ଭାରତୀୟ ମୁଦ୍ରାରେ ରବୀନ୍ଦ୍ରନାଥ ଟାଗୋର, ଏପିଜେ ଅବଦୁଲ କଲାମଙ୍କ ଚିତ୍ର ବ୍ୟବହାର କରିବାକୁ ବିଚାର କରୁଛି ଆରବିଆଇ

ନୂଆଦିଲ୍ଲୀ: ଅର୍ଥ ମନ୍ତ୍ରାଳୟ ଏବଂ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ରବୀନ୍ଦ୍ରନାଥ ଟାଗୋର ଏବଂ ଏପିଜେ ଅବଦୁଲ କଲାମଙ୍କ ୱାଟରମାର୍କ ଚିତ୍ରକୁ କିଛି ମୂଲ୍ୟର ବ୍ୟାଙ୍କ ନୋଟର ଏକ ନୂତନ ସିରିଜରେ ବ୍ୟବହାର କରିବାକୁ ବିଚାର କରୁଥିବା ଜଣାଯାଇଛି।

ବର୍ତ୍ତମାନ ବ୍ୟବହାର କରା ଯାଉଥିବା ଭାରତୀୟ ନୋଟ୍‌ ଗୁଡ଼ିକରେ ଦେଶର ପିତା ମହାତ୍ମା ଗାନ୍ଧୀଙ୍କର ୱାଟରମାର୍କ ଚିତ୍ରକୁ ବ୍ୟବହାର କରାଯାଉଛି। ଗାନ୍ଧୀ ପ୍ରଥମେ ୧୯୬୯ରେ ଭାରତୀୟ ମୁଦ୍ରା ନୋଟରେ ସ୍ଥାନ ପାଇଥିଲେ ଯେତେବେଳେ ତାଙ୍କର ୧୦୦ ତମ ଜନ୍ମ ଉତ୍ସବକୁ ସମ୍ମାନ ଜଣାଇ ଏକ ଡିଜାଇନ୍‌ ସିରିଜ୍‌ ଜାରି କରା ଯାଇଥିଲା।
ହସ୍ତଗତ ହୋଇଥିବା ରିପୋର୍ଟ ଅନୁଯାୟୀ, ଅର୍ଥ ମନ୍ତ୍ରାଳୟ ଅଧୀନରେ ଆସୁଥିବା ଭାରତୀୟ ସୁରକ୍ଷା ମୁଦ୍ରଣ ଏବଂ ମିଣ୍ଟିଂ କର୍ପୋରେସନ୍‌ (ଏସ୍‌ପିଏମ୍‌ -ସିଆଇଏଲ୍‌) ଆଇଆଇଟି-ଦିଲ୍ଲୀ ଏମିରେଟସ୍‌ ପ୍ରଫେସର ଦିଲୀପ ଟି ଶାହାନୀଙ୍କୁ ଗାନ୍ଧୀ, ଟାଗୋର ଏବଂ କଲାମ ୱାଟରମାର୍କର ଦୁଇଟି ପୃଥକ ସେଟ୍‌ ପଠାଇଥିବା ଜଣାପଡିଛି; ଯାହାକୁ ଦୁଇଟି ସେଟ୍‌ ମଧ୍ୟରୁ ବାଛିବାକୁ ଏବଂ ସରକାରଙ୍କୁ ତାଙ୍କର ଚୂଡ଼ାନ୍ତ ବିଚାର ଉପସ୍ଥାପନ କରିବାକୁ କୁହାଯାଇଛି।

ପ୍ରଥମ ଥର ପାଇଁ ଆରବିଆଇ ମହାତ୍ମା ଗାନ୍ଧୀଙ୍କ ବ୍ୟତୀତ ଅନ୍ୟ ପ୍ରସିଦ୍ଧ ବ୍ୟକ୍ତିତ୍ୱଙ୍କ ଚିତ୍ରକୁ ବ୍ୟାଙ୍କ ନୋଟରେ ବ୍ୟବହାର କରିବାକୁ ବିଚାର କରୁଛି। ସରକାରୀ ସୂତ୍ରରୁ ପ୍ରକାଶ ଯେ ତିନିଟି ଯାକ ଚିତ୍ର ବାଛିବା ଉପରେ ଚୂଡ଼ାନ୍ତ ନିଷ୍ପତ୍ତି ସର୍ବୋଚ୍ଚ ସ୍ତରରେ ନିଆଯିବ। ସୂତ୍ରରୁ ପ୍ରକାଶ ଯେ, ତିନିଟି ୱାଟରମାର୍କ ନମୁନାର ଡିଜାଇନିଂରେ ସରକାରୀ ପ୍ରତିବନ୍ଧକ ଥିଲା।

ସୂତ୍ରରୁ ଏହା ମଧ୍ୟ କୁହାଯାଇଛି ଯେ ୨୦୧୭ରେ, ନଅଟି ଆରବିଆଇ ଆଭ୍ୟନ୍ତରୀଣ କମିଟି ମଧ୍ୟରୁ ଗୋଟିଏ, ଯାହା ବ୍ୟାଙ୍କ ନୋଟର ଏକ ନୂତନ ସିରିଜ୍‌ ପାଇଁ ନୂତନ ସୁରକ୍ଷା ବୈଶିଷ୍ଟ୍ୟ ସୁପାରିଶ କରିବା ପାଇଁ ଗଠିତ ହୋଇଥିଲା, ୨୦୨୦ରେ ଏହାର ରିପୋର୍ଟ ଦାଖଲ କରିଥିଲା। ଯେଉଁଥିରେ ପ୍ରସ୍ତାବ ଦିଆଯାଇଥିଲା ଯେ ଗାନ୍ଧୀଙ୍କ ବ୍ୟତୀତ, ସମସ୍ତ ମୁଦ୍ରା ନୋଟରେ ଅନ୍ତର୍ଭୁକ୍ତ କରିବା ପାଇଁ ଟାଗୋର ଏବଂ କଲାମଙ୍କ ୱାଟରମାର୍କ ମଧ୍ୟ ବିକଶିତ କରାଯିବା ଉଚିତ୍‌। ରବୀନ୍ଦ୍ରନାଥ ଟାଗୋର ଜଣେ ନୋବେଲ ଲିଉଟେରେଟ ଏବଂ ବଙ୍ଗଳାର ସର୍ବଶ୍ରେଷ୍ଠ ଆଇକନ୍‌ ଭାବରେ ସ୍ମରଣୀୟ ହୋଇଥିବା ବେଳେ ଭାରତର ଏକାଦଶ ରାଷ୍ଟ୍ରପତି ଏପିଜେ ଅବଦୁଲ କଲାମଙ୍କୁ ‘ମିସାଇଲ୍‌ ମ୍ୟାନ୍‌’ କୁହାଯାଏ।