ଟ୍ରମ୍ପଙ୍କ ସହ କଥା ହେବାକୁ ପ୍ରସ୍ତୁତ : ପୁଟିନ

ମସ୍କୋ: ରୁଷିଆ-ୟୁକ୍ରେନ ଯୁଦ୍ଧକୁ ନେଇ ଏକ ବଡ ଖବର ସାମ୍ନାକୁ ଆସୁଛି । ୟୁକ୍ରେନ ଯୁଦ୍ଧ ପ୍ରସଙ୍ଗରେ ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଆଲୋଚନା କରିବାକୁ ରାଷ୍ଟ୍ରପତି ଭ୍ଲାଦିମିର ପୁଟିନ ପ୍ରସ୍ତୁତ ଅଛନ୍ତି ବୋଲି ରୁଷ ଶୁକ୍ରବାର କହିଛି।

 ତେବେ ରୁଷ ଆହୁରି ମଧ୍ୟ କହିଛି ଯେ ୟୁକ୍ରେନ୍ ଉପରେ ଆଲୋଚନା କରିବାକୁ ପ୍ରସ୍ତୁତ ହେବାର ଅର୍ଥ ନୁହେଁ ଯେ ମସ୍କୋ ତା'ର ପୂର୍ବ ଦାବିପରିବର୍ତ୍ତନ କରିବାକୁ ଇଚ୍ଛୁକ। ପୁଟିନଙ୍କ ମୁଖପାତ୍ର ଦିମିତ୍ରୀ ପେସ୍କୋଭଙ୍କୁ ଏକ ଦୈନିକ ସାମ୍ବାଦିକ ସମ୍ମିଳନୀରେ ପଚରାଯିବାରୁ ସେ ଏହି ମନ୍ତବ୍ୟ ଦେଇଛନ୍ତି ଯେ ପୁଟିନ୍ ନିର୍ବାଚିତ ରିପବ୍ଲିକାନ୍ ରାଷ୍ଟ୍ରପତିଙ୍କ ସହ କଥା ବାର୍ତ୍ତା କରିବାକୁ ଇଚ୍ଛା ପ୍ରକାଶ କରିଛନ୍ତି କି?

ଏହାର ଜବାବରେ ପେସ୍କୋଭ୍ କହିଛନ୍ତି, ସ୍ୱତନ୍ତ୍ର ସାମରିକ ଅଭିଯାନର ଲକ୍ଷ୍ୟ ବଦଳୁଛି ବୋଲି ରାଷ୍ଟ୍ରପତି ପୁଟିନ୍ କେବେ କହିନାହାନ୍ତି। ଅପରପକ୍ଷରେ ସେ ବାରମ୍ବାର କହିଛନ୍ତି ଯେ ତାହା ବଦଳିବନାହିଁ । ଏସବୁ ଆମ ଦେଶର ସୁରକ୍ଷା ସ୍ୱାର୍ଥ, ସେଠାରେ ରହୁଥିବା ରୁଷୀୟ ଲୋକଙ୍କ ସୁରକ୍ଷା ସ୍ୱାର୍ଥ ସହ ଜଡିତ । ତେଣୁ କୌଣସି ପରିବର୍ତ୍ତନ ନେଇ ଆଲୋଚନା ହୋଇନଥିଲା। ଯୁଦ୍ଧ ଶେଷ କରିବା ପାଇଁ ପୁଟିନ୍ ଜୁନ୍ ୧୪ ରେ ତାଙ୍କର ସର୍ତ୍ତ ଧାର୍ଯ୍ୟ କରିଛନ୍ତି। ପ୍ରଥମଟି ହେଲା, ୟୁକ୍ରେନ୍ ତା'ର ନାଟୋ ଅଭିଳାଷ ତ୍ୟାଗ କରି ରୁଷିଆ ଦାବି କରୁଥିବା ଚାରିଟି ଯାକ ଜୋନ୍ରୁ ନିଜର ସମସ୍ତ ସୈନ୍ୟ ପ୍ରତ୍ୟାହାର କରିବା ଦରକାର। କିନ୍ତୁ ୟୁକ୍ରେନ୍ ଏହି ସର୍ତ୍ତକୁ ପ୍ରତ୍ୟାଖ୍ୟାନ କରିଛି।