ମୋଦୀଜୀଙ୍କ ଆତ୍ମବିଶ୍ବାସକୁ ଦୋହଲାଇ ଦେଇଛି ଇଣ୍ଡିଆ ଗଠବନ୍ଧନ: ରାହୁଲ ଗାନ୍ଧୀ

ନୂଆଦିଲ୍ଲୀ: ମୋଦୀଜୀଙ୍କ ଆତ୍ମବିଶ୍ବାସକୁ ଦୋହଲାଇ ଦେଇଛି ଇଣ୍ଡିଆ ଗଠବନ୍ଧନ। ରାହୁଲ ଗାନ୍ଧୀ ଗୁରୁବାର ଶ୍ରୀନଗରରେ ପହଞ୍ଚି କଂଗ୍ରେସ କର୍ମୀଙ୍କୁ ସମ୍ବୋଧିତ କରିବା ବେଳେ ଏଭଳି କହିଥିଲେ ବୋଲି ଜଣାପଡ଼ିଛି। ସେ ଲୋକମାନଙ୍କୁ ଆଶ୍ୱାସନା ଦେଇଥିଲେ ଯେ ସେମାନଙ୍କର ସମସ୍ୟାର ସମାଧାନ ହେବ ଏବଂ କଂଗ୍ରେସ ଦଳ ସେମାନଙ୍କ ସହ ଛିଡା ହେବ। ଏହି ଗସ୍ତ ସମୟରେ ରାହୁଲ ଆହୁରି ସୂଚାଇ ଦେଇଥିଲେ ଯେ ସେମାନେ ଆଗାମୀ ନିର୍ବାଚନରେ ​​ଜମ୍ମୁ କଶ୍ମୀରରେ ପରିସ୍ଥିତିକୁ ଗମ୍ଭୀରତାର ସହ ଗ୍ରହଣ କରିବେ ଏବଂ ଦଳୀୟ କର୍ମୀଙ୍କ କଠିନ ପରିଶ୍ରମ ଏବଂ ସମ୍ମାନ ରକ୍ଷା କରିବେ।

ରାହୁଲ ଗାନ୍ଧୀ ତାଙ୍କ ସମ୍ବୋଧନରେ ଲୋକସଭା ନିର୍ବାଚନର ଫଳାଫଳ ବିଷୟରେ ଉଲ୍ଲେଖ କରି କହିଥିଲେ, "ଯେତେବେଳେ ଦେଶର ବିଭିନ୍ନ ରାଜ୍ୟରେ ନିର୍ବାଚନ ହେବ ବୋଲି ଘୋଷଣା ହେଲା, ମୁଁ ଖଡଗେଜୀଙ୍କୁ ଭେଟିଥିଲି। ତା’ପରେ ଆମେ ସ୍ଥିର କଲୁ ଯେ ପ୍ରଥମେ ଜମ୍ମୁ କଶ୍ମୀର ଯିବା ଉଚିତ। କାରଣ ଆମେ ଦେଶର ଲୋକଙ୍କୁ ଏକ ବାର୍ତ୍ତା ଦେବାକୁ ଚାହୁଁଛୁ ଯେ ଜମ୍ମୁ କଶ୍ମୀରର ପ୍ରତିନିଧିତ୍ୱ ଆମ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ। ସ୍ବାଧୀନତା ପରେ ଭାରତ ଇତିହାସରେ ଏହା ପ୍ରଥମ ଥର ଘଟିଲା, ଯେଉଁଠି ଏକ ରାଜ୍ୟକୁ କେନ୍ଦ୍ରଶାସିତ ଅଞ୍ଚଳ କରାଗଲା। ଯେଉଁ ଡର ସହ ଆପଣ ବଞ୍ଚୁଛନ୍ତି, ତାକୁ ମୁଁ ସମ୍ପୂର୍ଣ୍ଣ ଭାବେ ହଟାଇବାକୁ ଚାହୁଛି। ଗଠବନ୍ଧନ  ହେବ, କିନ୍ତୁ କଂଗ୍ରେସ କର୍ମୀଙ୍କୁ ସମ୍ମାନ ଦିଆଯାଇ କରାଯିବ। କାରଣ ଆପଣ କଂଗ୍ରେସ ପାର୍ଟିର ବୃଦ୍ଧି ତଥା ଭାରତର ସୁରକ୍ଷା ପାଇଁ ସାରା ଜୀବନ ବିତାଇଛନ୍ତି।"

ସେ ଆହୁରି କହିଥିଲେ, "ଇଣ୍ଡିଆ ଗଠବନ୍ଧନ ଲୋକସଭା ନିର୍ବାଚନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆତ୍ମବିଶ୍ୱାସକୁ ଦୋହଲାଇ ଦେଇଛି। ନରେନ୍ଦ୍ର ମୋଦୀଙ୍କୁ ରାହୁଲ ଗାନ୍ଧୀ ନୁହନ୍ତି, ବରଂ କଂଗ୍ରେସ ପାର୍ଟି, ଇଣ୍ଡିଆ ଗଠବନ୍ଧନ, ଲୋକଙ୍କ ଭଲପାଇବା ଓ ଏକତା ପରାସ୍ତ କରିଛି। "