ମୋଦୀଙ୍କ ସହ ବିତର୍କ ପାଇଁ ମୁଁ ପ୍ରସ୍ତୁତ କହିଲେ ରାହୁଲ: ବିଜେପି ପ୍ରଶ୍ନ କଲା କିଏ ତୁମେ ?

ନୂ୍ଆଦିଲ୍ଲୀ: ଲୋକସଭା ନିର୍ବାଚନକୁ ନେଇ ଦେଶର ରାଜନୈତିକ ବାତାବରଣ ଉଷ୍ଣ ରହିଛି। ଶାସକ ଦଳ ଏବଂ ବିରୋଧୀ ଦଳ ମଧ୍ୟରେ ଆରୋପ ଏବଂ ପ୍ରତ୍ୟାରୋପ ଜାରି ରହିଛି। ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ନିର୍ବାଚନ ବିତର୍କ କରିବା ପାଇଁ ଦୁଇ ପୂର୍ବତନ ବିଚାରପତି ତଥା ଜଣେ ବରିଷ୍ଠ ସାମ୍ବାଦିକଙ୍କ ଆହ୍ବାନକୁ କଂଗ୍ରେସ ନେତା ରାହୁଲ ଗାନ୍ଧୀ ଗ୍ରହଣ କରିଛନ୍ତି। ସେ ସ୍ପଷ୍ଟ ଭାବେ କହିଛନ୍ତି ଯେ ସେ ପ୍ରଧାନମନ୍ତ୍ରୀ ମୋଦୀଙ୍କ ସହ ବିଭିନ୍ନ ପ୍ରସଙ୍ଗରେ ବିତର୍କ କରିବାକୁ ପ୍ରସ୍ତୁତ।

ରାହୁଲ ଗାନ୍ଧୀ ଏହି ବିବୃତ୍ତି ଦେବା ପରେ ବିଜେପି ଏହାର ଜବାବ ଦେଇଛି। ବିଜେପି କହିଛି ଯେ ରାହୁଲ ଗାନ୍ଧୀଙ୍କୁ  ଛାଡିଦିଅ, ଏପରିକି କଂଗ୍ରେସ ମଧ୍ୟ ରାହୁଲ ଗାନ୍ଧୀଙ୍କୁ ପ୍ରଧାନମନ୍ତ୍ରୀ ପଦର ଚେହେରା କରିପାରି ନାହିଁ। ଏଭଳି ପରିସ୍ଥିତିରେ ରାହୁଲ ଗାନ୍ଧୀ କିଏ, ଯାହାଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିତର୍କ କରିବା ଉଚିତ ତାହା କଂଗ୍ରେସ କହିବା ଆବଶ୍ୟକ।

ପ୍ରକୃତରେ ଅବସରପ୍ରାପ୍ତ ଜଷ୍ଟିସ୍ ମଦନ ବି. ଲୋକୁର, ଜଷ୍ଟିସ ଅବସରପ୍ରାପ୍ତ ଅଜିତ ପି ଶାହା ଏବଂ ବରିଷ୍ଠ ସାମ୍ବାଦିକ ଏନ.ରାମ ପ୍ରସ୍ତାବ ଦେଇଥିଲେ ଯେ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ପ୍ରମୁଖ ରାଜନୈତିକ ଦଳର ନେତାମାନେ ଜନସାଧାରଣଙ୍କ ସମ୍ମୁଖରେ ବିତର୍କରେ ଅଂଶଗ୍ରହଣ କରିବା ଉଚିତ ଏବଂ ସେମାନଙ୍କ ଏଜେଣ୍ଡା ବିଷୟରେ ଜଣାଇବା ଜରୁରୀ। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଗୋଟିଏ ପର୍ଯ୍ୟାୟରେ ବିତର୍କ କରିବାକୁ ନିମନ୍ତ୍ରଣ କରାଯାଇଥିଲା କଂଗ୍ରେସ ନେତା ରାହୁଲ ଗାନ୍ଧୀ ଏହି ନିମନ୍ତ୍ରଣକୁ ଗ୍ରହଣ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ସାଧାରଣ ବିତର୍କ ପାଇଁ ପ୍ରସ୍ତୁତ ବୋଲି କହିଛନ୍ତି।

ପ୍ରକୃତରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଏବଂ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦୀଙ୍କ ସହ ବିତର୍କ ପାଇଁ ନିମନ୍ତ୍ରଣ ପାଇଥିଲେ। ଏହାର ପ୍ରତିକ୍ରିୟାରେ ରାହୁଲ ଗାନ୍ଧୀ ଏକ୍ସ ପ୍ଲାଟଫର୍ମରେ ଲେଖିଛନ୍ତି ଯେ ଏକ ଶକ୍ତିଶାଳୀ ଗଣତନ୍ତ୍ର ପାଇଁ ପ୍ରମୁଖ ଦଳଗୁଡିକ ଗୋଟିଏ ପ୍ଲାଟଫର୍ମରେ ନିଜର ମତ ଉପସ୍ଥାପନ କରିବା ଏକ ଉତ୍ତମ ପଦକ୍ଷେପ। କଂଗ୍ରେସ ଏହି ପଦକ୍ଷେପକୁ ସ୍ୱାଗତ କରୁଛି ଏବଂ ଆଶା କରୁଛି ଏହି ଆଲୋଚନାରେ ପ୍ରଧାନମନ୍ତ୍ରୀ ମୋଦୀ ମଧ୍ୟ ଭାଗ ନେବେ।

ରାହୁଲ ଗାନ୍ଧୀଙ୍କ ଟୁଇଟ୍ ପ୍ରକାଶ ପାଇବା ପରେ ବହୁ ବିଜେପି ନେତା ଏହା ଉପରେ ପ୍ରତିକ୍ରିୟା ଦେଇଛନ୍ତି। ଏଭଳି ପରିସ୍ଥିତିରେ କର୍ଣ୍ଣାଟକର ବିଜେପି ସାଂସଦ ତେଜସ୍ୱୀ ସୂର୍ଯ୍ୟ ଟୁଇଟ୍ କରି ଲେଖିଛନ୍ତି ରାହୁଲ ଗାନ୍ଧୀ କିଏ, ଯାହାଙ୍କ ସହ ପ୍ରଧାନମନ୍ତ୍ରୀ ମୋଦୀ ମଞ୍ଚ ବାଣ୍ଟିବା ଉଚିତ୍? ରାହୁଲ ଗାନ୍ଧୀ କଂଗ୍ରେସର ପ୍ରଧାନମନ୍ତ୍ରୀ ପ୍ରାର୍ଥୀ ନୁହଁନ୍ତି। ପ୍ରଥମେ ସେ ନିଜକୁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ଘୋଷଣା କରିବା ଉଚିତ ଏବଂ କଂଗ୍ରେସର ପରାଜୟର ଦାୟିତ୍ବ ମଧ୍ୟ ତାଙ୍କର ହେବା ବୋଲି ସେ କହିବା ଜରୁରୀ। ଏହା ପରେ ବିତର୍କ ପାଇଁ ପ୍ରଧାନମନ୍ତ୍ରୀଙ୍କୁ ଆମନ୍ତ୍ରଣ ପଠାଇବା ଭଲ ହେବ। ସେପର୍ଯ୍ୟନ୍ତ ଆମେ ରାହୁଲ ଗାନ୍ଧୀଙ୍କ ସହ ବିତର୍କ ପାଇଁ ବିଜେପି ମୁଖପାତ୍ରଙ୍କୁ ପଠାଇବାକୁ ପ୍ରସ୍ତୁତ ଅଛୁ।