ୱାକଫ ଆଇନ ବିରୋଧରେ ପ୍ରତିବାଦ ଜାରି, କୋଲକାତା-ମୁମ୍ବାଇରେ ପ୍ରଦର୍ଶନ

ନୂଆଦିଲ୍ଲୀ: ଦେଶର ଅନେକ ରାଜ୍ୟରେ ନୂତନ ୱାକଫ ସଂଶୋଧନ ବିଲ୍‌ ବିରୋଧରେ ପ୍ରତିବାଦ କରାଯାଉଛି। ପଶ୍ଚିମବଙ୍ଗ, ମଧ୍ୟପ୍ରଦେଶ, ମୁମ୍ବାଇ, ଜମ୍ମୁ କଶ୍ମୀର ସମେତ ଅନେକ ରାଜ୍ୟରେ ଏହି ଆଇନ ବିରୋଧରେ ମୁସଲିମ ସଂଗଠନର ଲୋକମାନେ ରାସ୍ତାକୁ ଓହ୍ଲାଇଛନ୍ତି। ଶୁକ୍ରବାର କୋଲକାତାର ଆଲିଆ ବିଶ୍ୱବିଦ୍ୟାଳୟର ଛାତ୍ରମାନେ ଏହି ଆଇନ ବିରୋଧରେ ଏକ ରାଲି ବାହାର କରିଥିଲେ ଏବଂ ଏହାକୁ ପ୍ରତ୍ୟାହାର କରିବାକୁ ଦାବି କରିଥିଲେ। ଛାତ୍ରମାନେ କ୍ୟାମ୍ପସ ଭିତରେ ଏକ ଶୋଭାଯାତ୍ରା ବାହାର କରିଥିଲେ ଏବଂ ସ୍ଲୋଗାନ ମଧ୍ୟ ଦେଇଥିଲେ।

ରାଲିରେ ଅଂଶଗ୍ରହଣ କରିଥିବା ଜଣେ ଛାତ୍ର କହିଛନ୍ତି ଯେ ବିଜେପି 'ସବକା ସାଥ ସବକା ବିକାଶ'ର କଥା କହୁଛି, କିନ୍ତୁ ଗୋଟିଏ ସମ୍ପ୍ରଦାୟ ସହିତ ଭେଦଭାବ କରୁଛି। ମୁମ୍ବାଇରେ ଅସଦୁଦ୍ଦିନ ଓୱେସିଙ୍କ ଦଳ ଏଆଇଏମଆଇଏମର କର୍ମୀମାନେ ଶୁକ୍ରବାର ନମାଜ ପରେ ୱାକଫ ଆଇନ ବିରୋଧରେ ପ୍ରତିବାଦ କରିଥିଲେ। ମୁମ୍ବାଇର ବାଇକୁଲାରେ ଥିବା ଚିସ୍ତି ହିନ୍ଦୁସ୍ତାନୀ ମସଜିଦରେ ପ୍ରତିବାଦ କରୁଥିବା ଏଆଇଏମଆଇଏମ ନେତା ୱାରିସ ପଠାନ ଏବଂ ଅନ୍ୟ କର୍ମୀମାନଙ୍କୁ ପୁଲିସ ଅଟକ ରଖିଛି। ପୁଲିସ କହିଛି ଯେ ପ୍ରତିବାଦ ପାଇଁ କୌଣସି ଅନୁମତି ଦିଆଯାଇନଥିଲା। 

ଏଆଇଏମଆଇଏମ ନେତା ୱାରିସ ପଠାନ କହିଛନ୍ତି, ମୋଦୀ ସରକାରଙ୍କ ଦ୍ୱାରା ଆଗତ କଳା ୱାକଫ ଆଇନ ବିରୋଧରେ ପ୍ରତିବାଦ ପାଇଁ ବାଇକୁଲା ମସଜିଦର ଟ୍ରଷ୍ଟିମାନେ ଆମକୁ ଡାକିଥିଲେ। ସାରା ଦେଶରେ ଆମର ଶାନ୍ତିପୂର୍ଣ୍ଣ ପ୍ରତିବାଦ ଜାରି ରହିବ। ଆମେ ଚାହୁଁଛୁ ଯେ କୃଷି ଆଇନକୁ ବାତିଲ କରିବା ପରି ଏହି ଆଇନକୁ ମଧ୍ୟ ପ୍ରତ୍ୟାହାର କରାଯାଉ।

ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌରେ ୱାକଫ ଆଇନ ବିରୋଧରେ ସିଆ ସମ୍ପ୍ରଦାୟର ଲୋକମାନେ ପ୍ରଦର୍ଶନ କରିଛନ୍ତି। ଶୁକ୍ରବାର ନମାଜ ପରେ, ସିଆ ଧାର୍ମିକ ନେତା କଲବେ ଜାୱାଦଙ୍କ ନେତୃତ୍ୱରେ ଏହି ପ୍ରତିବାଦ କରାଯାଇଥିଲା। ପ୍ରତିବାଦକାରୀମାନେ ହାତରେ ପ୍ଲାଗକାର୍ଡ ଧରିଥିଲେ ଯେଉଁଥିରେ ୱାକଫ ସଂଶୋଧନ ବିରୋଧରେ ସ୍ଲୋଗାନ ଲେଖାଯାଇଥିଲା। 

ଜମ୍ମୁ କଶ୍ମୀରରେ ପିଡିପି ଶୁକ୍ରବାର ୱାକଫ ଆଇନ ବିରୋଧରେ ପ୍ରତିବାଦ କରିଥିଲା। ଦଳ କେନ୍ଦ୍ର ସରକାର ଏହାକୁ ମୁସଲମାନମାନଙ୍କୁ ପାର୍ଶ୍ୱରେ ରଖିବା ପାଇଁ ବ୍ୟବହାର କରୁଥିବା ଅଭିଯୋଗ କରିଛି। ହାତରେ ପ୍ଲାଗକାର୍ଡ ଧରି ବିକ୍ଷୋଭକାରୀମାନେ 'ୱାକଫ ବିଲ୍ ଗ୍ରହଣୀୟ ନୁହେଁ' ସ୍ଲୋଗାନ ମଧ୍ୟ ଦେଇଥିଲେ। ଯେତେବେଳେ କର୍ମୀମାନେ ସହର ମଧ୍ୟଭାଗରେ ପ୍ରତିବାଦ କରିବାକୁ ଦଳୀୟ କାର୍ଯ୍ୟାଳୟରୁ ବାହାରକୁ ଆସିଲେ, ପୁଲିସ ସେମାନଙ୍କୁ ଅଟକାଇଥିଲା। ରାଜସ୍ଥାନରେ ମଧ୍ୟ ନୂତନ ୱାକଫ ଆଇନ ବିରୋଧରେ ଅନେକ ସ୍ଥାନରେ ମସଜିଦ ବାହାରେ ପ୍ରତିବାଦ କରାଯାଇଥିଲା।