ସଲମାନ ରୁଶଦିଙ୍କ ଆକ୍ରମଣକାରୀକୁ ୨୫ ବର୍ଷ ଜେଲ୍

ନ୍ୟୁୟର୍କ: ଲେଖକ ସଲମାନ ରୁଶଦିଙ୍କ ଉପରେ ଆକ୍ରମଣ କରିଥିବା ହାଦି ମାଟାରକୁ ଶୁକ୍ରବାର ନ୍ୟୁୟର୍କରେ ୨୫ ବର୍ଷ ଜେଲଦଣ୍ଡ ଦିଆଯାଇଛି। ଅଗଷ୍ଟ ୨୦୨୨ରେ ହୋଇଥିବା ଏହି ଆକ୍ରମଣରେ, ମାଟାର ବ୍ରିଟିଶ-ଆମେରିକୀୟ ଲେଖକ ସଲମାନ ରୁଶଦିଙ୍କ ଡାହାଣ ଆଖିରେ ଛୁରୀ ମାରିଥିଲା।

ଚଳିତ ବର୍ଷ ଫେବୃଆରୀରେ, ନ୍ୟୁୟର୍କର ଏକ ଜୁରି ତାକୁ ଦ୍ୱିତୀୟ-ଡିଗ୍ରୀ ହତ୍ୟା ଉଦ୍ୟମ ପାଇଁ ଦୋଷୀ ସାବ୍ୟସ୍ତ କରିଥିଲେ। ନିଷ୍ପତ୍ତି ନେବା ପାଇଁ ଜୁରିଙ୍କୁ ଦୁଇ ଘଣ୍ଟାରୁ କମ୍ ସମୟ ଲାଗିଥିଲା। ଏହି ଆକ୍ରମଣରେ, ଲେଖକ ରୁଶଦି ଗୋଟିଏ ଆଖିର ଦୃଷ୍ଟିଶକ୍ତି ହରାଇଥିଲେ। ମାଟାରର ଦଣ୍ଡାଦେଶ ବେଳେ ସଲମାନ ରୁଶଦି ପଶ୍ଚିମ ନ୍ୟୁୟର୍କର ଚୌଟାଉକ୍ୱା କାଉଣ୍ଟି କୋର୍ଟରୁମରେ ଉପସ୍ଥିତ ନଥିଲେ। ତଥାପି, ସେ ଏକ ବିବୃତ୍ତି ପଠାଇଥିଲେ ଯେଉଁଥିରେ ସେ ତାଙ୍କ ଜୀବନ ଉପରେ ଆକ୍ରମଣର ପ୍ରଭାବ ବିଷୟରେ ବ୍ୟାଖ୍ୟା କରିଥିଲେ।

୨୦୨୨ ଅଗଷ୍ଟ ମାସରେ ନ୍ୟୁୟର୍କର ଚୌଟାଉକ୍ୱା ଇନଷ୍ଟିଚ୍ୟୁସନ୍‌ରେ ଏକ କାର୍ଯ୍ୟକ୍ରମ ସମୟରେ ଲେଖକ ସଲମାନ ରୁଶଦିଙ୍କୁ ଆକ୍ରମଣକାରୀ ମାଟାର ମଞ୍ଚ ଉପରେ ଛୁରାମାଡ଼ କରିଥିଲା।