ଆଇପିଏଲ ଅଭ୍ୟାସ ମ୍ୟାଚ ସମୟରୁ ଚମକାଇ ଦେଲେଣି ୧୩ବର୍ଷୀୟ ଖେଳାଳି

ନୂଆଦିଲ୍ଲୀ: ଆଇପିଏଲ ୨୦୨୫ ଆରମ୍ଭ ହେବାକୁ ଆଉ ଗୋଟିଏ ସପ୍ତାହରୁ କମ୍ ସମୟ ବାକି ଅଛି। ୧୮ତମ ସିଜିନର ପ୍ରଥମ ମ୍ୟାଚ୍ ୨୨ ମାର୍ଚ୍ଚରେ ଖେଳାଯିବ। ଆଇପିଏଲ ପୂର୍ବରୁ ୧୩ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କୁ ନେଇ ସବୁଠାରୁ ଅଧିକ ଚର୍ଚ୍ଚା ହେଉଛି।

ବୈଭବ ମାତ୍ର ୧୩ ବର୍ଷ ବୟସର, କିନ୍ତୁ ସେ ବଡ଼ବଡ଼ ବୋଲରଙ୍କ ସାମ୍ନାରେ ନିର୍ଭୀକ ଭାବରେ ଖେଳନ୍ତି। ଏହା ହେଉଛି ତାଙ୍କର ସ୍ବତନ୍ତ୍ରତା। ରାଜସ୍ଥାନ ରୟାଲ୍ସ ଆଇପିଏଲ ୨୦୨୫ ମେଗା ନିଲାମରେ ଯୁବ ଖେଳାଳି ବୈଭବଙ୍କ ଉପରେ ବିଶ୍ୱାସ ଦେଖାଇଥିଲା ଏବଂ ତାଙ୍କୁ ୧.୧୦ କୋଟି ଟଙ୍କାରେ କିଣିଥିଲା। ଆଇପିଏଲ ୨୦୨୫  ମ୍ୟାଚ ପାଇଁ ଖେଳାଳି ଭାବେ ଅଭ୍ୟାସ ଜାରି ରଖିଛନ୍ତି। ଏହି ଅଭ୍ୟାସ ସମୟରେ  ବୈଭବଙ୍କର ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ସେ ବଡ଼ ସଟ୍ ଖେଳୁ ଥିବା ଦେଖିବାକୁ ମିଳୁଛି।

ବୈଭବ ସୂର୍ଯ୍ୟବଂଶୀ ଅଭ୍ୟାସ ସମୟରେ ଖୁବ ସହଜରେ ଲମ୍ବା ଛକା ମାରୁଛନ୍ତି। ତାଙ୍କ ସଟ୍ ଏବଂ ପ୍ରତିଭା ଦେଖି ବ୍ୟାଟିଂ ପ୍ରଶିକ୍ଷକ ବିକ୍ରମ ରାଠୋର ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି। ବୈଭବଙ୍କ ପାଇଁ ସିଧାସଳଖ ପ୍ଲେଇଂ ଇଲେଭେନରେ ସ୍ଥାନ ପାଇବା ବହୁତ କଷ୍ଟକର, କିନ୍ତୁ ସେ କିଛି ମ୍ୟାଚରେ ସୁଯୋଗ ପାଇପାରିବେ।

ବୈଭବ ଏଯାବତ ତାଙ୍କ କ୍ୟାରିୟରରେ କେବଳ ଗୋଟିଏ ଟି-୨୦ ମ୍ୟାଚ୍ ଖେଳିଛନ୍ତି। ଏହି ମ୍ୟାଚରେ ସେ ଛଅଟି ବଲରେ ୧୩ ରନ୍ କରିଥିଲେ। ଆଶ୍ଚର୍ଯ୍ୟଜନକ ଭାବରେ, ଏଥିରେ ଦୁଇଟି ଛକା ମାରିଥିଲେ। 

ବୈଭବ ସୂର୍ଯ୍ୟବଂଶୀ ମାତ୍ର ୧୩ ବର୍ଷ ବୟସରେ ଆଇପିଏଲ ନିଲାମରେ ବିକ୍ରି ହୋଇଥିବା ସବୁଠାରୁ କମ ବୟସର ଖେଳାଳି ହେବା ପରେ ସେ ଚର୍ଚ୍ଚାକୁ ଆସିଥିଲେ। ଚେନ୍ନାଇରେ ଏକ ଚାରି ଦିନିଆ ମ୍ୟାଚରେ ଅଷ୍ଟ୍ରେଲିଆ ଅଣ୍ଡର-୧୯ ବିପକ୍ଷରେ ଭାରତ ଅଣ୍ଡର-୧୯ ଦଳ ପାଇଁ ଶତକ ମାରିବାର ଦୁଇ ମାସ ପରେ ୨୦୨୫ ଆଇପିଏଲ୍ ନିଲାମରେ ରାଜସ୍ଥାନ ରୟାଲ୍ସ ତାଙ୍କୁ କିଣିଥିଲା।