ଗିରଫ ହୋଇଥିବା ଚାଷୀଙ୍କୁ ମୁକ୍ତ କଲେ ହିଁ କଥାବାର୍ତ୍ତା ହେବୁ: ରାକେଶ ଟିକାୟତ

ନୂଆଦିଲ୍ଲୀ: ଭାରତୀୟ କିସାନ ୟୁନିଅନର ଜାତୀୟ ମୁଖପାତ୍ର ରାକେଶ ଟିକାୟତଙ୍କ ଭାବପ୍ରବଣ ଭିଡିଓ ଭାଇରାଲ ହେବା ପରେ କୃଷକ ବିରୋଧ ପ୍ରଦର୍ଶନ ପୁଣିଥରେ ମୁଣ୍ଡ ଟେକିଛି | ପୁଣିଥରେ ବହୁ ସଂଖ୍ୟାରେ କୃଷକ ଦିଲ୍ଲୀ ସୀମାରେ ଏକତ୍ରିତ ହୋଇ କୃଷି ନିୟମକୁ ବିରୋଧ କରୁଛନ୍ତି। ଏହି ସମୟରେ ରବିବାର ଦିନ ରାକେଶ ଟିକାୟତଙ୍କ ନୂଆ ବିବୃତ୍ତି ସାମ୍ନାକୁ ଆସିଛି।

ଟିକାୟତ କହିଛନ୍ତି ଯେ,'ଏହି ଆନ୍ଦୋଳନ ମହାଭାରତ ପରି। ଏଥିରେ କୃଷକମାନେ ଜିତିବେ | ଯଦିଓ ସରକାର ଆଲୋଚନା ବିଷୟରେ କହୁଛନ୍ତି, କିନ୍ତୁ ଜେଲରେ ଥିବା ଆମ ଲୋକମାନଙ୍କୁ ମୁକ୍ତ ନ କରାଯିବା ଯାଏଁ କୌଣସି ଆଲୋଚନା କରାଯିବ ନାହିଁ | ଆମେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପଦକ୍ଷେପକୁ ସମର୍ଥନ କରୁଛୁ। ଆମେ ଜାଣୁ ମୋଦୀଙ୍କ କଥାକୁ ସମ୍ମାନ ଦେବା ଏବଂ ଚାଷୀଙ୍କ ପଗଡିକୁ ମଧ୍ୟ ସମ୍ମାନ ଦେବା ଜାଣିଛୁ । ସରକାରଙ୍କ ସହ ନିଶ୍ଚିତ ଭାବରେ ଆଲୋଚନା ହେବ, କିନ୍ତୁ କୃଷକ ଭାଇଙ୍କ ମୁକ୍ତି ପରେ ହିଁ ଆଲୋଚନା କରାଯିବ' |

ସୂଚନା ଥାଉ ଯେ ପ୍ରତିବାଦକାରୀ କୃଷକମାନଙ୍କ ସହ ଆଲୋଚନା କରିବାକୁ ସରକାର ରାଜି ବୋଲି ଶୁକ୍ରବାର ଦିନ ପ୍ରଧାନମନ୍ତ୍ରୀ ମୋଦୀ କହିଥିଲେ | ଉଲ୍ଲେଖଯୋଗ୍ୟ ଯେ ଗଣତନ୍ତ୍ର ଦିବସ ଅବସରରେ ଟ୍ରାକ୍ଟର ପରେଡରେ ଅନେକ ବିକ୍ଷୋଭକାରୀ ଲାଲକିଲ୍ଲାରେ ପହଞ୍ଚି ସେଠାରେ ସେମାନଙ୍କର ଧାର୍ମିକ ପତାକା ଲଗାଇଥିଲେ। ଏହା ପରେ ଦିଲ୍ଲୀ ପୁଲିସ ଏହି ଘଟଣାକୁ ନେଇ ପ୍ରାୟ ୪୦ ଟି ମାମଲା ରୁଜୁ କରି ୮୦ ରୁ ଅଧିକ ଲୋକଙ୍କୁ ଗିରଫ କରିଥିଲା। କିନ୍ତୁ ବର୍ତ୍ତମାନ କୃଷକ ନେତାମାନେ ସମସ୍ତଙ୍କ ମୁକ୍ତି ଦାବି କରୁଛନ୍ତି।