ସିଦ୍ଧୁ ମୁସ୍‌ ୱାଲା ହତ୍ୟା ମାମଲାରେ ଲରେନ୍‌ସ ବିଷ୍ଣୋଇ ମୁଖ୍ୟ ଅଭିଯୁକ୍ତ ଭାବରେ ଚିହ୍ନଟ ହେବା ପରେ ବଢ଼ିଲା ସଲମାନ ଖାନଙ୍କ ସୁରକ୍ଷା ବ୍ୟବସ୍ଥା

ମୁମ୍ବାଇ: ବିପଦ ସ୍ତରକୁ ବିଶ୍ଳେଷଣ କରିବା ପରେ ମୁମ୍ବାଇ ପୁଲିସ ବଲିଉଡ ଅଭିନେତା ସଲମାନ ଖାନଙ୍କ ସୁରକ୍ଷା ବ୍ୟବସ୍ଥାକୁ ବଢାଇ ଦେଇଛି। ସିଦ୍ଧୁ ମୁସ୍‌ ୱାଲା ହତ୍ୟା ମାମଲାରେ ଲରେନ୍‌ସ ବିଷ୍ଣୋଇ ମୁଖ୍ୟ ଅଭିଯୁକ୍ତ ଭାବରେ ଚିହ୍ନଟ ହେବା ପରେ ସଲମାନ ଖାନଙ୍କ ସାମଗ୍ରିକ ସୁରକ୍ଷା ବୃଦ୍ଧି କରାଯାଇଥିବା କହିଛି ମୁମ୍ବାଇ ପୁଲିସ। ରାଜସ୍ଥାନରୁ ଗ୍ୟାଙ୍ଗ ଦ୍ୱାରା ପରିଚାଳିତ କରାଯାଉଥିବା କାର୍ଯ୍ୟକଳାପରୁ ସଲମାନଙ୍କୁ ସୁରକ୍ଷାକୁ ନିଶ୍ଚିତ କରିବାକୁ ସେମାନେ ଅଭିନେତାଙ୍କ ସୁରକ୍ଷା ବୃଦ୍ଧି କରିଛନ୍ତି ବୋଲି ପୁଲିସ କହିଛି।

ମୁମ୍ବାଇ ପୁଲିସର ଜନୈକ ବରିଷ୍ଠ ଅଧିକାରୀ ଗଣମାଧ୍ୟମକୁ କହିଛନ୍ତି, ଆମେ ସଲମାନ ଖାନଙ୍କ ସାମଗ୍ରିକ ସୁରକ୍ଷାକୁ ବୃଦ୍ଧି କରିଛୁ। ତାଙ୍କ ଆପାର୍ଟମେଣ୍ଟ ଚାରିପାଖରେ ସୁରକ୍ଷା କର୍ମୀ ଉପସ୍ଥିତ ରହିବେ। ଉଲ୍ଲେଖଯୋଗ୍ୟ, ବିଷ୍ଣୋଇ ସମ୍ପ୍ରଦାୟ ଦ୍ୱାରା କୃଷ୍ଣସାର ମୃଗକୁ ପବିତ୍ର ଜୀବ ଭାବରେ ବିବେଚନା କରାଯାଏ। ଏକ କୃଷ୍ଣସାର ମୃଗ ଶିକାର ମାମଲାରେ ସମ୍ପୃକ୍ତ ଥିବାରୁ ସଲମାନ ଖାନଙ୍କୁ ହତ୍ୟା କରିବାର ଷଡଯନ୍ତ୍ର ଯୋଜନା ବିଷ୍ଣୋଇ କରିଥିବା ଜଣାଯାଇଛି।

Image Courtesy: MidDay

ଲରେନ୍‌ସ ବିଷ୍ଣୋଇ ୨୦୧୮ରେ ଏକ ଅଦାଲତ ବାହାରେ କହିଥିଲା, ଆମେ ଯୋଧପୁରରେ ସଲମାନ ଖାନଙ୍କୁ ହତ୍ୟା କରିବୁ! ବିଷ୍ଣୋଇ ଏହା ମଧ୍ୟ କହିଥିଲା ଯେ, ଆମେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରେ ସମସ୍ତେ ଜାଣିବେ! ମୁଁ ବର୍ତ୍ତମାନ ପର୍ଯ୍ୟନ୍ତ କିଛି କରିନାହିଁ!... ବିଷ୍ଣୋଇର ଅନ୍ୟତମ ଘନିଷ୍ଠ ସହଯୋଗୀ ରାହୁଲ ଓରଫ ସୁନ୍ନିକୁ ହତ୍ୟା ଅଭିଯୋଗରେ ୨୦୨୦ରେ ଗିରଫ କରାଯାଇଥିଲା। ସେ କହିଥିଲା ଯେ ସେମାନେ ସଲମାନ ଖାନଙ୍କୁ ହତ୍ୟା କରିବାର ଯୋଜନା ପ୍ରସ୍ତୁତ କରିଛନ୍ତି।

ଡିସିପି (ମୁଖ୍ୟାଳୟ)ର ରାଜେଶ ଦୁଗଲ କହିଛନ୍ତି ଯେ ଯେତେବେଳେ ପୁଲିସ ସୁନ୍ନିକୁ ପଚରାଉଚରା କରିଥିଲା, ସେତେବେଳେ ସେମାନେ ଜାଣିବାକୁ ପାଇଲେ ଯେ ସେ ସଲମାନ ଖାନଙ୍କ ହତ୍ୟା ପାଇଁ ଯୋଜନା କରିବା ପାଇଁ ମୁମ୍ବାଇ ଗସ୍ତ କରିଛି।