ସ୍ବାମୀ ଓ ଦୁଇପିଲାଙ୍କ ସହ ପୁଷ୍ପା-୨ ଦେଖିବାକୁ ଯାଇଥିବା ମହିଳାଙ୍କ ହେଲା ମୃତ୍ୟୁ

ନୂଆଦିଲ୍ଲୀ: ବହୁ ପ୍ରତୀକ୍ଷିତ ଫିଲ୍ମ ପୁଷ୍ପା-୧ ରିଲିଜ ହେବାର  ପାଖାପାଖି ୩ବର୍ଷ ପରେ ଫେରିଥିବା ପୁ‌ଷ୍ପାକୁ ନେଇ ଦର୍ଶକଙ୍କ ମଧ୍ୟରେ ଅଦ୍ଭୁତ ପ୍ରକାର କ୍ରେଜ ଦେଖିବାକୁ ମିଳିଛି। ଏଭଳି ଖୁସିର ସମୟରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। 
   
ସୂଚନାଯୋଗ୍ୟ, ହାଇଦ୍ରାବାଦରେ ଗତକାଲି ରାତିରେ ପୁଷ୍ପା-୨ ପ୍ରିମିୟର୍ ସୋ’ରେ ପୁଷ୍ପା ଅର୍ଥାତ ଅଲ୍ଳୁ ଅର୍ଜୁନ୍ ଓ ରଶ୍ମିକା ମନ୍ଦନା ସାମିଲ ହୋଇଥିଲେ । ପ୍ରିୟର ଅଭିନେତା ଓ ଅଭିନେତ୍ରୀଙ୍କୁ ଦେଖିବା ପାଇଁ ଫ୍ୟାନ୍ସମାନଙ୍କ ପ୍ରବଳ ଭିଡ଼ ଲାଗି ରହିଥିଲା।  

ଆରଟିସି କ୍ରସ୍ ରୋଡରେ ଥିବା ସନ୍ଧ୍ୟା ଥିଏଟର୍ ବାହାରେ ପ୍ରବଳ ଭିଡ଼ ହେତୁ ଦଳାଚକଟା ପରିସ୍ଥିତି ବି ଉପୁଜିଥିଲା । ଏହି ଦଳାଚକଟାରେ ଜଣେ ୩୯ ବର୍ଷ ବୟସର ମହିଳାଙ୍କ ମୃତ୍ୟୁ ହୋଇଥିଲା। ମୃତ ମହିଳାଙ୍କ ନାମ  ରେବତୀ ବୋଲି ଜଣାପଡ଼ିଛି। 
 

ରେବତୀ ତାଙ୍କ ସ୍ବାମୀ ଦୁଇ ପିଲା ତେଜ ଓ ସାନ୍ବିକାଙ୍କ ସହିତ ପୁଷ୍ପା-୨ ପ୍ରିମିୟର୍ ସୋ ଦେଖିବା ପାଇଁ ସନ୍ଧ୍ୟା ଥିଏଚରରେ ପହଞ୍ଚିଥିଲେ। ଏହି ସମୟ‌ରେ ଅଲ୍ଲୁ ଅର୍ଜୁନ ଓ ରଶ୍ମିକା ମନ୍ଦନାଙ୍କୁ ଦେଖିବା ପାଇଁ ଏତେ ଭିଡ଼ଲାଗିଥିଲା କି ଥିଏଟର ପର୍ଯ୍ୟନ୍ତ ପହଞ୍ଚିବା ସମୟରେ ରେବତୀ ଓ ତାଙ୍କ ୯ବର୍ଷର ପୁଅ ଭାରସାମ୍ୟ ରକ୍ଷା କରି ନପାରି ଭିଡ଼ ଭିତରେ ପଡ଼ି ଯାଇଥିଲେ। ଦୁଃଖର ବିଷୟ ଭିଡ଼‌ଭିତରେ ଥିବା ଲୋକଙ୍କ ଦଳାଚକଟାରେ ମା’ ରେବତୀଙ୍କ ମୃତ୍ୟୁ ହୋଇଯାଇଥିବା ବେଳେ ପୁଅଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।