ମମତାଙ୍କୁ ସମର୍ଥନ କଲେ ରାହୁଲ: ରାଷ୍ଟ୍ରପତିଙ୍କୁ ଚିଠି ଲେଖିଲେ

ନୂଆଦିଲ୍ଲୀ: କଂଗ୍ରେସ ସାଂସଦ ଏବଂ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ପୁଣି ଥରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସମର୍ଥନରେ ବାହାରିଛନ୍ତି। ସୁପ୍ରିମକୋର୍ଟଙ୍କ ଶିକ୍ଷକ ନିଯୁକ୍ତି ପ୍ରକ୍ରିୟା ରଦ୍ଦ ରାୟ ପରେ ହଜାର ହଜାର ଶିକ୍ଷକଙ୍କ ଚାକିରି ବଞ୍ଚାଇବା ପାଇଁ ସେ ଏକ ବଡ଼ ପଦକ୍ଷେପ ନେଇଛନ୍ତି। ରାହୁଲ ଗାନ୍ଧୀ ମଙ୍ଗଳବାର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠି ଲେଖି ଏହି ମାମଲାରେ ହସ୍ତକ୍ଷେପ କରିବାକୁ ଦାବି କରିଛନ୍ତି। ଚିଠିରେ ସେ ସେହି ଶିକ୍ଷକମାନଙ୍କ ପାଇଁ ନ୍ୟାୟ ଲାଗି ଆବେଦନ କରିଛନ୍ତି। ରାହୁଲ କହିଛନ୍ତି ଯେ, ଏହି ଲୋକମାନେ ଚୟନ ପ୍ରକ୍ରିୟାକୁ ନିରପେକ୍ଷ ଭାବରେ ପାସ୍ କରିଥିଲେ। କିନ୍ତୁ ସୁପ୍ରିମକୋର୍ଟଙ୍କ ରାୟ ପରେ ସେମାନେ ଚାକିରି ହରାଇଲେ।

ରାହୁଲ ଗାନ୍ଧୀ ତାଙ୍କ ଅଫିସିଆଲ୍ ସୋସିଆଲ ମିଡିଆ ଏକ୍ସ ହ୍ୟାଣ୍ଡେଲରେ ଏହି ସୂଚନା ଦେଇ ଲେଖିଛନ୍ତି, ମୁଁ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠି ଲେଖିଛି। ନ୍ୟାୟପାଳିକା ଶିକ୍ଷକ ନିଯୁକ୍ତି ପ୍ରକ୍ରିୟା ରଦ୍ଦ କରିବା ପରେ ପଶ୍ଚିମବଙ୍ଗର ହଜାର ହଜାର ଯୋଗ୍ୟ ସ୍କୁଲ ଶିକ୍ଷକଙ୍କ ଚାକିରି ହରାଇଥିବା କ୍ଷେତ୍ରରେ ଦ୍ରୌପଦୀ ମୁର୍ମୁ ଜୀଙ୍କଠାର ତାଙ୍କର ଦୟାର ହସ୍ତକ୍ଷେପ ମୁଁ ଲୋଡ଼ିଛି। ନିରପେକ୍ଷ ଭାବରେ ମନୋନୀତ ପ୍ରାର୍ଥୀମାନଙ୍କୁ ସେମାନଙ୍କର ଚାକିରି ବଜାୟ ରଖିବା ପାଇଁ ଅନୁମତି ଦେବା ପାଇଁ ମୁଁ ଦ୍ରୌପଦୀ ମୁର୍ମୁଙ୍କୁ ସରକାରଙ୍କୁ ନିର୍ଦ୍ଦେଶ ଦେବାକୁ ଅନୁରୋଧ କରିଛି।

୨୦୧୬ ମସିହାରେ ପଶ୍ଚିମବଙ୍ଗରେ ସ୍କୁଲ ସେବା ଆୟୋଗ (ଏସଏସସି) ଦ୍ୱାରା ପରିଚାଳିତ ଶିକ୍ଷକ ନିଯୁକ୍ତି ପ୍ରକ୍ରିୟାରେ ଅନିୟମିତତା ଅଭିଯୋଗ ଆସିବା ପରେ କୋଲକାତା ହାଇକୋର୍ଟ ଏହାକୁ ରଦ୍ଦ କରିଦେଇଥିଲେ। ଏହି ନିଷ୍ପତ୍ତିକୁ ସୁପ୍ରିମକୋର୍ଟ ସମ୍ପ୍ରତି କାଏମ୍ ରଖିଛନ୍ତି। ଯାହା ପରେ ୨୫,୭୫୩ ଜଣ ଶିକ୍ଷକ ଏବଂ ଅଣଶିକ୍ଷକ କର୍ମଚାରୀଙ୍କ ନିଯୁକ୍ତି ରଦ୍ଦ କରାଯାଇଛି।

ହାଇଲାଇଟ୍ସ :

ଶିକ୍ଷକଙ୍କ ଚାକିରି ବଞ୍ଚାଇବା ପାଇଁ ରାହୁଲ ଗାନ୍ଧୀ ରାଷ୍ଟ୍ରପତିଙ୍କୁ ଚିଠି ଲେଖିଲେ।
ରାହୁଲ ଗାନ୍ଧୀ ମମତା ବାନାର୍ଜୀଙ୍କୁ ସମର୍ଥନ କଲେ।
ସୁପ୍ରିମକୋର୍ଟଙ୍କ ନିଷ୍ପତ୍ତି ଉପରେ ହସ୍ତକ୍ଷେପ କରିବାକୁ ରାହୁଲ ଦାବି କରିଛନ୍ତି।

ସୁପ୍ରିମକୋର୍ଟରେ, ମୁଖ୍ୟ ବିଚାରପତି ସଞ୍ଜିବ ଖାନ୍ନା ଏବଂ ବିଚାରପତି ସଞ୍ଜୟ କୁମାରଙ୍କ ଖଣ୍ଡପୀଠ ତୃଣମୂଳ କଂଗ୍ରେସ (ଟିଏମସି) ସରକାରଙ୍କୁ ଏକ ନୂତନ ଚୟନ ପ୍ରକ୍ରିୟା ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ। ଏହି ନିଷ୍ପତ୍ତି ପରେ, ପ୍ରଭାବିତ ଶିକ୍ଷକମାନେ 'ଯୋଗ୍ୟ ଶିକ୍ଷକ ଏବଂ ଶିକ୍ଷକ ଅଧିକାର ମଞ୍ଚ' ନାମକ ଏକ ସଂଗଠନ ଗଠନ କରି ସେମାନଙ୍କର ଲଢ଼େଇକୁ ଆଗକୁ ବଢାଇଛନ୍ତି ଏବଂ ୨୧ ଏପ୍ରିଲରେ ନବନ୍ନା ଅଭିଯାନ ଘୋଷଣା କରିଛନ୍ତି। ତଥାପି, ସେମାନେ କହିଛନ୍ତି ଯେ, ଯଦି ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କୁ ଏପ୍ରିଲ ୧୫ ସୁଦ୍ଧା ଭେଟିବେ, ତେବେ ସେମାନେ ଏହି ଅଭିଯାନ ପ୍ରତ୍ୟାହାର କରିବେ।

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଥିଲେ, ଯେଉଁମାନେ ଚାକିରି ହରାଇଛନ୍ତି ସେମାନଙ୍କ ସହିତ ଆମେ ଠିଆ ହୋଇଛୁ। ରାହୁଲ ଗାନ୍ଧୀ ଏହି ମାମଲାରେ ମମତା ବାନାର୍ଜୀଙ୍କୁ ସମର୍ଥନ କରିଛନ୍ତି ଏବଂ ରାଷ୍ଟ୍ରପତିଙ୍କ ହସ୍ତକ୍ଷେପ ଦାବି କରିଛନ୍ତି।

ଅଧିକ ପଢ଼ନ୍ତୁ: ଦଳିତ ନେତାଙ୍କ ପୂଜାର୍ଚ୍ଚନା ପରେ ମନ୍ଦିରରେ କାହିଁକି ଗଙ୍ଗାଜଳ ଛିଞ୍ଚି ଶୁଦ୍ଧିକରଣ କରାଯାଇଥିଲା, ବିଜେପି କ୍ଷମା ମାଗିବା ଉଚିତ୍: ଜୟରାମ ରମେଶ

ରାହୁଲ ଗାନ୍ଧୀ ତାଙ୍କ ପତ୍ରରେ ରାଷ୍ଟ୍ରପତିଙ୍କୁ ଅନୁରୋଧ କରିଛନ୍ତି ଯେ, ସେ ସରକାରଙ୍କୁ ନିର୍ଦ୍ଦେଶ ଦିଅନ୍ତୁ, ଚୟନ ପ୍ରକ୍ରିୟାରେ ନିରପେକ୍ଷ ଭାବରେ ଉତ୍ତୀର୍ଣ୍ଣ ହୋଇଥିବା ପ୍ରାର୍ଥୀମାନଙ୍କ ଚାକିରି ବଜାୟ ରଖାଯିବ। ସୁପ୍ରିମକୋର୍ଟଙ୍କ ରାୟ ପରେ ଏହି ଦାବି ଏକ ନୂତନ ରାଜନୈତିକ ମୋଡ଼ ଆଣିପାରେ।

କାରଣ ଏହି ମାମଲା କେବଳ ଶିକ୍ଷକଙ୍କ ଜୀବିକା ସହିତ ଜଡିତ ନୁହେଁ ବରଂ ପଶ୍ଚିମବଙ୍ଗରେ ଶାସକ ଟିଏମସି ଏବଂ ବିରୋଧୀ ଦଳଗୁଡ଼ିକ ମଧ୍ୟରେ ଉତ୍ତେଜନା ବୃଦ୍ଧି କରିପାରେ ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ: ଶକ୍ତିପୀଠକୁ ଉଡ଼ିବ ହେଲିକପ୍ଟର! ଖୁବ୍‌ ଶୀଘ୍ର ନୂଆ କରିଡ଼ର ଘୋଷଣା

mamata-banerjee | Rahul Gandhi | West Bengal | President of India | President Droupadi Murmu