ବିଚାରପତିଙ୍କ ଘରୁ ଅର୍ଥ ଜବତ ମାମଲା :  ଦିଲ୍ଲୀ ହାଇକୋର୍ଟ ମୁଖ୍ୟ ବିଚାରପତିଙ୍କୁ ରିପୋର୍ଟ ମାଗିଲେ ସୁପ୍ରିମକୋର୍ଟ କଲେଜିୟମ

ନୂଆଦିଲ୍ଲୀ : ଦିଲ୍ଲୀ ହାଇକୋର୍ଟର ବିଚାରପତି ଯଶୱନ୍ତ ବର୍ମାଙ୍କ ଘରୁ ଅର୍ଥ ଜବତ  ସମ୍ପର୍କରେ ପ୍ରକାଶିତ ଖବର ଉପରେ ସ୍ପଷ୍ଟୀକରଣ ଦେଇ ସୁପ୍ରିମକୋର୍ଟ ଏକ ପ୍ରେସ୍ ବିଜ୍ଞପ୍ତି ଜାରି କରିଛନ୍ତି। ଏହି ପ୍ରେସ ବିଜ୍ଞପ୍ତିରେ, ସୁପ୍ରିମକୋର୍ଟ କହିଛନ୍ତି ଯେ ସୁପ୍ରିମକୋର୍ଟ କଲେଜିୟମ ଜଷ୍ଟିସ୍ ବର୍ମା ମାମଲା ଉପରେ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତିଙ୍କଠାରୁ ଏକ ରିପୋର୍ଟ ମାଗିଛନ୍ତି। ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତି ନିଜ ସ୍ତରରେ ସୂଚନା ସଂଗ୍ରହ କରୁଛନ୍ତି ଏବଂ ସେ ମାର୍ଚ୍ଚ ୨୧ ସନ୍ଧ୍ୟା ସୁଦ୍ଧା ସୁପ୍ରିମକୋର୍ଟରେ ତାଙ୍କର ରିପୋର୍ଟ ଦାଖଲ କରିବେ।

ଏହି ପ୍ରେସ ବିଜ୍ଞପ୍ତିରେ ଏହା ମଧ୍ୟ କୁହାଯାଇଛି ଯେ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତିଙ୍କ ବ୍ୟତୀତ, ଜଷ୍ଟିସ୍ ବର୍ମାଙ୍କଠାରୁ ମଧ୍ୟ ସ୍ପଷ୍ଟୀକରଣ ମଗାଯାଇଛି। ଏହି ଉତ୍ତରଗୁଡ଼ିକୁ ଦେଖିବା ଏବଂ ଅନ୍ୟାନ୍ୟ ତଥ୍ୟ ଯାଞ୍ଚ କରିବା ପରେ, ସୁପ୍ରିମକୋର୍ଟ କଲେଜିୟମ୍ ଏ ସମ୍ପର୍କରେ ଆହୁରି ଏକ ପ୍ରସ୍ତାବ ପାସ୍ କରିବେ।

ସୁପ୍ରିମକୋର୍ଟ ଏହା ମଧ୍ୟ କହିଛନ୍ତି ଯେ ଜଷ୍ଟିସ୍ ବର୍ମାଙ୍କୁ ଆହ୍ଲାବାଦ ହାଇକୋର୍ଟକୁ ସ୍ଥାନାନ୍ତର ପ୍ରସ୍ତାବ ଏହି ଆଭ୍ୟନ୍ତରୀଣ ତଦନ୍ତଠାରୁ ଏକ ପୃଥକ ପ୍ରକ୍ରିୟା। ଯେହେତୁ ଏହି ଘଟଣା ଦିଲ୍ଲୀରେ ଘଟିଛି, ତେଣୁ ତାଙ୍କୁ ଏଠାରେ ପଦବୀରେ ରଖିବା ଠିକ୍ ହେବ ନାହିଁ। ପ୍ରେସ୍ ରିଲିଜ୍‌ରେ ଏହା ମଧ୍ୟ କୁହାଯାଇଛି ଯେ ଜଷ୍ଟିସ୍ ବର୍ମା ଦିଲ୍ଲୀ ହାଇକୋର୍ଟରେ ବରିଷ୍ଠତା ତାଲିକାରେ ତୃତୀୟ ସ୍ଥାନରେ ଅଛନ୍ତି, ଯେତେବେଳେ ଆହ୍ଲାବାଦ ହାଇକୋର୍ଟରେ ସେ ବରିଷ୍ଠତା ତାଲିକାରେ ନବମ ସ୍ଥାନରେ ରହିବେ।