ଇସ୍ରାଏଲ-ଇରାନ ସଂଘର୍ଷ ସମାଧାନ: ଟ୍ରମ୍ପ୍‌ଙ୍କ ସହ ୫୦ ମିନିଟ୍ ଆଲୋଚନା କଲେ ପୁଟିନ

ୱାଶିଂଟନ: ମଧ୍ୟପ୍ରାଚ୍ୟ ବହୁ ଦିନ ଧରି ସଂଘର୍ଷର ନିଆଁରେ ଜଳୁଛି। ଇସ୍ରାଏଲ ଏବଂ ଇରାନ ମଧ୍ୟରେ ବିବାଦ ଏହି ନିଆଁକୁ ଆହୁରି ଘୋର କରିଛି। ଗତ ୪୮ଘଣ୍ଟା ଧରି ଉଭୟ ଦେଶ ପରସ୍ପର ଉପରେ ନିରନ୍ତର କ୍ଷେପଣାସ୍ତ୍ର ମାଡ଼ କରୁଛନ୍ତି। ଏହି ସମୟରେ, ମଧ୍ୟପ୍ରାଚ୍ୟର ବର୍ତ୍ତମାନର ପରିସ୍ଥିତି ବିଷୟରେ ଆଲୋଚନା କରିବା ପାଇଁ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ଙ୍କ ମଧ୍ୟରେ ଏକ ଫୋନ୍ ବାର୍ତ୍ତାଳାପ ହୋଇଛି।

ରୁଷିଆ ରାଷ୍ଟ୍ରପତି କାର୍ଯ୍ୟାଳୟ କ୍ରେମଲିନର ଜଣେ ଅଧିକାରୀ ୟୁରି ଉଶାକୋଭ କହିଛନ୍ତି ଯେ, ପୁଟିନ ଏବଂ ଟ୍ରମ୍ପ୍‌ଙ୍କ ମଧ୍ୟରେ ୫୦ ମିନିଟର ଆଲୋଚନା ସକାରାତ୍ମକ ଥିଲା। ଏହି ଆଲୋଚନାରେ ଦୁଇ ନେତା ମଧ୍ୟପ୍ରାଚ୍ୟ ଉପରେ ଇସ୍ରାଏଲ-ଇରାନ ସଂଘର୍ଷର ଗମ୍ଭୀର ପ୍ରଭାବ ବିଷୟରେ ଆଲୋଚନା କରିଥିଲେ।

ଉଶାକୋଭଙ୍କ ଅନୁଯାୟୀ, ପୁଟିନ ଇସ୍ରାଏଲ ଏବଂ ଇରାନର ନେତାମାନଙ୍କ ସହ ତାଙ୍କର ଆଲୋଚନାର ବିବରଣୀ ମଧ୍ୟ ଟ୍ରମ୍ପ୍‌ଙ୍କ ସହ ସେୟାର କରିଥିଲେ। ପୁଟିନ ଇରାନ ବିରୁଦ୍ଧରେ ଇସ୍ରାଏଲର ସାମରିକ କାର୍ଯ୍ୟାନୁଷ୍ଠାନକୁ ସମାଲୋଚନା କରିଥିଲେ ଏବଂ ଏହି ସଂଘର୍ଷ ଦ୍ୱାରା ସୃଷ୍ଟି ହୋଇଥିବା ଉତ୍ତେଜନା ଉପରେ ଗମ୍ଭୀର ଚିନ୍ତା ପ୍ରକାଶ କରି କହିଥିଲେ ଯେ, ଏହାର ନକାରାତ୍ମକ ପ୍ରଭାବ ସମଗ୍ର ମଧ୍ୟପ୍ରାଚ୍ୟ ଅଞ୍ଚଳ ଅନୁଭବ କରିବ।

ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ସଂଘର୍ଷକୁ ଆହୁରି ବୃଦ୍ଧି ନକରିବା ଉପରେ ଗୁରୁତ୍ୱାରୋପ କରିଥିଲେ ଏବଂ ସମ୍ଭାବ୍ୟ ଶାନ୍ତି ପ୍ରୟାସରେ ଅଂଶଗ୍ରହଣ କରିବାକୁ ରୁଷିଆର ଇଚ୍ଛୁକତା ପ୍ରକାଶ କରିଥିଲେ। ସେ ବିବାଦର ସମାଧାନ ପାଇଁ ମଧ୍ୟସ୍ଥତା ମଧ୍ୟ ପ୍ରସ୍ତାବ ଦେଇଥିଲେ। ଏହି ସମୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ବର୍ତ୍ତମାନର ପରିସ୍ଥିତିକୁ ଗମ୍ଭୀର ବୋଲି ବର୍ଣ୍ଣନା କରି କହିଛନ୍ତି ଯେ, ଇରାନକୁ ଆଲୋଚନାକୁ ଫେରିବାକୁ ପଡିବ। ସେ ଏହା ମଧ୍ୟ କହିଛନ୍ତି, ଆମେରିକାର ଆଲୋଚନା ଦଳ ଏଥିପାଇଁ ପ୍ରସ୍ତୁତ ଏବଂ ସେମାନେ ଇରାନ ପ୍ରତିନିଧିଙ୍କ ସହ ଆଲୋଚନା କରିବାକୁ ପ୍ରସ୍ତୁତ।

ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଜୁନ୍ ୨ ତାରିଖରେ ଇସ୍ତାନବୁଲରେ ଡୋନାଲ୍ଡ ଟ୍ରମ୍ପ୍‌ଙ୍କ ସହ ଆଲୋଚନା ସମୟରେ ହୋଇଥିବା ରୁଷିଆ-ୟୁକ୍ରେନ ଆଲୋଚନା ଚୁକ୍ତିନାମାର ବିବରଣୀ ସେୟାର କରିଥିଲେ। ସେ ଜୁନ୍ ୨୨ ପରେ ୟୁକ୍ରେନ ସହିତ ଆଲୋଚନା ପୁଣି ଆରମ୍ଭ କରିବାକୁ ମଧ୍ୟ ଇଚ୍ଛା ପ୍ରକାଶ କରିଥିଲେ।

ଅଧିକ ପଢ଼ନ୍ତୁ: ଖାମେନିଙ୍କ ନିକଟରେ ପହଞ୍ଚିଲା ମୋସାଦ ହାତ: ବିଶ୍ୱସ୍ତଙ୍କୁ ହତ୍ୟା

ମଧ୍ୟପ୍ରାଚ୍ୟରେ ଇସ୍ରାଏଲ ଏବଂ ଇରାନ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି, ଯେଉଁଠାରେ ଉଭୟ ଦେଶ ପରସ୍ପର ଉପରେ ପ୍ରବଳ ଆକ୍ରମଣ କରୁଛନ୍ତି। ଇସ୍ରାଏଲୀ ପ୍ରତିରକ୍ଷା ବାହିନୀ (ଆଇଡିଏଫ) ଅନୁଯାୟୀ, ଗତକାଲି ରାତିରେ ଇରାନ ୮୦ ରୁ ଅଧିକ ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଛି, ଯେଉଁଥିରୁ ପ୍ରାୟ ୪୦ ଉତ୍ତର ଇସ୍ରାଏଲରେ ମାଡ ହୋଇଛି। 

ଏହି ଆକ୍ରମଣରେ ଏପର୍ଯ୍ୟନ୍ତ ୧୦ ଜଣ ଇସ୍ରାଏଲୀ ନାଗରିକଙ୍କ ମୃତ୍ୟୁ ଘଟିଛି, ଯେତେବେଳେ ୨୦୦୦ରୁ ଅଧିକ ଆହତ ହୋଇଛନ୍ତି। ଏବେ ବି ୭ ଜଣ ନିଖୋଜ ଅଛନ୍ତି ବୋଲି ଜଣାପଡିଛି। ସେହି ସମୟରେ, ଇରାନ ବିରୁଦ୍ଧରେ ଇସ୍ରାଏଲର କାର୍ଯ୍ୟାନୁଷ୍ଠାନରେ ୧୩୦ ରୁ ଅଧିକ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ପ୍ରାୟ ୯ ଜଣ ପରମାଣୁ ବୈଜ୍ଞାନିକ ଏବଂ ଅନେକ ବରିଷ୍ଠ ଇରାନୀ କମାଣ୍ଡର ମଧ୍ୟ ଅଛନ୍ତି। ଏହା ବ୍ୟତୀତ ୩୦୦ରୁ ଅଧିକ ଲୋକ ଆହତ ହୋଇଛନ୍ତି।

ଅଧିକ ପଢ଼ନ୍ତୁ: ଦୁର୍ଘଟଣାରେ ହେମାନନ୍ଦଙ୍କ ପତ୍ନୀ-ଝିଅ ଗୁରୁତର; ବର୍ତ୍ତିଲେ ଦୁଇ ପୂର୍ବତନ ବିଧାୟକ

 israel | Israel Iran War | donald-trump | vladimir-putin