମ୍ବେଦକରଙ୍କ ସଂଗ୍ରାମ ତାଙ୍କ ସରକାରଙ୍କୁ ପ୍ରେରଣା ଯୋଗାଇଥାଏ। 

କଂଗ୍ରେସକୁ ଟାର୍ଗେଟ କରି ମୋଦୀ କହିଛନ୍ତି ଯେ, ବିରୋଧୀ ଦଳ ସମ୍ବିଧାନକୁ କ୍ଷମତା ହାସଲ ପାଇଁ ଅସ୍ତ୍ର କରିଛି। ଜରୁରିକାଳୀନ ପରିସ୍ଥିତି ସମୟରେ କ୍ଷମତା ବଜାୟ ରଖିବା ପାଇଁ ସମ୍ବିଧାନର ଭାବନାକୁ ହତ୍ୟା କରାଯାଇଥିଲା। ସମ୍ବିଧାନରେ ଧର୍ମନିରପେକ୍ଷ ନାଗରିକ ସଂହିତା କଥା କୁହାଯାଇଛି, କିନ୍ତୁ କଂଗ୍ରେସ ଏହାକୁ କାର୍ଯ୍ୟକାରୀ କରିନାହିଁ। ଆଜି ଉତ୍ତରାଖଣ୍ଡରେ ସମାନ ନାଗରିକ କୋଡ୍ (ୟୁସିସି) ଲାଗୁ ହୋଇଛି। ଦୁର୍ଭାଗ୍ୟବଶତଃ କଂଗ୍ରେସ ଏହାକୁ ବିରୋଧ କରୁଛି। ସଂରକ୍ଷଣର ଲାଭ ଏସ୍‌ସି/ଏସ୍‌ଟି ଓ ଓବିସି ସମ୍ପ୍ରଦାୟ ପାଖରେ ପହଂଚିଛି କି ନାହିଁ ତାହା ଯାଞ୍ଚ କରିବାକୁ କଂଗ୍ରେସ କେବେ ବି ଚିନ୍ତା କରିନାହିଁ ବୋଲି ପ୍ରଧାନମନ୍ତ୍ରୀ କହିଛନ୍ତି। ଆମ୍ବେଦକରଙ୍କ ପ୍ରତି କଂଗ୍ରେସ ଯାହା କରିଛି ତାହା ଆମେ କେବେ ବି ଭୁଲିବା ଉଚିତ ନୁହେଁ। ସେ ଜୀବିତ ଥିବା ବେଳେ ଦଳ ତାଙ୍କୁ ବାରମ୍ବାର ଅପମାନିତ କରିଥିଲା। ସେମାନେ ତାଙ୍କୁ ଦୁଇ ଥର ନିର୍ବାଚନରେ ହରାଇଥିଲେ।

ଏପରିକି ତାଙ୍କ ମୃତ୍ୟୁ ପରେ ତାଙ୍କ ସ୍ମୃତିକୁ ବିଲୋପ କରିବାକୁ ଚେଷ୍ଟା କରାଯାଇଥିଲା। ବାବାସାହେବ ସମାନତା ପାଇଁ ଠିଆ ହୋଇଥିଲେ, କିନ୍ତୁ କଂଗ୍ରେସ ସାରା ଦେଶରେ ଭୋଟ୍ ବ୍ୟାଙ୍କ ରାଜନୀତିର ଭୂତାଣୁ ବିସ୍ତାର କରିଥିଲା। ପ୍ରଧାନମନ୍ତ୍ରୀ କହିଥିଲେ ଯେ ଆମ୍ବେଦକର ଧାର୍ମିକ ଆଧାରରେ ସଂରକ୍ଷଣକୁ ପ୍ରତ୍ୟାଖ୍ୟାନ କରିଥିଲେ। କଂଗ୍ରେସର ତୁଷ୍ଟୀକରଣ ରାଜନୀତି ମୁସଲମାନଙ୍କୁ ମଧ୍ୟ କ୍ଷତି ପହଞ୍ଚାଇଛି। କଂଗ୍ରେସ କେବଳ କିଛି ମୌଳବାଦୀଙ୍କୁ ଖୁସି କରିଛି। ଏହି ଭୁଲ୍ ଆଭିମୁଖ୍ୟର ସବୁଠାରୁ ବଡ଼ ପ୍ରମାଣ ହେଉଛି ଵକଫ୍ ଆଇନ। ରାଜନୈତିକ ଫାଇଦା ଉଠାଇବା ପାଇଁ କଂଗ୍ରେସ ଵକଫ୍ ଆଇନରେ ମନଇଚ୍ଛା ପରିବର୍ତ୍ତନ କରିଛି। ମୁଁ ଏହି ଭୋଟ୍ ବ୍ୟାଙ୍କ ଭୋକିଲା ନେତାମାନଙ୍କୁ ପଚାରିବାକୁ ଚାହୁଛି, ଯଦି ଆପଣ ମୁସଲମାନଙ୍କ କଥା ଚିନ୍ତା କରନ୍ତି, ତେବେ କଂଗ୍ରେସ କାହିଁକି ଜଣେ ମୁସଲମାନଙ୍କୁ ଦଳର ସଭାପତି କରୁନାହିଁ। ମୁସଲମାନଙ୍କୁ ଲୋକସଭା ନିର୍ବାଚନରେ ୫୦ ପ୍ରତିଶତ ଟିକେଟ୍ ଦିଅନ୍ତୁ। 

ଲକ୍ଷ ଲକ୍ଷ ହେକ୍ଟର ଜମି ୱକଫ୍ ସମ୍ପତ୍ତି ବୋଲି ପ୍ରଧାନମନ୍ତ୍ରୀ କହିଥିଲେ। ଯଦି ଵକଫ୍ ସମ୍ପତ୍ତିକୁ ସଚ୍ଚୋଟ ଭାବରେ ବ୍ୟବହାର କରାଯାଇଥାନ୍ତା, ତେବେ ମୁସଲମାନ ଯୁବକମାନଙ୍କୁ ସାଇକେଲ ପଙ୍କଚର ମରାମତି କରି ଜୀବିକା ନିର୍ବାହ କରିବାକୁ ପଡ଼ି ନ ଥାନ୍ତା। କିନ୍ତୁ ମାତ୍ର କିଛି ଜମି ମାଫିଆ ଏହି ସମ୍ପତ୍ତିରୁ ଲାଭବାନ ହୋଇଥିଲେ। ଏହି ମାଫିଆମାନେ ଦଳିତ, ପଛୁଆ ବର୍ଗ ଓ ବିଧବାଙ୍କ ଜମି ଲୁଟି ନେଉଥିଲେ। ଵକଫ୍ ଆଇନରେ ଏହି ପରିବର୍ତ୍ତନ ପରେ ଗରିବଙ୍କ ଲୁଟ୍ ବନ୍ଦ ହେବ। ନୂଆ ଵକଫ୍ ଆଇନ ଅନୁଯାୟୀ ଆଦିବାସୀଙ୍କ ଜମି କିମ୍ବା ସମ୍ପତ୍ତିକୁ ଵକଫ୍ ବୋର୍ଡ ସ୍ପର୍ଶ କରିପାରିବ ନାହିଁ। ଗରିବ ମୁସଲମାନଙ୍କୁ ସେମାନଙ୍କ ଅଧିକାର ମିଳିବ। ଏହା ହିଁ ପ୍ରକୃତ ସାମାଜିକ ନ୍ୟାୟ ବୋଲି ମୋଦୀ କହିଛନ୍ତି।