ଅନ୍ୟ କାହାର ଦୋଷର ଦଣ୍ଡ ଆମେ ଭୋଗୁଛୁ: ଭାରତ ଛାଡୁଥିବା ପାକିସ୍ତାନୀ ମହିଳା

ନୂଆଦିଲ୍ଲୀ: ଜମ୍ମୁ- କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ସାଧାରଣ ନାଗରିକ ଏବଂ ପର୍ଯ୍ୟଟକଙ୍କ ସମେତ ୨୬ ଜଣଙ୍କ ମୃତ୍ୟୁ ପରେ ପ୍ରାୟ ଏକ ସପ୍ତାହ ପରେ ଭାରତରୁ ପାକିସ୍ତାନୀ ନାଗରିକମାନଙ୍କୁ ବାହାର କରାଯାଉଛି।

 ଗୁରୁବାର ପରଠାରୁ ପ୍ରାୟ ୭୦୦ ଜଣ କେବଳ ଅଟାରୀ-ୱାଘା ସୀମା ଦେଇ ଚାଲିଯାଇଛନ୍ତି। ଯେଉଁଥିରେ ପର୍ଯ୍ୟଟକ ଏବଂ ଚିକିତ୍ସା ପାଇଁ ଭାରତ ଆସିଥିବା ଲୋକମାନେ ମଧ୍ୟ ସାମିଲ ଅଛନ୍ତି। ଅନେକ ସ୍ୱୀକାର କରିଛନ୍ତି ଯେ ସେମାନଙ୍କର କୌଣସି ବିକଳ୍ପ ନାହିଁ। ସେମାନେ ଦୁଃଖ ପ୍ରକାଶ କରିଛନ୍ତି ଏବଂ ପରିସ୍ଥିତି ଉପରେ ପ୍ରଶ୍ନ ଉଠାଇଛନ୍ତି।

ଅଟାରୀ-ୱାଘା ସୀମା ପାର ହେବା ପୂର୍ବରୁ ଜଣେ ମହିଳା କହିଛନ୍ତି ଯେ ସେ ମହାରାଷ୍ଟ୍ରର ନାଗପୁର ବୁଲିବାକୁ ଯାଇଥିଲେ। ସେ ଏହା ମଧ୍ୟ ଦର୍ଶାଇଥିଲେ ଯେ ତାଙ୍କୁ ଅନ୍ୟ ଜଣଙ୍କ ପାପ ପାଇଁ 'ଦଣ୍ଡ' ଦିଆଯାଉଛି।

"ଆମେ ଫେରିଯାଉଛୁ। ମାତ୍ର ଅନ୍ୟ କାହାର ଦୋଷର ଦଣ୍ଡ ଆମେ ଭୋଗୁଛୁ’’ ବୋଲି ମହିଳା ଜଣକ ନ୍ୟୁଜ୍‌ ଏଜେନ୍ସିକୁ କହିଛନ୍ତି। 

ଉଲ୍ଲେଖଯୋଗ୍ୟ, ସରକାରଙ୍କ ନିର୍ଦ୍ଦେଶ ପରେ ପଞ୍ଜାବର ଅଟାରୀ-ୱାଘା ସୀମାରେ ଜଣେ ଭାରତୀୟ ମହିଳାଙ୍କୁ ପାକିସ୍ତାନ ପାର ହେବା ସମୟରେ ଅଟକାଯାଇଥିବା ଅଭିଯୋଗ ହୋଇଛି। ଉତ୍ତର ପ୍ରଦେଶର ମିରଟର ବାସିନ୍ଦା ସାନା ଜଣେ ପାକିସ୍ତାନୀ ନାଗରିକଙ୍କୁ ବିବାହ କରିଛନ୍ତି। ହେଲେ ତାଙ୍କ ପାଖରେ ଭାରତୀୟ ପାସପୋର୍ଟ ଥିବାରୁ ତାଙ୍କୁ ସୀମାରେ ଅଟକାଯାଇଛି। ତେବେ ତାଙ୍କର ଏକ ତିନି ବର୍ଷର ପୁଅ ଏବଂ ଏକ ବର୍ଷର ଝିଅଙ୍କ ନିକଟରେ ପାକିସ୍ତାନୀ ପାସପୋର୍ଟ ଥିବାରୁ ସେମାନଙ୍କୁ ଦେଶ ଛାଡ଼ିବାକୁ କୁହାଯାଇଥିଲା।