ଦେଶର ଜେଲରେ ବଢୁଛି କଏଦୀଙ୍କର ଅସ୍ୱାଭାବିକ ମୃତ୍ୟୁର ହାର

ନୂଆଦିଲ୍ଲୀ: ଦେଶରେ ଥିବା ଜେଲମାନଙ୍କରେ ଥିବା କଏଦୀମାନଙ୍କର ଅସ୍ୱାଭାବିକ ମୃତ୍ୟୁ ହାର ବଢିଛି | ଏନସିଆରବିର ତଥ୍ୟ ଅନୁଯାୟୀ, ୨୦୧୯ ମସିହାରେ ଜେଲରେ ଅସ୍ୱାଭାବିକ ମୃତ୍ୟୁ ସଂଖ୍ୟା ପ୍ରାୟ ୧୦.୭୪ ପ୍ରତିଶତକୁ ବୃଦ୍ଧି ପାଇଛି। ୨୦୧୭ ଦେଶର ବିଭିନ୍ନ ଜେଲରେ ଏଭଳି ମୃତ୍ୟୁ ସଂଖ୍ୟା ୧୩୩ ​​ଥିଲା ଓ ୨୦୧୮ ମସିହାରେ ଏହା ୧୪୯ କୁ ବୃଦ୍ଧି ପାଇଛି | ସେହିପରି ୨୦୧୯ ରେ ଅସ୍ୱାଭାବିକ ମୃତ୍ୟୁ ସଂଖ୍ୟା ୧୬୯ କୁ ବୃଦ୍ଧି ପାଇଛି। ଏହି ସମୟ ମଧ୍ୟରେ ୧୧୬ ଜଣ କଏଦୀ ଆତ୍ମହତ୍ୟା କରିଥିଲେ ଏବଂ ୨୦ ଜଣ ଦୁର୍ଘଟଣାରେ ପ୍ରାଣ ହରାଇଥିବା ବେଳେ ୧୦ ଜଣ ସାଥୀ କଏଦୀଙ୍କ ଦ୍ୱାରା ଏବଂ ଜଣେ ବାହାର ଲୋକଙ୍କ ଦ୍ୱାରା ହତ୍ୟାର ଶିକାର ହୋଇଥିଲେ |

ଏହି ଏନସିଆରବି ପରିସଂଖ୍ୟାନ ଦର୍ଶାଇଛି ଯେ ଲଗାତାର ତିନି ବର୍ଷ ଧରି ଏଭଳି ମୃତ୍ୟୁ ସଂଖ୍ୟା ବୃଦ୍ଧି ପାଉଛି | ଯଦି ଆମେ ଦେଶର ଜେଲରେ ମୋଟ ମୃତ୍ୟୁ ବିଷୟରେ ଆଲୋଚନା କରିବା, ତେବେ ୨୦୧୮ ବର୍ଷ ତୁଳନାରେ ୨୦୧୯ ମସିହାରେ ୩.୭୯ ପ୍ରତିଶତ କମ୍ କଏଦୀଙ୍କର ମୃତ୍ୟୁ ହୋଇଛି | ୨୦୧୮ ମସିହାରେ, ୧୮୪୫ ଜଣ କଏଦୀଙ୍କର ଦେଶର ବିଭିନ୍ନ ଜେଲରେ ମୃତ୍ୟୁ ହୋଇଥିଲା |

ସେହିପରି ୨୦୧୯ ମସିହାରେ ୧୭୭୫ ଜଣଙ୍କର ମୃତ୍ୟୁ ହୋଇଥିଲା | ୨୦୧୮ ମସିହାରେ, ୧୬୩୯ କଏଦୀଙ୍କର ସ୍ୱାଭାବିକ ଭାବେ ମୃତ୍ୟୁ ହୋଇଥିବାବେଳେ ୨୦୧୯ ମସିହାରେ, ୧୫୪୪ ଜଣ କଏଦୀଙ୍କର ସ୍ୱାଭାବିକ ଭାବେ ମୃତ୍ୟୁ ହୋଇଥିଲା । ଏଥିମଧ୍ୟରୁ ୧୪୬୬ ଜଣଙ୍କର ରୋଗ ହେତୁ ମୃତ୍ୟୁ ହୋଇଥିବାବେଳେ ବୟସାଧିକ୍ୟ ଯୋଗୁଁ ୭୮ ଜଣଙ୍କର ମୃତ୍ୟୁ ଘଟିଛି।