ମୁଁ ଜୀବନରେ ସବୁଠି ବିଫଳ ହୋଇଛି, ତୁମ ପୁଅ ହେବାକୁ ଯୋଗ୍ୟ ନୁହଁ; ଏଭଳି ଲେଖି ଜୀବନ ହାରିଲେ ଯୁବକ

ପୁଣେ: ମୁଁ ଜୀବନରେ ସବୁଠି ବିଫଳ ହୋଇଛି, ତୁମ ପୁଅ ହେବାକୁ ଯୋଗ୍ୟ ନୁହଁ। ଏଭଳି ଲେଖି ଜୀବନ ହାରିଲେ ଯୁବକ। ସବୁଠାରୁ ଆଶ୍ଚର୍ଯ୍ୟଜନକ କଥା ହେଲା ଦିବାଲୋକରେ ନିଜ ଅଫିସ ଛାତରୁ ଡେଇଁ ଯୁବକଜଣକ ଜୀବନ ହାରିଛନ୍ତି। ଅଫିସ ବୈଠକ ଚାଲିଥିବା ବେଳେ ଛାତିରେ ଯନ୍ତ୍ରଣା ହେଉଛି ବୋଲି କହି ବାହାରକୁ ଆସିଥିଲେ ଏବଂ ସପ୍ତମ ମହଲାରୁ ‌ଡେଇଁ ଯୁବକଜଣକ ଜୀବନ ହାରିଥିବା ଜଣାଯାଇଛି। ମୃତକଜଣକ ହେଲେ ନାସିକ୍‌ର ପିୟୁଷ ଅଶୋକ କୱାଡେ।

ସୂଚନା ମୁତାବକ, ପିୟୁଷ ହିଞ୍ଜେୱାଡି ଫେଜ୍ ୱାନରେ ଥିବା ଆଟଲାସ୍ କପକୋରେ ଦେଢ଼ ବର୍ଷରୁ ଅଧିକ ସମୟ ହେଲାଣି ଚାକିରି କରିଥିଲେ। ନାସିକର ମୂଳ ବାସିନ୍ଦା ପୀୟୁଷ ଏକ ବୈଠକରେ ଯୋଗ ଦେଉଥିବା ବେଳେ ହଠାତ୍ ଛାତିରେ ଯନ୍ତ୍ରଣା ହେବାରୁ କ୍ଷମା ମାଗି ବାହାରକୁ ଚାଲିଆସିଥିଲେ। ଏହା ପରେ ଜୀବନ ହାରିବା ଭଳି ଚରମ ପଦକ୍ଷେପ ନେଇଥିଲେ।

ପୁଲିସ ଅଧିକାରୀଙ୍କ ଅନୁଯାୟୀ, ଘଟଣାଟି ସକାଳ ପ୍ରାୟ ୧୦:୩୦ ସମୟରେ ଘଟିଥିଲା। ସେ ଛାତିରେ ଯନ୍ତ୍ରଣା ଅନୁଭବ କରୁଥିବା ଅଭିଯୋଗ କରି ବୈଠକ ଅଧାରେ ଛାଡ଼ି ଚାଲିଯାଇଥିଲେ ଏବଂ କିଛି ମିନିଟ୍ ପରେ ସପ୍ତମ ମହଲାରୁ ଡେଇଁ ପଡ଼ିଥିଲେ। ହଠାତ୍ ପିୟୁଷଙ୍କ ଏଭଳି ପଦକ୍ଷେପ ତାଙ୍କ ସହକର୍ମୀମାନଙ୍କୁ ଆଶ୍ଚର୍ଯ୍ୟ କରିଦେଇଛି।

ଏକ ସୁଇସାଇଡ୍‌ ନୋଟ୍ ମଧ୍ୟ ପୁଲିସ ହାତରେ ଲାଗିଛି, ଯେଉଁଥିରେ ପୀୟୁଷ ଗଭୀର ଅନୁତାପ ଏବଂ ବ୍ୟକ୍ତିଗତ ବିଫଳତାର ବିଷୟରେ ଲେଖିଛନ୍ତି। "ମୁଁ ଜୀବନରେ ସବୁଠି ବିଫଳ ହୋଇଛି। ମୋତେ କ୍ଷମା କର। ମୁଁ ତୁମ ପୁଅ ହେବାକୁ ଯୋଗ୍ୟ ନୁହଁ। ମୋର ଏଭଳି କାମ ପାଇଁ ମୋତେ କ୍ଷମା କରିବ ବାପା।" ତେବେ ଆତ୍ମହତ୍ୟାର କାରଣ ଭାବରେ କୌଣସି କାର୍ଯ୍ୟ ସମ୍ବନ୍ଧୀୟ ଚାପ କିମ୍ବା ବୃତ୍ତିଗତ ସମସ୍ୟା ଉଲ୍ଲେଖ କରାଯାଇ ନାହିଁ। ତେଣୁ ପିୟୁଷଙ୍କୁ କେଉଁ ଘଟଣା ଏଭଳି ପଦକ୍ଷେପ ନେବାକୁ ବାଧ୍ୟ କଲା ତାହା ଜାଣିବା ପାଇଁ ପୁଲିସ ଏବେ ତଦନ୍ତ ଆରମ୍ଭ କରିଛି।